Gənclər Fondu, Gənclərin İnkişaf və Karyera Mərkəzi və “Gənc könüllülər”in birgə təşkil etdiyi “Səyyar gənclər xidməti” 2 aya yaxındır ki, bölgələri dolaşır. Layihənin növbəti icra ünvanı Masallı olub.
Ucqar kəndlərdə yaşayan gənclərin xidmət və proqramlara əlçatanlığının artırılmasına, bununla bağlı maarifləndirməyə, eləcə də gənclərin sosial fəallığının dəstəklənməsinə yönəlmiş bu aksiya cənub rayonunda 5 gün davam edəcək. Masallı şəhər Sakit Tağıyev adına 4 nömrəli tam orta məktəbdə keçirilən açılış mərasimində rayon icra hakimiyyətinin başçısı Araz Əhmədov və Gənclər Fondunun icraçı direktoru vəzifəsini icra edən Qədir Xəlilov layihənin əhəmiyyətini vurğulayıblar. Onlar gəncləri dövlətin yaratdığı imkan və fürsətlərdən fəal yararlanmağa çağırıblar.
Sonra yerli gənclərin musiqili çıxışlarının sədaları altında STEAM formatlı innovativ sərgiyə baxış olub. Süni intellekt alətləri ilə “Yaşıl dünya naminə həmrəylik ili”nə həsr edilmiş ekoloji təsvirlər və rəsm əsərləri nümayiş etdirilib. Virtual eynəklə yaxın-uzaqlara səyahət təşkil edilib.
Bildirilib ki, aksiya günlərində müxtəlif xidmətlər təklif olunacaq. Xidmətlər sırasında gənclərə şəxsi anketin (CV) yaradılması öyrədiləcək, “Gənclər siyasəti və dövlətçilik”, “Zərərli vərdişlərə yox deyək”, “Peşə seçimi və karyera”, “Sağlam və təhlükəsiz həyat” mövzularında təlimlər keçiriləcək. Ucqar məntəqələrdə robototexnika, rəsmçəkmə, 3D printer və qələm, tətbiqi şəbəkə sənəti üzrə ustad dərsləri aparılacaq. Müxtəlif yarışlar, vətənpərvərlik mövzusunda “Xəmsə” intellektual oyunu təşkil ediləcək. Yarış və məşğələlərdə fərqlənən gənclər mükafatlandırılacaq.
“Səyyar gənclər xidməti” layihəsinin 5 günlük silsilə aksiyaları oktyabradək 10 şəhər və rayonu, Naxçıvanın ucqar kəndlərini də əhatə edəcək.
Ə.DOSTƏLİ
XQ
