Rusiya Federasiyasının Həştərxan şəhərində “Xəzər mövsümləri” beynəlxalq klassik sənət festivalı başlanıb. “Kultura” milli layihəsi çərçivəsində həyata keçirilən festivalın iştirakçıları 2 həftə ərzində şəhərin sakinlərini və qonaqları Xəzəryanı ölkələrin mədəniyyəti ilə tanış edəcəklər.
Tədbir Xəzəryanı dövlətlərin simfonik orkestrinin çıxışı ilə açılıb. Orkestrin heyətinə Rusiya, Qazaxıstan, Azərbaycan, Türkmənistan və İrandan 60 musiqiçi daxildir. Baş dirijor Mixail Qolikovun rəhbərliyi ilə səsləndirilən kollektiv əsərlərin ifaçıları arasında həmyerlimiz, Xalq artisti Elçin Əzizov da olub. Konsert multimedia şousu ilə müşayiət edilib.
Festival çərçivəsində dünən Həştərxan filarmoniyasında Xəzəryanı ölkələrin bəstəkarlarının 1-ci forumu keçirilib. Bu gündən etibarən isə Azərbaycan, İran, Qazaxıstan və Türkmənistan günləri keçirilməyə başlayır. Daha sonra nüfuzlu beynəlxalq müsabiqələrin gənc qalibləri Opera və Balet Teatrında çıxış edəcəklər.
***
Türk dünyasına aid olan 30-dan çox xalqın nümayəndələri arasında “VII Beynəlxalq Kaşqarlı Mahmut hekayə müsabiqəsi” elan olunub.
Müsabiqə bu ilin mart ayında TÜRKSOY-un nəzdində yaradılan Yazarlar Birliyi, UNESCO və Avropa Yazarlar Birliyinin dəstəyi ilə keçirilir.
Məqsədi türkdilli ədəbiyyat üzrə istedadlı qələm adamlarını aşkar etmək və onları dünyaya tanıtmaqdır.
Qeyd edək ki, Türkiyə Cümhuriyyətinin quruluşunun 100, TÜRKSOY-un yaradılmasının 30 illiyinə həsr olunan müsabiqədə qaliblər bir ay ərzində müəyyənləşdiriləcəklər və mükafatlandırma mərasimi dekabrın 4-də Ankarada keçiriləcək.
***
Laçında “Hocazfilm” studiyası fəaliyyətə başlayır.
Laçın səfəri ilə bağlı təəssüratını bölüşən aktyor Azər Aydəmir bu barədə jurnalistlərə açıqlamasında məlumat verib.
Aktyor deyib: “Laçın artıq kino çəkilişləri üçün ən ideal və əlverişli məkana çevrilməkdədir. Dağlar diyarının təbiəti rejissorlara orada istənilən janrda filmlər, verilişlər çəkməyə şərait yaradır”.
Studiyanın tanıtım videoçarxında çəkilmək üçün Laçına səfər etdiyini vurğulayan aktyorun sözlərinə görə, videoçarx avqustun 26-da – Laçın Şəhəri Günündə təqdim olunacaq.
Hazırladı: Ə.DOSTƏLİ, “Xalq qəzeti”