Oktyabrın 4-də ümummilli lider Heydər Əliyevin 100 illiyinə həsr edilmiş VI Bakı Beynəlxalq Memarlıq Müsabiqəsinə təqdim olunmuş işlərin sərgisinin açılış mərasimi keçirilib.
Sonra KİV nümayəndələri üçün mətbuat konfransı keçirilib.
Azərbaycan Memarlar İttifaqının İdarə Heyətinin sədri Elbay Qasımzadə müsabiqəyə təqdim olunan layihələrin keyfiyyəti, sayı, eləcə də iştirakçıların təmsil etdikləri ölkələr barədə məlumat verib.
Diqqətə çatdırılıb ki, bu il müsabiqəyə dünyanın 26 ölkəsindən – ABŞ, Azərbaycan, Banqladeş, Braziliya, Cənubi Afrika Respublikası, Çexiya, Çin, Fransa, Gürcüstan, Hindistan, İspaniya, İtaliya, Cənubi Koreya, Özbəkistan, Qazaxıstan, Qırğızıstan, Madaqaskar, Malayziya, Misir, Portuqaliya, Rumıniya, Rusiya, Serbiya, Türkiyə, Yunanıstan, Vyetnamdan 200-dən çox layihə təqdim olunub. İştirakçıların layihələrinin qiymətləndirilməsi üçün aşağıdakı tərkibdə Beynəlxalq münsiflər heyəti dəvət olunub: Deniz İncedayi (Türkiyə), Kevin Bingham (Cənubi Afrika), Divya Kuş (Hindistan), Cüzeppe Kappoçin (İtaliya) və Elbay Qasımzadə (Azərbaycan).
Mətbuat konfransında mədəniyyət nazirinin müavini Səadət Yusifova 2013-cü ildən Mədəniyyət Nazirliyinin Bakı Beynəlxalq Memarlıq Müsabiqəsinin həmtəsisçisi və həmtəşkilatçısı olduğunu bildirib.
Müsabiqə qaliblərinin elan olunması mərasimi oktyabrın 6-da nəzərdə tutulub.