Vecsizlik azarı insanı həyatdan qoparan əsas bəladır. İctimai biveclik milətin inkişafını əngəlləyir. Azərbaycan ziyalıları XX əsrin əvvələrində bu mərəzlə mübarizə aparırdılar. Təsadüfi deyil ki, M.Ə. Sabir “Millət necə tarac olur-olsun, nə işim var?!”,“Bizə nə?” kimi satiraları ilə biveclik problemini kodlaşdırmışdı. Nəcəf bəy Vəzirov ”Vay şələkküm-mələkküm” məzhəkəsi, Əbdürrəhim bəy Haqverdiyev “Millət dostları” pyesi ilə bu problemə toxunmuşdular.
Nəcəf bəyin qəhrəmanları öz ömürlərini, əsasən, meyxana künclərində keçirirdilər. Kim idi bu şəxslər? Xanmirzə bəy atasından qalan sərvəti dağıtmaqla məşğuldur. Onun ətrafında “dostlar” – Balaqardaş və Almas milli mənliyi olmayan insanlardır. Onların məskəni hiyləgər erməni işbazı Karapetin şərabxanasıdır. Karapet bu bəylərə pullarına görə “ehtiram” göstərir, onları özünün “ağa”sı hesab edir. Bəlkə də, bu bədbəxtlər içkiyə meyil ucbatından Karapetin şirin dilinə aldanaraq bu kefxanaya gəlirlər. Karapet də, çox güman ki, yaxından tanıdığına görə onlarla yeyib-içəndə həddini aşmır.
Xanmirzə bəy “Dünya beş günlükdür, ona görə də ancaq kef çəkmək lazımdır” – düşüncəsi ilə yaşayır. O, öz məsləksizliyini belə etiraf edir: “Dünyada qəribə axmaq adamlar var. Bu gün məni tutub güclə müsəlman teatrına aparmaq istəyirdilər. Nədi ki, bəs, kasıb müəllimlərə pul yığacağıq. Mən kefimdən qalacağam, nə üçün? Kasıb uşaqlara ianə üçün… Ay özün öləsən… Yeri, ha yeri”. N. Vəzirov bu sözlərlə Xanmirzə bəyin xarakterini tam açır. O öz millətinə nəinki xeyir verir, heç teatra belə getmək istəmir. Əvəzində ona, guya, ehtiram bəsləyən Karapetin meyxanasında gününü keçirir. Onun dostu Almas da, sözsüz ki, bu cür dar düşüncə sahibidir. Onun nəzərində xalqına kömək eləmək pul tələsidir.
Bu tiplər içkidən sonra əylənmək istəyirlər. Xanmirzə bəyin çürük düşüncəsi özünü burada da göstərir. Qürrələnir ki, musiqiçilər ayağına gəlib, onu əyləndirəcəklər. Bütün bu acı mənzərəni görən Xanmirzənin dayısı Ağa Əliheydər dərin təəssüf hissi keçirir. O, müsəlmanların bu halını görməkdənsə, kar–kor olmasını diləyir. Bu obraz zamanın qismən aydın baxışla ziyalısını əks etdirir. Əliheydərin Xanmirzəyə öyüd-nəsihət verməsi isə əbəsdir. Çünki o, özündə deyil, həzz düşkününə çevrilib.
Əsərin sonluğu çox acı şəkildə bitir. Daim bəylərə öz sədaqətindən dəm vuran Karapet ayılanda meyxanadan oğurluq edəcəyindən ehtiyatlanaraq, onları sürüyüb salır otağa, qapını da bağlayır. Təbii ki, burada əsas günahkar gününü boş keçirən xanmirzələrdir.
Ə. Haqverdiyev Xanmirzənin davamçısı olan tipləri ironik şəkildə “Millət dostları” adlandırır. Onlar haqqında bəhs etdiyimiz tiplərdən fərqli olaraq, təhsil alsalar da, düşüncə baxımından kasad adamlardır. Yazıçı bu əsərini 1905-ci ildə millət erməni təcavüzü ilə üzləşən zaman yazıb. Hüquqşünas Əskər bəyin ciddi bir amalının olduğu hiss edilir. O, xeyriyyə cəmiyyəti açaraq kasıb uşaqlara ucuz kitablar vermək, məktəblər açmaq istəyir. Niyyətini evdəki qulluqçu Səfiyə deyəndə düşünür ki, o anlamaz. Lakin Səfi dərhal bunun xeyirli iş olduğunu deyərək insanların ona dua edəcəyini bildirir.
Amma Əskər bəy öz niyyətini yarımçıq ziyalı olan “obrazovolski” dostlarına anlada bilmir. Çünki içki məclisləri, eyş-işrətə meyil Firudun, Səfər, Vəli kimi bəylərin həyat tərzləri olub. Misal üçün, Firudun bəy bir rus qadınla yaxınlığı ilə fəxr edir. Əskər bəy kef məclisində ciddi söhbətə cəhd edir. O, tarixə səyahət edərək, vaxtilə İslam dünyasının elmdə öndə olduğunu, indi isə Avropaya möhtac qaldığını rəfiqlərinə çatdırır. Məclisə yığışan bəylər, guya, onun söhbətinə diqqət kəsilirlər. Səfər bəy yetim günə qalmış millətə qəyyum lazım olduğunu bildirir və öz timsalında düşüncəli adam görüntüsü yaradır. Onun ən “müdrik” fikri bu olur ki, müsəlmanlar qurbanlıq qoyunların dərisini xeyriyyə cəmiyyətinə versələr, onun büdcəsi bu yolla artar.
Ə.Haqverdiyevin burada tipin simicliyini göstərir. Səfər bəy və digərləri əllərini ciblərinə salmaq istəmirlər, amma Anna kimilərinin yolunda mallarını, mülklərini fəda edirlər. Millətin düşmüş olduğu bəla bu səhnələrdə aşkar göstərilir. Vəli bəy Firudun bəyə etiraz edəndə ortaya dava düşür. Onun Səfər bəyin millətin uşaqları üçün pul xərcləməli olduğunu deməsi, sözsüz ki, etirazla qarşılanır. Bu davanı seyr edən Səfi “Bəli, İslam qabağa getdi” deyə təəssüf edir.
Toxunulan mövzu bu gün üçün də aktualdır. Bayramlarda azacıq yardım paylayıb, televiziya ilə reklam etdirmək hələ xeyriyyəçilik deyil. Dövlətin maarifə, mədəniyyətə diqqət və qayğısı öz yerində, hər kəs də bacardığı qədər tərəqqi rifahın yüksəlməsinə töhfə verməyə çalışmalıdır. İllərlə teatrların qapısını tanımamaq, amma bayağı əsərlərə, istedadsız sənət adamlarına sponsorluq etmək heç də ziyalılıq nümunəsi demək deyil, əksinə, bivecliyə zəmin yaratmaqdır.
Ceyhun MİRZƏLİ