Bu sətirləri Respublika İncəsənət Gimnaziyasının müəllimi, sənətşünaslıq üzrə fəlsəfə doktoru, Quba şəhəri, Ərdəbil küçəsi 25-də yaşayan Ağahüseyn Abbasovun redaksiyamıza göndərdiyi məktub əsasında qələmə alırıq. Ağahüseyn müəllim yazır ki, Quba Rayon İcra Hakimiyyəti başçısının Quba şəhəri üzrə nümayəndəliyi tərəfindən 1997-ci ildə ( o zaman hələ bələdiyyələr yox idi) onun ərizəsi əsasında, yoxlanılaraq və mənzil tikintisinə ehtiyacının olduğu nəzərə alınaraq, rəsmi sənədlərlə, dövlətə rüsum ödənilməklə vətəndaşa verilmiş torpaq sahəsi 2020-ci ilin may ayında Quba Bələdiyyəsinin sədri Humayə Məmmədova tərəfindən başqa bir vətəndaşa satılmışdır. 

Halbuki, həmin ərazi məhz dox­sanıncı illərdən beton dirəklər bas­dırılaraq metal torlarla çəpərlənmiş, oraya tikinti materialları – əsasən, çay daşları gətirilmiş, tam olmasa da, ti­kinti işləri görülmüşdür. Üstəlik, həmin torpaq sahəsi hansısa çöllükdə, boş sahələrdə deyil, bilavasitə dörd tərə­fində evlər tikilmiş bir ərazidədir. Yəni bu sahənin kiminsə adında olduğunu soruşmadan, rəsmi sənədləri nəzərə almadan vətəndaşın torpağının satıl­ması birmənalı şəkildə qanun pozun­tusudur. 

A.Abbasov redaksiyamıza şikayət ərizəsi ilə yanaşı, Quba Rayon İcra Hakimiyyəti başçısının Quba şəhə­ri üzrə nümayəndəsinin ona torpaq sahəsi verilməsi haqqında 14 iyul 1997-ci il tarixli sərəncamının, müva­fiq dövlət qurumunun həyətyanı sahə (mənzil tikintisi) məqsədilə verilmiş torpağa mütəxəssis rəyinin, torpaq sahəsinin plan və ölçüsünün, rəs­mi sərəncama əsasən tərtib edilmiş “Torpağın alqı- satqı aktı”nın, müvafiq dövlət qurumu tərəfindən çəkilərək təsdiqlənmiş xəritənin, yerli bələdiyyə büdcəsinə vergi ödəyicisi olan fiziki şəxsin uçota alınması haqqında Şə­hadətnamənin, 62 min manat vəsa­itin bələdiyyə büdcəsinə ödənilməsi haqqında qəbzin arxiv idarəsi tərəfin­dən rəsmi şəkildə təsdiqlənmiş surət­lərini də göndərmişdir. 

Bundan başqa, Nazirlər Kabi­netinin “Torpaq sahəsinin ayrılması haqqında” 13 avqust 1994-cü il tarixli qərarının Quba rayonu ilə bağlı olan hissəsinin surəti də redaksiyamıza göndərilən sənədlər arasındadır. Xa­tırladaq ki, ulu öndər Heydər Əliyevin təşəbbüs və tapşırığı ilə ərsəyə gələn həmin sənəddə göstərilirdi ki, vətən­daşların mənzil-məişət şəraitinin yax­şılaşdırılması istiqamətində məqsə­dəuyğun addımlar atılsın. 

Həmin illərdə o addımlar atılmış­dı. Aradan 25 il keçəndən sonra isə vətəndaşa verilmiş torpaq sahəsi onun xəbəri olmadan başqa adama satılmışdır. Ağahüseyn müəllim onu da əlavə edir ki, bu problemlə üzləşən təkcə o deyil. Daha bir neçə şəxsin torpağı da eyni şəkildə satılmışdır və bələdiyyə sədri həmin adamların ha­mısına deyir ki, gedin, məhkəməyə müraciət edin. Əlimizdə rəsmi sənəd­lərimiz ola-ola nə üçün məhkəmələrə düşməliyik?

Bundan başqa, yerli sakinlərin dediyinə görə, məhz həmin bələdiy­yə sədri Quba Soyqırımı Memorilal Kompleksinə aid olan ərazinin bir his­səsini də satmış və orada ev tikilmişdi. Rayon rəhbərliyinin müdaxiləsi nəticə­sində memorial kompleksin ərazisin­də tikilmiş bina sökülmüş və həmin qanunsuzluq aradan qaldırılmışdır. 

Ən pisi isə odur ki, bir bələdiyyə sədrinin törətdiyi haqsızlıqları görən sakinlər məmurun şəxsi keyfiyyətləri barədə düşünmür, birbaşa dövlət­dən narazılıq edirlər. Elə bu sətirlərin qələmə alınması da məhz həmin an­laşılmazlıqların aradan qaldırılmasına xidmət edir. 

İttifaq MİRZƏBƏYLİ
XQ