DOST Rəqəmsal İnnovasiya Mərkəzi Naxçıvan Muxtar Respublikası Dövlət Sosial Müdafiə Fondunun uşağın anadan olmasına görə birdəfəlik müavinəti müraciət olmadan ödəməsini təmin edib.
Fonddan verilən məlumata görə, martın 1-dən sosial sahədə müavinətlərin proaktiv (müraciətsiz) təyinatı və ödənişi ilk olaraq muxtar respublikada həyata keçirilir. Müraciət edilmədən müavinətlər yalnız Mərkəzləşdirilmiş Elektron İnformasiya Sistemində son 1 ildə məcburi dövlət sosial sığorta haqqı qeydə alınanlara ödəniləcək. Bu xidmət vasitəsilə müavinətin təyin edilməsi və ödənilməsi bu il fevralın 1-dən sonra doğulan uşaqların ana-atalarına şamil ediləcək.
Uşağa doğum haqqında şəhadətnamə verildikdən sonra Ədliyyə Nazirliyi Mərkəzi İnformasiya Sisteminə müvafiq məlumat ötürəcək və buna uyğun olaraq fond müavinətin ödənilməsini həyata keçirəcək. Təyinat aparıldıqdan sonra ödənişin hansı bankdan götürülməsi barədə bildiriş isə onu alan şəxsin müvafiq sistemdən götürülmüş telefon nömrəsinə göndəriləcək.
Yaxın aylarda fondun bütün müavinətləri sığortaedənlərin təqdim etdiyi elektron sənədlər əsasında ödəniləcək.
Səbuhi HƏSƏNOV,
“Xalq qəzeti”