Lənkəran

“Cənub mirvarisi” adlanan şəhər­də kütləvi bayram ovqatı ilk olaraq ağacəkmə kampaniyası zamanı du­yulub. Şəhər rəhbərliyinin və Regional Ədliyyə İdarəsinin birgə təşkilatçılığı ilə baş tutan kampaniyada 100 sərv ağa­cı əkilib.

Silsilə tədbirlər davam edib. Heydər Əliyev Mərkəzində uşaqlar üçün “Nov­ruz çələngi” adlı şənlik təşkil olunub. Sərgi-satış yarmarkasında peşə tə­mayüllü siniflərin şagirdlərinin əl işləri təqdim olunub. Tədbirdə Novruzun at­ributları olan Kosa və Keçəlin çıxışları, peşə təmayüllü siniflərin təqdim etdiyi rəqs, şeir və səhnəciklər xoş bayram əhvali-ruhiyyəsi yaradıb. Toplanan və­sait ənənəyə uyğun olaraq, uşaq evlə­rinə sərf ediləcək. 

Lənkəran Dövlət Dram Teatrında “Gəl baharım, gəl yazım” adlı Novruz tamaşası göstərilib. “Bahar ətirli Nov­ruzum” adlı möhtəşəm konsert proq­ramı və festival isə Lənkəran şəhər Mədəniyyət Mərkəzində təşkil olunub. Sakinlərin elliklə iştirak etdikləri tədbir çərçivəsində, həmçinin sənətkarlıq, folklor, yaradıcılıq və diyarşünaslıq nü­munələri nümayiş olunub. 

Rayonun bütün mədəniyyət müəs­sisələrinin, ümumtəhsil məktəblərinin kollektivləri də maraqlı bayram tədbir­ləri keçiriblər. 

Masallı 

“Gənclər Evi”nin qarşısında milli ruhumuzu və yaddaşımızı bütün zən­ginliyi ilə özündə əks etdirən maraqlı Novruz şənliyi keçirilib. Masallı ra­yon Gənclər və İdman İdarəsinin rəisi Sabiq Cahangirov, Masallı Regional Mədəniyyət İdarəsinin rəisi Bəxtiyar Qılıncov və başqaları iştirakçılara Nov­ruz bayramı münasibətilə təbriklərini çatdırıblar. Novruz personajları Kosa ilə Keçəlin çıxışları, uşaq bağçalarının balaca sakinləri tərəfindən təqdim olu­nan səhnəciklər, səsləndirilən şeirlər, yumurta döyüşləri, Yusif Əzizlinin təq­dimatında “Xudayar təsnifi”, Azərbay­canı tərənnüm edən mahnılar şənliyə xüsusi rəng qatıb. Sonda Masallı rayon Qadın Resurs Mərkəzinin üzvləri tərə­findən eko-çantaların üzərinə rəngli boyalarla şəkillər çəkilərək iştirakçılara hədiyyə edilib.

Xalqımızın xeyirxahlıq, mehribanlıq və qonaqpərvərlik kimi gözəl hisslərini tərənnüm edən Novruz bayramı mü­nasibətilə Masallı rayon Heydər Əliyev Mərkəzində keçirilən tədbirdə isə milli adət-ənənələrin gələcək nəsillərə ötü­rülməsinin və milli-mənəvi dəyərləri­mizin qorunub saxlanmasının vacibliyi diqqətə çatdırılıb.

Lerik

Şəhərdəki Heydər Əliyev meyda­nında Novruz bayramı münasibəti ilə ümumrayon tədbiri və konsert proqra­mı keçirilib. Bayramsayağı bəzədilmiş meydana minlərlə lerikli toplaşıb.

Öncə tədbir iştirakçıları baharın gəlişini tərənnüm edən, al-əlvan bəzə­dilmiş güşələrdə Novruz atributları, ulu babalarımızdan bugünkü nəslə yadi­gar qalan qədim el sənətləri, əl işləri və xalq sənətkarlığı nümunələri ilə tanış olublar. Milli idman növlərinin nümayi­şi, Cənub mətbəxinə aid olan təamlar və şirniyyatlar, Kosa və Keçəlin məz­həkələri sakinlər tərəfindən maraqla qarşılanıb.

Şəhid atası Rəbbil Heydərov və ağsaqqal Hidayət Bəşirov bayram tonqalını alovlandırıblar. Tədbirdə çıxış edənlər müqəddəs bayram münasibə­tilə rayon sakinlərini və çoxsaylı qo­naqları təbrik edib, hər bir ailəyə bol ruzi, xoşbəxtlik və səadət arzulayıblar. Respublikanın tanınmış incəsənət us­talarının çıxışı bayramı daha da röv­nəqləndirib. 

Cəlilabad 

Rayon İcra Hakimiyyəti və Ma­sallı Regional Mədəniyyət İdarəsinin Cəlilabad rayonu üzrə nümayəndəliyi­nin birgə təşkilatçılığı ilə Heydər Əliyev Seyrəngahında keçirilən ümumrayon şənliyində tonqal ətrafına ictimaiyyətin çoxsaylı nümayəndələri toplaşmışdılar. 

Bayram tədbirində rayon rəsmiləri, hüquq-mühafizə orqanlarının, idarə, müəssisə və təşkilatların rəhbərləri, şəhid ailələri, qazilər də iştirak edirdilər. Əvvəlcə xalqımızın qədim ənənələrini, dəyərlərini, mətbəxini, məişətini əks etdirən pavilyonlara baxılıb, həmçinin məktəbəqədər və orta ümumtəhsil müəssisələri özfəaliyyət dərnəkləri­nin, rəqs və mahnı qruplarının folklor nümunələri və idmançıların nümunəvi çıxışları təqdim olunub. 

Tədbir rayonun incəsənət ustaları və mədəniyyət kollektivlərinin iştirakı ilə geniş proqramlı bayram konserti ilə sona çatıb.

Neftçala

Rayon icra hakimiyyətinin təşki­latçılığı və Biləsuvar Regional Mədə­niyyət İdarəsinin dəstəyi ilə Neftçala rayonunda müsəlman dünyasının hər il böyük sevinc və təntənə ilə qeyd et­diyi, qədim tarixi keçmişə malik Novruz bayramı geniş qeyd olunub.

İcra hakimiyyətinin rəhbərliyi və qonaqlar öncə məktəblilərin Novruz bayramına həsr etdikləri rəsm əsərlə­rinə və adət-ənənələrimizi özündə əks etdirən sərgiyə baxış keçiriblər.

Tədbirdə Novruz şənliklərinin ölkə­mizdə daim böyük coşğu ilə keçirildiyi vurğulanıb. Minnətdarlıqla xatırlanıb ki, Novruzun ölkəmizdə dövlət sə­viyyəsində qeyd olunması Azərbay­can xalqının ümummilli lideri, ulu ön­dər Heydər Əliyevin adı ilə bağlıdır. Prezident İlham Əliyev hər zaman bu adət-ənənələrin davam etdirilmə­sinə xüsusi diqqət göstərib. Bayramın özəllikləri haqqında tədbir iştirakçıları­na geniş məlumat verilib. Şənlik mə­dəniyyət kollektivlərinin hazırladıqları kompozisiyalar və müxxtəlif musiqilərlə davam edib.

Əli ƏLİYEV, “Xalq qəzeti”