Ruslarda adı “qarmala”, Şərqdə Suriya “rutu”, bəzi Şərq ölkələrində “qəbirotu”, “cadugər” bitkisi adlanan üzərlik, əsasən, Asiya və Qafqazda bitir. Şərq insanları bu qəribə bitkinin və toxumlarının beyinə, bədənə, ruha təsir etdiyini qədimdən müəyyən ediblər. “Təbabətin atası” İbn Sina “qarmala”nın bihuşedici, təmizləyici və ağrıkəsici təsiri olduğunu demişdir. O, özü oynaq və sinir ağrılarında bədəni “qarmala” yağı ilə yağlamağı tövsiyə edirdi.
Üzərlik hələ tam yetişib toxumları açılmamış toplanır. Qədimdə tüstüsü ilə məbədləri, evləri və xəstə insanları qara qüvvələrdən “təmizləyirdilər”. Eləcə də, üzərlik cadugərlərin, müxtəlif rituallarla məşğul olanların istifadə etdiyi bitki olub.
Alimlər üzərlik tüstüsünün, həqiqətən, sakitləşdirici, dezinfeksiyaedici təsirini sübut ediblər. Onun zökəm, qrip, malyariya, mədə-bağırsaq problemi, yaralar və qıcolmalarda, sinir xəstəliklərində faydalı olduğu bildirilir. Toxumunun dəmləməsi astma, təngnəfəslik, bronxitə kömək edir. Oynaq, revmatizm, sümük ağrılarında bitkidən isti vanna edirlər. Hələ də uşaqlar özünü narahat hiss edəndə, onlara nəzər dəydiyini düşünüb üzərlik yandırır və onun tüstüsü ilə nəzəri götürürlər.
Elmi araşdırmalara görə, bitkinin çubuqlarını yandırarkən buxar və tüstüsünün təsirindən dizenteriya, vərəm və bağırsaq çöpləri, bakteriya və virusların təsiri, xəstəliklərə yoluxma, eyni zamanda, yayılma riski azalır.
Z.HÜSEYNLİ
XQ