Türkiyə Prezidenti Rəcəb Tayyib Ərdoğan NATO-nun baş katibi Yens Stoltenberq ilə görüşüb. Tərəflər İsveçin alyansa qəbulu məsələsini müzakirə ediblər. Ankara bir ildən artıqdır ki, İsveçin NATO-ya üzvlüyünə qarşı çıxır və öz mövqeyini Stokholmun Türkiyədə qadağan olunmuş Kürdüstan Fəhlə Partiyasına dəstək verməsilə əsaslandırır.

“İsveç Türkiyənin narahatlığını aradan qaldırmaq üçün əhəmiyyətli addımlar atıb. Bunlara İsveç konstitu­siyasında dəyişiklik edilməsi, silah em­barqosunun dayandırılması və terrora, o cümlədən PKK-ya qarşı əməkdaşlığın gücləndirilməsi daxildir. Bir neçə gün əvvəl terrora qarşı yeni mühüm qanun qəbul edildi. Beləliklə, İsveç öz öhdəli­klərini yerinə yetirdi. Türkiyənin NA­TO-nun Vilnüs sammitinə qədər İsveçin ərizəsini ratifikasiya etməyə hələ də imkanı var ”, – deyə Yens Stoltenberq bildirib.

Stoltenberq onu da qeyd edib ki, Prezident Ərdoğanla danışıqlarda İs­veçlə Daimi Müştərək Mexanizmin növbəti görüşünün iyunun 12-də keçirilməsi ilə bağlı razılığa gəlinib. 

Bu arada politoloq Stanislav Bışok Stokholmun Şimali Atlantika Alyansına qoşulmaq üçün müraciətinə Ankaranın mövqeyini dəyərləndirib. O deyib: “NATO və NATO üzvlüyünü fetişləşdir­məyə ehtiyac yoxdur. Siz NATO-nun üzvü olmaya, lakin hələ də alyansın təhlükəsizlik çətiri ilə əhatə oluna bilər­siniz. Bu təhlükəsizlik çətiri artıq İsveç üzərində açılıb. ABŞ və digər ölkələr İsveçə təhlükəsizlik zəmanəti verib. O indi özünəməxsus vəziyyətdədir: hərbi baxımdan başqa ölkələrə heç bir borcu yoxdur və NATO-nun əsas ölkəsi ABŞ artıq ona digər NATO üzvü olan ölkələrə verdiyi təminatları verir. Türkiyənin İs­veçin alyansa daxil olmasına razılıq verməsi artıq formallığa çevrilib”.

Y.Stoltenberq Prezident Ərdoğan­la İsveçin NATO-ya daxil olması ilə bağlı danışdığı bir vaxtda PKK tərəf­darları Stokholmda nümayiş keçiriblər. Əllərində PKK/YPG-ni simvolizə edən plakatlar və Abdullah Öcalanın şəkillərini daşıyan terror təşkilatı tərəfdar­ları Türkiyə Prezidenti Rəcəb Tayyib Ərdoğana qarşı şüarlar səsləndiriblər. Sonra polisin müşayiəti ilə İsveç parla­mentinin qarşısınadək yürüş ediblər. 

Türkiyə ilə NATO arasında müzakirə edilən məsələlərdən biri də Kosovoda Türkiyə Müdafiə Nazirliyinin NATO-nun tələbi ilə xüsusi təyinatlılardan ibarət tabor yerləşdirməsidir. Buna Kosovo­da etnik zəmində baş verən münaqişə səbəb olub. 

NATO-nun baş katibi Prezident Rəcəb Tayyib Ərdoğanla bağlı qapılar arxasında keçirdiyi görüşdən sonra Kosovoya qoşun göndərmək qərarına görə Türkiyə hakimiyyətinə minnətdar­lığını bildirib. “Mən Türkiyəyə bölgədə­ki son iğtişaşlardan sonra Kosovonun şimalına əlavə qüvvələr göndərdiyinə görə təşəkkür edirəm” - Stoltenberq deyib.

Kosovodakı hadisələrə NATO mis­siyasının komandiri Ancelo Mişel Ris­tucci də münasibət bildirib. O deyib: “Kosovonun baş naziri Albin Kurtinin albanları serblərin çoxluq təşkil etdiyi əyalətə bələdiyyə başçıları təyin etməsi səhv addımdır. Əhali tərəfindən tanın­mayan bələdiyyə başçılarının təyinatı beynəlxalq ictimaiyyətlə məsləhətləş­mədən həyata keçirilməməli idi. Prişti­na hökumətinin ikinci birtərəfli hərəkəti bizimlə məsləhətləşmədən güc tətbiq etməsi oldu ki, bu da bizim müdaxilə­mizi zəruri etdi, əlavə qüvvələr yerləş­dirildi ”.

Bu qüvvələrdən biri də Türkiyə xü­susu təyinatlılardan ibarət tabordur. Hazırda tabor xidməti vəzifəsini yerinə yetirir.

Pünhan ƏFƏNDİYEV “Xalq qəzeti”