Azərbaycan idmanı adına növbəti uğuru multiidman yarışında ölkəmizi layiqincə təmsil edən tələbə atletlərimiz qazanıblar. Rusiyanın Yekaterinburq şəhərində keçirilən Beynəlxalq Universitet İdman Festivalında Azərbaycanın 11 təhsil ocağından 54-ü kişi, 15-i qadın olmaqla 69 idmançı iştirak edib. Yığmamız yekunda 4-ü qızıl, 8-i gümüş, 15-i bürünc olmaqla 28 medala sahib olub.
8 idman növündə yarışa qatılan komandamız medalları boks, güləş, taekvondo, sambo, üzgüçülük üzrə qazanıb. Mükafatlardan 11-i güləş, 7-si boks, 6-sı taekvondo, 3-ü sambo, 1-i isə üzgüçülüyün payına düşür.
Festivalda komandamızın əldə etdiyi nəticələrlə bağlı “Xalq qəzeti”nə açıqlama verən Gənclər və İdman Nazirliyinin sektor müdiri Aydın Məmmədov yarışda, ümumilikdə, göstəricilərin yaxşı olduğunu bildirib: “Festivalda 36 ölkənin 264 ali təhsil müəssisəsindən 3 minə yaxın tələbə idmançı 14 növdə qüvvələrini sınayırdılar. İdmançıların öz potensiallarından maksimum istifadə etmələri üçün lazımi şərait yaradılmışdı. Ölkəmizin ali təhsil müəssisələrindən 69 idmançı 8 növdə mübarizə aparıb. Komandamız, ümumilikdə, 28 medal qazandı ki, bu da yaxşı nəticədir”.
Yarışda komandamızın ilk qızıl medalını qazanan qadın güləşçi Gültəkin Şirinova (53 kq) əsas hədəfin çempionluq olduğunu bildirib: “Yığmamıza ilk qızıl medalı qazandırdığım üçün çox xoşbəxtəm. Əsas hədəf qalib adını qazanmaq idi. Birinci yeri tutmaq üçün çox çalışdım və sonda buna nail oldum.
Üzgüçülük üzrə milli komandamızın baş məşqçisi Rəşad Əbdürrəhmanov isə federasiyanın mətbuat xidmətinə açıqlamasında bildirib ki, festivalın qaydalarında edilən dəyişikliyə əsasən, turnirə Rusiyadan qatılan idmançıların sayı həddən artıq çox olub: “Əvvəlki yarışlarda hər ölkədən idman növləri üzrə yalnız iki üzgüçünün qatılmasına icazə verilirdi. Builki qaydaya əsasən, hər universitetdən iki idmançı iştirak etdi. Bu isə Rusiyanın daha çox üzgüçü ilə təmsil olunması demək idi. Yarışda mübarizə çox gərgin idi. Üzgüçümüz Ramil Vəlizadə belə çətin mübarizə şəraitində gümüş medal qazana bildi. Digər üzgüçümüz Fatimə Alkərəmova isə iki dəfə finala vəsiqə qazansa da, ilk üçlükdə yer ala bilmədi”.
Yarışda taekvondo üzrə qalib adını qazanmış Səyyad Dadaşov (54 kq) jurnalistlərə müsahibəsində uğurların davamlı olması üçün bundan sonra da öz üzərində çalışacağını bildirib: “Rəqiblər güclü olsalar da onların öhdəsindən gəldim. Qalib adını qazanmaq gözəl hissdir. Bunun üçün hazırlığın yüksək olmalıdır. Sevinirəm ki, yarışın baş mükafatını qazandım”.
Onun komanda yoldaşı, gümüş mükafatçı Eltac Qafarov (80 kq) yarışın gərgin, lakin maraqlı mübarizə şəraitində keçdiyini bildirib: “Rəqiblərimiz güclü idi. Ölkəmizin bayrağını dalğalandırdığım üçün sevincliyəm. Gələcəkdə qızıl medal qazanacağıma inanıram və buna üçün bütün qüvvəmi səfərbər edəcəyəm”.
L.QURBANOVA,
XQ