Əslində, Kraliça II Yelizavetanın doğum günü aprelin 21-i olsa da, ümumiyyətlə, monarxların doğum gününü yay mövsümündə qeyd etmək adət halı almışdır. 1805-ci ildən etibarən hər il iyun ayının ikinci şənbə günü monarxın “rəsmi” doğum günü kimi ordu paradı ilə qeyd edilir.
Bu mərasim əsgərlərin öz alaylarının müxtəlif rəngli bayraqları altında döyüş meydanına atılması ilə əlaqələndirilir. Hər 5 piyada qvardiya alayından biri növbə ilə (Qrenadyorlar, Koldstrim qvardiyası, Şotlandiya, İrland və Uels qvardiyaları) mərasimdə öz rənglərini nümayiş etdirir.
Kraliça II Yelizavetanın rəsmi ad günündə mərasim kral süvarilərinin onu Bukinqem sarayından paradın keçiriləcəyi yerə qədər müşayiət etməsi ilə başlayırdı. Kraliça paradın keçirildiyi yerə gələrək 500 qvardiyaçını nəzərdən keçirirdi.
Parad zamanı qvardiyaçılar rütbələrinə uyğun nizami sıra ilə ayaq səslərinin ritmik sədaları altında Kraliçanın yanından ötüb keçirdilər.
Dövlət bayrağının rəsmi idarələr üzərində dalğalandırılmasından və milli himnin səsləndirilməsindən əlavə, Kraliçanın həqiqi doğum günündə heç bir xüsusi tədbir keçirilmirdi.
Qeyd edək ki, bu adət bu gün də qüvvədədir. Kral III Çarlzın da ad günü bu qayda ilə qeyd edilir.
P.ƏFƏNDİ, “Xalq qəzeti”