Rumıniyanın paytaxtı Buxarestdə güləş üzrə U-23 Avropa çempionatı davam edir. Yarışın üçüncü günündə qadın güləşi üzrə millinin 3 üzvü mübarizəyə qoşulub. Azərbaycan Güləş federasiyasınıın mətbuat xidmətindən aldığımız məlumata görə, 50 kq çəki dərəcəsində mübarizə aparan Şəhanə Nəzərova moldovalı Mariya Leordaya 10:0 hesabı ilə qalib gəlsə də, dörddəbir finalda litvalı Qabija Diliteyə məğlub olub.
Digər təmsilçimiz 55 kq çəkidə mübarizə aparan Elnurə Məmmədova isə polşalı Angelika Mitkovskaya 12:1 hesabıyla qalib gəlsə də, dörddəbir finalda isveçli Emma Malmqrenə məğlub olub. Rəqib finala yüksəldiyi üçün Elnurə bürünc medal uğrunda moldovalı Mihaela Samoillə güləşib. Rəqibinə 14:7 hesabıyla qalib gələn Məmmədova Avropa üçüncüsü olub.
Nigar Mirzəzadə (68 kq) isə ilk mərhələdə slovakiyalı Suzanna Molnara məğlub olub. Rəqib finala yüksəldiyi üçün Nigar təsəlliverici görüşə çıxıb və polşalı Karolina Kozlovskaya 4:2 hesabı ilə qalib gəlib. Ancaq bürünc medal uğrunda qarşılaşmada macarıstanlı Karolina Poka (2:10) uduzan Mirzəzadə qitə birinciliyini 5-ci pillədə başa vurub.
Daha bir qadın güləşçimiz 65 kq çəkidə mübarizə aparan Birgül Soltanova təsnifat mərhələsində bolqarıstanlı Gergana Stoyanovaya 3:0 hesabı ilə qalib gəlib. Millimizin üzvü daha sonra yunanıstanlı Drosula Tzianakopulonu “tuş”la məyus edərək adını yarımfinala yazdırıb. Soltanova bu mərhələdə fransalı İris Tiboksdan güclü olub - 6:3. O, finalda rumıniyalı Amina Kapezani sınağa çəkəcək.
Elçin AĞAMİRZƏ,
“Xalq qəzeti”