“Şeyxin şəhərdə nə işi?”
Məhəmməd Hadi çox məğrur insan olub. O, hələ tələbə olanda mollalığa hazırlaşdığı halda, mövhumata qarşı ciddi çıxışlar edirdi. Bir gün mübahisə vaxtı bəziləri şəhərin, bəziləri isə kəndin şərafətli olduğunu söyləyir. Bir nəfər deyir:
– Kənd şərafətlidir, çünki şeyxlərin hamısı kənddən çıxır.
O zaman, həqiqətən, şeyxlərin, çox vaxt kəndlərdən çıxdığını, təriqətçiliyin, əsasən, kəndlərdə yayıldığını bilən M.Hadi buna işarə edərək, ona ikibaşlı cavab verir:
– Düz deyirsən, şeyx dediyin kəs kəndlərdən çıxır, onun şəhərlərdə nə işi var?
“Qadınlar bizi anlamaz”
Şeirlərində qadın azadlığını həmişə müdafiə edən M.Hadi ömür boyu evlənməyə etinasızlıq göstərmişdir. Şair ilk gəncliyində qohumlardan birinin qızını sevmiş, qızı başqasına verdiklərinə görə, o çox sarsılmışdır.
İlk eşqi onun qəlbində sağalmaz iz buraxdığından o, ailə qurmur. Dostları arasında evlənməkdən söz düşəndə şair deyirmiş:
– Allah bunların bəlalarını versin. Bu qadınlarda bizi anlayacaq baş, duya biləcək ürəkmi var?
“Bədbəxtdən nə gözləyirsən?”
Məhəmməd Hadinin yaxın dostlarından biri də A.Şaiq imiş. O, dostu Hadinin içkiyə aludə olduğunu söyləyib, onu dostcasına tənqid etdikdə, şair çox məyus olur və mütəəssir halda deyir:
– Eh, Şaiq, həyatı başdan-başa faciələrlə dolu olan bir bədbəxtdən nə gözləyirsən?
Sonra o, əlləri ilə üzünü qapayıb hönkür-hönkür ağlayır.
Z.HÜSEYNLİ
XQ
.jpg)