Bu günlərdə Türkiyə Prezidenti Rəcəb Tayyib Ərdoğanın mətbuat katibi İbrahim Kalını Milli Kəşfiyyat Təşkilatının (MİT) rəhbəri təyin etməsi dünya mətbuatında geniş işıqlandırılır. Bu xəbər çoxları üçün gözlənilməz olub. Yunanıstan və Britaniya mətbuatı Kalın haqqında yazarkən onu “Ərdoğanın çoxdankı sirdaşı” adlandırıblar.
Qeyd etmək lazımdır ki, İbrahim Kalın parlaq publisistik qələmə malik olan ziyalılardandır. Onun şərq və qərb fəlsəfəsini və mentaliteini birləşdirən və fərqləndirən bir çox cəhətlər barədə bir neçə maraqlı essesini oxumuşam. Sözün doğrusu, Kalının kəşfiyyata başçılıq edəcəyini ağlıma belə gətirmirdim.
Amma, çağdaş dünyanın ən müdrik siyasətçilərindən olan Rəcəb Tayyib Ərdoğan bilir nə edir. Görünür, bu gün İ.Kalın məhz MİT rəhbəri kimi ölkəsinə daha çox fayda verə bilər. Cənab Kalın sayın R.T.Ərdoğanın 2003-cü ildən bəri baş nazir və prezident kimi fəaliyyəti dövründə MİT-ə rəhbərlik etmək üçün qurumdan kənardan təyin edilən ikinci mülki məmurdur.
Londonda nəşr olunan “Middle East Eye” (MEE) nəşri “Ərdoğan sözçüsü Kalını kəşfiyyat rəhbəri təyin etdi”, -başlıqlı xəbərində İ.Kalını “Ərdoğanın çoxdankı sirdaşı” adlandırıb. İ.Kalının 2014-cü ildən prezidentin sözçüsü və prezidentin xarici siyasət müşaviri vəzifələrində çalışdığını xatırladan nəşr qeyd edib ki, MİT-in yeni şefinin doktorluq dərəcəsi var.
“Əhəmiyyətli məsələlərin həllində zaman-zaman R.T,Ərdoğanın xüsusi nümayəndəsi kimi təmasda olan İ.Kalın, xüsusilə, son zamanlar ABŞ-la münasibətlərin aparılmasında alternativ kanal kimi gündəmə gəlib”,- deyə nəşr xatırladıb.
İbrahim Kalın ingilis dilini əla bilir. Bu faktəı qeyd etməklə yanaşı, “Əl-Ərəbiyyə” kanalı Kalının 2014-cü ildən bu yana prezidentin sözçüsü vəzifəsini icra etdiyinə diqqət çəkib. “Kalın Türkiyə prezidentinin sözçüsü kimi, xüsusilə Suriya münaqişəsi kimi böhranlı vəziyyətlərdə ölkənin xarici siyasətinin istiqamətləndirilməsində mühüm rol oynayıb. Qonşu ölkədə artan gərginliklə üzləşən Türkiyə humanitar mövqeyini təhlükəsizlik maraqları ilə diqqətlə balanslaşdırmağa məcbur oldu. İ.Kalın atəşkəs sazişləri bağlamaq və sülhə başlamaq üçün Rusiya, ABŞ və İran kimi böyük güclərlə koordinasiya prosesinin mərkəzində yer alıb”,- kanalın şərhçisi qeyd edib.
İ.Kalının MİT-ə rəhbər təyin olunması Yunanıstanda sensaasiyalı xəbər kimi qarşılanıb. Bu ölkədə nəşr olunan “Kathimer” İ.Kalının MİT-in rəhbəri təyin edilməsini qeyd etməklə yanaşı, türk kəşfiyyatını idarə edəcək Kalından sitat gətirib: “Gözəl ölkəm üçün dayanacaq yoxdur, davam et...”. “Skai” nəşri isə yazır ki, Ərdoğanın “sağ əli”, güvəndiyi adam bundan sonra Türkiyə xüsusi xidmətinin iplərini yerindən oynadacaq.
Qlobal mediada Kalının İsveç və Finlandiyanın NATO-ya üzv olması prosesində ən fəal rol oynayan türk rəsmisi olması, hər iki ölkə ilə təmasda olan və 2022-ci ilin iyununda qurulan ortaq daimi mexanizm iclaslarında Türkiyə nümayəndə heyətinə rəhbərlik etməsi, bu proseslərdəki roluna xüsisi diqqət çəkilir.
Almaniyanın populyar “Spiegel” qeyd edib ki, Türkiyə Prezidenti Ərdoğan seçkilərdə qələbə qazandıqdan sonra, demək olar ki, bütün kabinet vəzifələrinə yeni kadrlar təyin edib. Yeni komandanın artıq fəaliyyətə başladığı vurğulanır.
P.S. Dünən Prezident R.T.Ərdoğanın sədrliyi ilə Türkiyə hökumətinin yeni tərkibdə ilk iclası keçirilib. Tədbirdə qarşıda duran mühüm vəzifələr müzakirə olunub.
M.HACIXANLI, “Xalq qəzeti”