Samuxun Seyidlər kəndində rayon icra hakimiyyətinin rəhbərliyi, şəhid ailələri, qazilər, hüquq-mühafizə orqanlarının, idarə, müəssisə, təşkilatların rəhbərləri kənd sakinləri ilə birlikdə Yel çərşənbəsini qeyd ediblər.

Kəndin mərkəzi meydanı bayram at­ributları ilə bəzədilib. İştirakçılar meydanı gəzərək yerli uşaq musiqi məktəblərinin, məktəbəqədər tərbiyə müəssisələrinin və məktəbdənkənar təhsil ocaqlarının hazır­ladıqları bayram ovqatlı əl işləri ilə tanış olublar. Meydanda bayram tonqalı alov­landırılıb. 

Çıxış edənlər öz təbriklərini səsləndi­rib, xoş arzularını çatdırıblar. Əsrlər boyu böyük təntənə ilə qeyd etdiyimiz Novruz bayramının, çərşənbələrin xalqımıza se­vinc, xoş əhval-ruhiyyə bəxş etdiyi bildi­rilib. 

Tədbirdə Yel çərşənbəsinə aid bayatı­lar, novruz mövzusunda şeirlər və musiqi parçaları səsləndirilib. Mədəniyyət işçiləri­nin və məktəblilərin hazırladıqları konsert proqramı tədbir iştirakçılarında xoş ovqat oyadıb.

Tədbirdə, həmçinin Gəncə Qarnizonu İdeloji şöbəsi Mədəniyyət Mərkəzi ilə bir­likdə hərbi xidmətdə olan əsgərlərin ruh yüksəkliyini daha da artırmaq məqsədi ilə kütləvi hərbi vətənpərvərlik tədbiri olan “Əsgərə məktub” layihəsi də baş tutub.

Hamlet QASIMOV,
XQ-nin bölgə müxbiri Samux rayonu