Şabranda xalq musiqisi ənənələri sevgi ilə yaşadılır
Azərbaycan milli musiqi sənətinin inkişafında nəfəsli alətlərin xüsusi yeri var. Onların ən çox yayılmış növlərindən biri isə zurnadır. Uzun əsrlər boyu toylarda, milli güləş yarışlarında, digər el şənliklərində sazla yanaşı, qara zurnada el havaları, milli rəqslərimiz şövqlə ifa olunub. Bunlar xalq tərəfindən sevilib və bu gün də sevilir.
1956-cı ildə Şabranda yaradılan “Çıraqqala” zurnaçılar ansamblı da məhz bu ənənənin davamı kimi meydana gəlib. Ansambl Əməkdar mədəniyyət işçisi, məşhur zurna ifaçısı, mərhum Nurağa Rəhmanov tərəfindən təşkil edilmişdi. Yarandığı ilk vaxtlardan ansamblın tərkibinə Nurağa Rəhmanovla yanaşı, tanınmış zurna ifaçıları Ağası Ağasızadə, Saməddin Vahabov, Sabir Səfərov, Əhməd Ağasıyev, Ömər Əkbərov, nağaraçalan Əlibala Mürsəlov kimi sənətkarlar daxil olublar.
N.Rəhmanovun rəhbərlik etdiyi peşəkar ansambl ilk gündən böyük uğurlara imza atıb. Fəaliyyətinin bir ili tamam olanda – 1957-ci ildə ansambl II Respublika Festivalının laureatı adını qazanıb. 1958-ci ildə Bakı şəhərində keçirilən özfəaliyyət kollektivlərinin respublika baxışında isə qalib adına layiq görülüb. 1965-ci ildə Moldovada keçirilən Azərbaycan ədəbiyyatı və incəsənəti həftəsində uğurla çıxış edib. Ansamblın Türkiyədə keçirilən musiqi folklor festivalındakı çıxışı böyük coşqu ilə qarşılanıb. 1971-ci ildə Moskvada keçmiş SSRİ Xalq Nailiyyətləri Sərgisində “Çıraqqala”nın çıxışı münsiflər heyəti tərəfindən xüsusi diplom və fəxri fərmanla mükafatlandırılıb.
1973-1986-cı illərdə ansambl respublika və ümumittifaq xalq yaradıcılığı, musiqi, folklor, “Xarıbülbül” muğam festivallarında çox sayda nümunəvi çıxışlar edib. 1987-ci ildə isə “Xalq musiqi yaradıcılığının inkişafındakı xidmətlərinə və milli musiqimizin təbliğində qazandığı uğurlara görə” “Çıraqqala” ansamblına “Xalq kollektivi” adı verilib.
Ansamblın sədası hətta keçmiş ittifaq hüdudlarını da aşıb keçmişdi. 1988-ci ildə “Çıraqqala” zurnaçılar ansamblı Hindistanda keçirilən folklor festivalında Azərbaycanı uğurla təmsil edib. Həmin illərdə nağara ifaçılığında ansamblın üzvü Əlibala Mürsəlov respublikada ulduz kimi parlayırdı. Hətta nağarada çubuqla uğurlu ifasına görə o, respublika müsabiqəsində I yerə layiq görülmüşdü.
Təqdirəlayiq haldır ki, Şabran Rayon Mədəniyyət Evinin “Çıraqqala” ansamlı milli musiqimizin sənət ənənələrini bu gün də uğurla davam etdirir. 2000-ci ildən “Çıraqqala” Xalq kollektivinə artıq Rasim Ağasızadə rəhbərlik edir. Maraqlıdır ki, Rasim Ağasızadə “Çıraqqala”nın yaradıcılarından biri, tanınmış el sənətkarı, 12 yaşından ömrünün sonuna qədər bu kollektivdə çalışan Ağası Ağasızadənin oğludur.
R.Ağasızadə kollektivə rəhbərlik etdiyi uzun illər ərzində ansamblın şöhrətini qoruyub saxlamağı bacarıb və onun uğurlarını davam etdirib. Məhz bu xidmətlərinə görə ölkə Prezidentinin 2017-ci il 15 sentyabr tarixli sərəncamı ilə Rasim Ağasızadəyə “Əməkdar mədəniyyət işçisi” fəxri adı verilib.
Respublika Mədəniyyət Nazirliyi və Elmi Metodiki Mərkəzi tərəfindən “Çıraqqala” Xalq kollektivi haqqında “Folklor nümunələrimiz” adlı film hazırlanaraq kompakt diskə köçürülüb. Bundan başqa, ansamblın fəaliyyətinə həsr olunmuş sənədli film çəkilib, respublikamızın televiziya kanallarında maraqlı verilişlər hazırlanıb. Bu yaxınlarda ansambl Şəki şəhərində keçirilən “İpək yolu” beynəlxalq multikultural festivalında fəal iştirakına görə fəxri fərmanla təltif olunub.
“Çıraqqala” ansamblı ənənəvi olaraq Bakı şəhərində keçirilən Novruz bayramı şənliklərində və folklor festivallarında həmişə fəal çıxış edir. Hazırda ansamblın repertuarında “Dəvəçi rəqsi”, “Dəvəçi baharı”, “Şabran təranələri”, “Cəngi”, “Dədə Koroğlu”, “Qəhrəmani”, “Şabran yallısı”, “Dədə Ağası”, “Köçəri” və digər rəqs musiqiləri, eləcə də bir çox bəstəkar və xalq mahnıları yer alır.
Az bir vaxtdan sonra 70 yaşını qeyd edəcək ansamblın kollektivi musiqiyə olan sevgisi, zəhmət və əzmkarlığı ilə “Xalq kollektivi” adını şərəf və ləyaqətlə daşıyır, uğur qazanmağa davam edir.
Zakir BAYRAMLI,
şair-publisist
