Alabama Universitetinin mütəxəssisləri dünyada ilk dəfə insana funksional donuz böyrəklərini transplantasiya ediblər.
Belə ki, uzun müddət xroniki böyrək xəstəliyindən əziyyət çəkən 50 yaşlı xəstə öz bədənini elmi araşdırmalar məqsədilə istifadə olunmasına razılıq verib. Nəticədə, xəstədə beyin ölümü təyin ediləndən sonra mütəxəssislər genləri təhlil edilmiş donuz böyrəklərinin transplantasiyasını həyata keçiriblər. Əməliyyat uğurla nəticələnib.
Mütəxəssislər sözügedən əməliyyatdan əvvəl böyrəklərdən 4 donuz genini çıxararaq onlara 6 insan geni əlavə ediblər. Bunun nəticəsində pasientin böyrəkləri kreatindən təmizlənib. Donuz böyrəkləri orqanizmdə 1 həftə ərzində normal şəkildə işləyib. Universitetin professorları böyrək xəstəliklərindən əziyyət çəkənlər üçün bu cür donor orqanların müddətli və ya müddətsiz olub-olmadığını təyin etmək istəyirlər.
Hazırda bu, ksenotransplantasiya sahəsindəki növbəti uğur hesab edilə bilər.
Səadət RZAYEVA, “Xalq qəzeti”