Bu, bəşəriyyətin xeyrinə əsl humanist addım olardı
Rusiyanın “taxıl sazişi”ndən çıxması beynəlxalq ictimaiyyəti ciddi narahat edir. Mütəxəssislər hesab edirlər ki, bu, bütün dünyada buğdanın, bütövlükdə ərzaq məhsullarının qiymətlərinin kəskin artmasına səbəb olacaq. Təsadüfi deyil ki, son günlər beynəlxalq birjalarda taxılın satış qiymətləri artmaqda davam edir.
Xatırladaq ki, 2022-ci il iyulun 22-də İstanbulda Ukrayna taxılının, habelə Rusiyanın aqrar məhsullarının və gübrəsinin Qara dəniz vasitəsilə dünya bazarlarına çatdırılması üzrə sənədlər paketi imzalanıb. Razılaşma ilkin olaraq 120 gün müddətinə nəzərdə tutulmuş, sonradan bir neçə dəfə uzadılmışdı.
Planetimizdə böyük əks-səda doğuran bu təşəbbüsün əsas müəllifi və təşkilatçısı çağdaş dünyanın ən görkəmli dövlət xadimlərindən olan Türkiyə Prezidenti Rəcəb Tayyib Ərdoğandır. Saziş bir ilə yaxın fəaliyyət göstərmiş, yüz minlərlə ton Ukrayna taxılı dünyanın yoxsul ölkələrinə daşınaraq satılmışdır.
“Taxıl sazişi”, bəzən onu “taxıl dəhlizi” də adlandırırlar, Ukraynaya xeyli iqtisadi fayda gətirmişdir. Təxmini hesablamalara görə, Ukrayna hər il taxıl ixracından 10 milyard dollara yaxın gəlir əldə edir. Məhz taxıl sazişi sayəsində bu ölkənin büdcəsinə son bir ildə milyardlarla dollar vəsait daxil olmuşdur.
Xatırladaq ki, 22 iyul 2022-ci ildə Rusiya, Ukrayna, BMT, həmçinin qardaş Türkiyənin vasitəçiliyi ilə “Qara dəniz Taxıl Təşəbbüsü” barədə razılıq əldə edib. “Taxıl sazişi” yük gəmilərinin Qara dənizdən 310 dəniz mili uzunluğunda və üç dəniz mili enində dəhliz boyunca Odessa, Çernomorsk və Pivdennyi limanlarına təhlükəsiz keçməsinə imkan verib. Razılığa əsasən, 2022-ci il avqust ayının əvvəlindən taxılın daşınmasına başlanılıb.
Sazişə uyğun olaraq gəmilər yük yerlərinin boş olduğundan əmin olmaq üçün İstanbul yaxınlığında yoxlamadan keçir, daha sonra yüklənmək üçün Qara dəniz humanitar dəhlizindən Ukrayna limanlarına yol alırdı. Türkiyə tərəfi bütün öhdəliklərinə ciddi əməl edib ki, bu, saziş iştirakçıları tərəfindən hər zaman dərin razılıq hissilə qarşılanıb.
Qeyd etmək lazımdır ki. Ukrayna taxılının hazırda Rusiyanın nəzarətində olan Qara dəniz ərazi sularından maneəsiz ixracına icazə verən və buna şərait yaradan Rusiya və onun liderinin də imici xeyli yaxşılaşmışdı. Bu, yaxın qonşusu ilə ağır müharibə aparan bir ölkənin lideri üçün son dərəcə vacib idi.
Bundan əlavə, müqavilənin fəaliyyət göstərməsi Türkiyə-Rusiya münasibətlərinə pozitiv bir dinamika əlavə etmişdi. Rəsmi Moskva ümid edirdi, belə bir humanist addım regionda sülh danışıqlarının başlanmasına müsbət təsir göstərə bilər. Lakin son aylar və həftələr ərzində Rusiya-Ukrayna müharibəsində gərginlik daha da artmış və tərəflərin danışıq masası ətrafında əyləşəcəyinə ümidlər kəskin azalmışdır.
Belə bir şəraitdə Rusiyanın sazişdən çıxacağı gözlənilən idi. Moskva əlavə şərtlər irəli sürür və müqavilədən çıxacağı ilə bağlı təhdidlər edirdi. Nəhayət, Rusiya Prezidenti Aparatının mətbuat katibi Dimitri Peskov bildirdi ki, bu il iyulun 17-də “Taxıl sazişi”nin fəaliyyəti faktiki olaraq dayandırılıb: “Təəssüf ki, təşəbbüsün Rusiyaya aid hissəsi indiyə qədər yerinə yetirilməyib”. O, eyni zamanda, “taxıl sazişi”nin Rusiyaya aid hissəsinin yerinə yetiriləcəyi təqdirdə, Moskvanın təşəbbüsə geri qayıda biləcəyini söyləyib.
Rusiya Xarici İşlər Nazirliyinin nümayəndəsi Mariya Zaxarovanın sözlərinə görə isə, rəsmi Moskva 2023-cü il iyulun 17-də Türkiyə və Ukrayna tərəflərini, həmçinin BMT katibliyini “Qara dəniz taxıl təşəbbüsü”nün uzadılmasına etiraz etdiyi barədə məlumatlandırıb.
Yeri gəlmişkən, bu günlərdə Moskvada keçirilən “Rusiya-Afrika sammiti”ndə əsas müzakirə mövzularından biri məhz “qara qitə” ölkələrinin kəskin ərzaq çatışmazlığı problemi olub. Rusiyanın dövlət başçısı Afrikanın bir çox yoxsul ölkələrinə güzəştli qiymətlərlə buğda və taxıl satılacağını bildirib.
Sankt-Peterburqda təşkil edilən “Rusiya-Afrika sammiti”ndə bu il əvvəlki tədbirlə müqayisədə daha az sayda (43-ə qarşı 17 dövlət) Afrika lideri qatılıb. Afrika İttifaqının rəhbəri Azali Assumani “taxıl sazişi”nin dayandırılmasının Afrika ölkələrinin Moskva ilə münasibətlərinə təsir edəcəyini bildirib.
Sazişin dayandırılması dünyanın əksər ölkələrində mənfi reaksiya doğrurub. Məsələn, mövzu ilə bağlı açıqladığı son hesabatında Böyük Britaniya kəşfiyyatı Rusiyanın “taxıl sazişi”ni dayandırmasının Afrika ölkələrinin azı iki il taxıl, ərzaq qıtlığı yaşamasına gətirib çıxaracağını bildirib.
Hesabatda həmçinin deyilir ki, bu addım, eyni zamanda dünya bazarında taxılın qiymətinə təsir edəcək və kasıb Afrika ölkələrinin alıcılıq qabiliyyətini daha da aşağı salacaq. Xüsusilə Efiopiya, Keniya, Somali və Sudan kimi ölkələrin aclıqdan əziyyət çəkəcəyi proqnozlaşdırılır.
Misir Prezidenti Əbdülfəttah əs-Sisi Sankt-Peterburqda keçirilən “Rusiya-Afrika sammiti”ndə bildirib ki, taxıl dəhlizi ilə bağlı sazişin yenilənməsi Afrika ölkələri üçün həyati əhəmiyyətə malikdir.
“Əl Əhram” nəşri xəbər verir ki, Misir Prezidenti Rusiyanın dayandırdığı taxıl anlaşması ilə bağlı deyib: “Bu məsələdə razılıq əldə olunmasını səbirsizliklə gözləyirik. Sazişin yenilənməsi həm Afrika ölkələrinin aclıq fəlakətindən xilası, həm də qiymətlərin artmasının qarşısının alınması baxımından mühümdür. Misir bu problemin həllində vasitəçilik etməyə hazırdır”.
Dünyada hökm sürən mövcud şərtlərin Afrika ölkələrinə böyük problemlər yaratdığını diqqətə çatdıran əs-Sisi sonra bildirib ki, qlobal kataklizmlər qitənin təhlükəsizliyini və gələcək nəsillərin hüquqlarını təhdid edir.
Onun sözlərinə görə, Afrika dövlətləri öz suverenliyini möhkəmləndirməyə və hüquqlarını qorumağa, eyni zamanda, tez-tez baş verən münaqişələrin qarşısını almağa çalışır. “Hazırkı qlobal böhranların fonunda ərzaq məhsulları və enerjidaşıyıcılarının qiymətlərində yüksək artım qitə ölkələrinə çox mənfi təsir göstərir”, -deyə Misir Prezidenti vurğulayıb.
Rusiya lideri Seneqal Prezidenti Maki Sall ilə görüşdə vurğulayıb ki, ötən ildən Qara dənizdə taxıl sazişinin dayandırılmasının səbəbkarı Rusiya deyil, əksinə, Ukrayna və onu dəstəkləyən güclərdir. V.Putinin fikrincə, Afrika bu gün yeni güc mərkəzinə çevrilir və qitə ölkələri ilə sıx əməkdaşlıq Rusiya Federasiyasının maraqları daxilindədir.
Sazişin bağlanmasında vasitəçilik edən Türkiyə Prezidenti Rəcəb Tayyib Ərdoğan məsələ ilə bağlı rusiyalı həmkarı Vladimir Putinlə danışıqlar aparacağını bildirib. "Vladimir Putinlə “Taxıl sazişi”nin uzadılmasını yenidən müzakirə edəcəyik. Putinin “taxıl sazişi”nin uzadılmasını istədiyini bilirəm”, - Ərdoğan deyib. Lakin sonrakı günlər Kremlin sazişə qaytımaq istəmədiyi bəlli olub.
Bütün bunlara rəğmən, “taxıl sazişi”nin yenidən fəaliyyətə başlayacağına olan ümidlər tam bitməyib. Dünyanın işıqlı, xeyirxah insanları hələ də inanırlar ki, Ukrayna taxılının Qara dəniz vasitəsilə dünya bazarlarına çıxarılması üçün yaxın günlər ərzində danışıqlar yenidən bərpa oluna bilər.
Babakişi QULİYEV,
kənd təsərrüfatı elmləri namizədi, aqrar sahə üzrə ekspert
– Türkiyə Prezidenti hörmətli Rəcəb Tayyib Ərdoğanın təşəbbüsü ilə imzalanan və son bir il ərzində uğurla fəaliyyət göstərən “taxıl sazişi”nin təkcə dünyada buğda istehsalçıları və ixracatçıları üçün deyil, bütövlükdə planetimizdə ərzaq təhlükəsizliyinin təmin edilməsi üçün böyük əhəmiyyəti var. Təəssüf ki, sənədin icra müddətini artırmaq hələlik mümkün olmayıb.
Mən dəfələrlə Ukraynada olmuşam, bu gözəl və dost ölkədə fəaliyyət göstərən alim və təsərrüfat rəhbərləri səmimi və işgüzar görüşlərim olub. Hələ sovet dövründə Ukrayna taxılın vətəni sayılırdı. Bu ölkədə yüksək məhsuldar buğda sortları yetişdirilir və uğurla becərilirdi.
Təəssüf ki, il yarımdır ki, Ukrayna torpağında müharibə davam edir. Bu, dağıdıcı və heç bir tərəfə fayda gətirməyən müharibədir. Artıq on səkkizinci aydır ki, Ukrayna ərazisində ağır döyüşlər gedir. Hər iki tərəfdən on minlərlə insan həlak olub. Ukraynanın onlarla şəhəri, yüzlərlə kəndi dağıdılıb, əhalinin az qala dörddəbiri qaçqın və köçkünə çevrilib. Bütün bunların qarşısı alınmalıdır.
O ki qaldı, taxıl sazişinin pozulması məsələsinə, bunu son vaxtlar qlobal geosiyasi müstəvidə yaranan yeni vəziyyətlə izah etmək olar. Rusiya-Ukrayna müharibəsi artıq həlledici mərhələyə daxil olub. Tərəflərin heç biri güzəştə getmək istəmir. Ukraynanın öz taxılını beynəlxalq bazarlara çıxararaq xeyli gəlir qazanması Rusiyaya sərf etmir. Moskva hər vəchlə Ukraynanın maliyyə vəsaitlərini tükəndirmək niyyətindədir.
Sonda qeyd etmək istərdim ki, “taxil sazişi”nin pozulması dünyanın yoxsul ölkələrinin əhalisinə, xüsusilə Afrikada əhalinin rifahına olduqca mənfi təsir göstərəcək. Bu il iyulun 27-28-si tarixlərində Sank-Peterburqda keçirilən “Rusiya-Afrika sammiti”ndə də bu problem gündəmdə idi. Təəssüf ki, böyük güclər bu vacib məsələdə hələ də ümumi dil tapa bilmirlər.
Məsaim ABDULLAYEV, “Xalq qəzeti”