“Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı” çərçivəsində Azərbaycanın hüdudlarından kənarda oxuyan tələbələr diplom aldıqdan sonra yüksək ixtisaslı mütəxəssislər kimi Vətənə qayıdıb, siyasi, iqtisadi, social, elm, təhsil və sair sahələrdə çalışacaq, ölkənin tərəqqisinə layiqli töhfələr verəcəklər. Xaricdə qalan gənclərimiz isə orada Azərbaycan adını ucaltmaq, millətimizə şərəf gətirmək əzmindədirlər. Onlardan bir neçəsinin ürək sözlərini təqdim edirik.
Yüksək təqaüdlə Avropada bir neçə universitetə qəbul olunan Şəms Humay Nəsibzadə:
– Amerika Birləşmiş Ştatlarında (ABŞ) təhsil almaq mənim uşaqlıq arzum idi. Buna görə də öz üzərimdə ciddi çalışaraq, Bakı Slavyan Universitetinin nəzdindəki məktəb–lisey kompleksində təhsilimi fərqlənmə ilə başa vurdum. Qəbul dəvəti çox ölkədən gəlib. ABŞ, Türkiyə, Macarıstan, Belçika və Finlandiyada ödənişsiz, təqaüdlü təhsil hüququ qazanmışam. Hər biri üçün xarici dil bilgisindən imtahan və müsahibə verdim. Bununla yanaşı, riyaziyyat və məntiq fənlərindən də imtahan verdim. “Türkiyə bursları” təqaüd proqramında xüsusilə çətin oldu. Boğaziçi Universitetini seçdim, çünki məqsədim gələcəkdə ABŞ-da təhsil almaqdır. İki il Boğaziçi təhsilindən sonra oradan da ABŞ-a rahat gedə biləcəyəm. Kompüter mühəndisliyi üzrə təhsil alacaq, magistraturanı da ABŞ-da oxuyacağam.
Bakı Dövlət Universitetinin (BDU) nəzdində “Gənc istedadlar” liseyinin ötənilki məzunu, Sinqapur Milli Universitetinin tələbəsi Nəriman Şirinli:
– Xaricdə təhsil imkanı qazanan gənclərin hansı hissləri keçirdiklərini yaxşı bilirəm. Çünki özüm artıq 2-ci ildir ki, bu xoşbəxtliyə nail olmuşam. Beynəlxalq və yerli olimpiadalarda qalib gəlmişəm, hazırda Sinqapurda kimya mühəndisliyi ixtisası üzrə təhsil alıram.
Sinqapur Milli Universiteti xarici tələbələr üçün çoxlimitli bir ali təhsil ocağıdır. universitetdir. Hər bir xarici universitetdə olduğu kimi, Sinqapur universitetində də təhsildə müəyyən fərqliliklər var. Məsələn, dərslərin keçirilmə stili fərqlidir. Elə dərslər var ki, 30 nəfər, elə dərslər də var ki, 5-6 min nəfər götürülür. Bu da bir çox mühazirələrin onlayn formada keçirilməsinə səbəb olur. Müəllimlər, professorlar bu dərsləri ya “Zoom” platforması üzərindən keçir, ya da video formatda mövzunu izah edirlər. Canlı dərslər isə 30 nəfərlik qruplar şəklində professor və ya professor köməkçisi tərəfindən keçirilir. Qiymətləndirmə sistemində də fərqliliklər var. Orada olimpiadada olduğu kimi, medal, rəqabət sistemidir. Bakalavr olmağıma baxmayaraq, araşdırmalara qatıla, bir çox laboratoriya işlərinə qoşulub, hətta elmi məqalələr də çıxara bilirəm.
Dövlət Proqramı ilə Edinburq Universitetinə qəbul olunan BDU məzunu Nihad Abbas:
– Ölkəmizi xaricdə təmsil etmək əvəzsiz duyğudur, şərəf işidir. Gözləmədiyim bir vaxtda Dövlət Proqramının üçüncü mərhələ qalibləri açıqlandı və gördüm ki, mən Böyük Britaniya və Şimali İrlandiya Birləşmiş Krallığının Edinburq Universitetinə Dövlət idarəetməsi ixtisası üzrə qəbul olunmuşam. Bu uğuruma görə özümü məzunu olduğum Heydər Əliyev adına liseyə, eləcə də fərqlənmə diplomu ilə bitirdiyim BDU-nun Beynəlxalq münasibətlər və iqtisadiyyat fakültəsinə borclu sayıram. Bu il Beynəlxalq münasibətlər ixtisasını və 94.35 ortalama ilə başa vurmuşam.
Ə.ƏLİYEV,
XQ