Elm və Təhsil Nazirliyinin təşəbbüsü, Elm və Ali Təhsil üzrə Dövlət Agentliyi və Bakı Dövlət Universitetinin birgə təşkilatçılığı ilə ali təhsil müəssisələri və elmi-tədqiqat institutları rəhbərlərinin görüşü keçirilib. 

Toplantını açıq elan edən BDU-nun rektoru Elçin Babayev qloballaşan dün­yada ali təhsil sistemində innovasiyaların tətbiqi ilə bağlı yeni yanaşmalardan da­nışıb. O qeyd edib ki, hər bir ölkənin icti­mai, siyasi, iqtisadi, hərbi təhlükəsizliyin­də milli kadrların danılmaz rolu var. Odur ki, zamanın çağırışlarına cavab verilməsi baxımından bu tədbir mühüm əhəmiyyət daşıyır. 

Elm və Ali Təhsil üzrə Dövlət Agent­liyinin İdarə Heyətinin sədri Ülkər Sətta­rova da tədbirin önəminə diqqət çəkərək, ali təhsilin elmsiz mümkün olmadığını vurğulayıb. O, rəhbərlik etdiyi qurumun ölkədə elm və təhsilin daha da inkişaf et­dirilməsi, elmin maliyyələşməsinin mexa­nizmləri üzərində çalışdığını diqqətə çat­dırıb. 

BDU-nun məzunu hazırda Türkiyənin Bilkənt Universitetinin professoru, Na­notexnologiya Elmi Mərkəzinin baş elmi işçisi olan fizika-riyaziyyat elmləri dokto­ru, Azərbaycan Respublikasının Dövlət mükafatı laureatı, Əməkdar elm xadimi Əmirulla Məmmədov tədbirdə "XXI əsr­də Azərbaycanın ali təhsil sistemi və in­novasiyalar" mövzusunda məruzə edib. Ölkəmizdə ali təhsilin bu günü və gələcə­yini dəyərləndirən natiq bildirib ki, təhsil cəmiyyətin yenidən formalaşdırılmasının ən güçlü vasitəsidir. Yenilikləri öyrənmə­yimizə, dünyanı daha yaxşı anlamağımı­za və gələcəkdə inkişaf imkanımızın yük­səlməsinə gedən yol bilavasitə təhsildən keçir. 

Professor ABŞ, Böyük Britaniya, Avstraliya, Kanada, Yeni Zelandiya, İrlan­diya və İsveç kimi ölkələrin təcrübələrini misal gətirərək qeyd edib ki, universitet­lərin elmi fəaliyyəti əsas nüfuz göstəri­cilərindəndir. O, dünyadakı təhsil tipləri və müasir universitet modelləri haqqında fikirlərini diqqətə çatdırıb, Azərbayca­nın ali təhsil sisteminin daha da inkişaf etməsi ilə bağlı təkliflərini səsləndirib. Azərbaycanda 4 fərqli universitet modeli yaratmağı təklif edən alim deyib ki, xüsu­si statusu, fərqli büdcəsi və muxtariyyəti olan Dövlət Əhəmiyyətli Tədqiqat Univer­sitetinin (DƏTU) yaradılması ali təhsilin inkişafına töhfə verə bilər. 

Tədbirdə Milli Məclisin Elm və təhsil komitəsinin sədri Bəxtiyar Əliyev, Mo­lekulyar Biologiya və Biotexnologiyalar İnstitutunun direktoru İradə Hüseynova, Neft-Kimya Prosesləri İnstitutunun direk­toru Vaqif Abbasov, Azərbaycan Respub­likasının Prezidenti yanında Ali Attestasi­ya Komissiyasının Aparat rəhbəri Gülarə Tağızadə, Sumqayıt Dövlət Universite­tinin rektoru Rüfət Əzizov, Azərbaycan Dövlət İqtisad Universitetinin prorektoru Neman Muradlı, Aşqarlar Kimyası İnsti­tutunun direktoru Vaqif Fərzəliyev, Dövlət Gömrük Komitəsi Akademiyasının rekto­ru Qulu Novruzov mövzu ilə bağlı fikirlə­rini bildiriblər. 

XQ