Onun vurduğu tank Hərbi Qənimətlər Parkında sərgilənir
Gənclər günündə, sağlamlığını Vətən yolunda qurban verənləri yada salmamaq olarmı? Minlərlə qazidən biri, tankist Taleh Musa oğlu Camalovu oxuculara tanıtmaq istədik.
Bu, o Taleh Camalovdur ki, “Teknofest” festivalında türkiyəli jurnalist Fulya Öztürkə müsahibə verən qazi ilə görüşən dövlət başçımız onun medallarına diqqət edərək, “Gör nə qədər medalı var. “Xocavənd”, “Cəbrayıl”, “Füzuli”, “Fərqlənməyə görə”, “Xarı bülbül”. Qəhrəmandır, bizim torpaqlarımızı azad edənlər bunun kimi qəhrəmanlardır.”– demişdi. Prezident İlham Əliyevin səmimi münasibətinə, diqqətinə cavab olaraq Taleh o görüşdə “Sizin sayənizdə, Səlcuq Bayraqdar qardaşımızın sayəsində, onların silahlı PUA-larının sayəsində”– deyə həm dövlət başçımızın, həm də qardaş Türkiyənin Qələbənin əldə edilməsindəki əvəzsiz rolunu diqqətə çatdırmışdı.
...Vətən müharibəsində hər iki ayağını qurban verən qazi 1999-cu ildə Salyanda doğulub. Onun söhbətinə qulaq asdıqca, müharibənin amansızlığına, erməni cəlladlarına bir daha lənət oxuyursan. Taleh Qələbəyə yönəlik həmin günləri xatırlayaraq deyir:
– 2017-ci ilin oktyabrında həqiqi hərbi xidmətdə olanda arada komandirlərin söhbətlərindən başa düşürdük ki, keçdiyimiz təlimlər bizə lazım olacaq. Düşünürdük ki, müharibə olsa, torpaqlarımızı azad edə biləcəyik. Hər oğlan kimi uşaqlıqdan arzum idi ki, əlimə silah alım, tank sürüm, döyüşə gedim...
Sentyabrın 27-də evdən xəbərsiz Səfərbərlik və Hərbi Xidmətə Çağırış üzrə Dövlət Xidmətinin Salyan Rayon Şöbəsinə gedib könüllülər dəstəsində döyüşlərə qatıldım. Qeyd etməliyəm ki, döyüşlərdə ilk səddi yaranlar da biz olmuşuq, tankistlərdən ilk şəhid də dəstəmizdən mayor Mahir Heydərov olub.
Qələbəyə ümidimiz çox idi. Çünki Ali Baş Komandan demişdi ki, biz torpaqların işğaldan azad edilməsi üçün bu yola çıxmışıq. Müsəlman olaraq öndərimizə qiymət verməyi bacaran insanıq. O yerlərdə ki, ana bacılarımızı, dinc əhalini şəhid etmişdilər, bax, orada hər metr torpaq alındıqca ürəyimiz dağa dönürdü . Ən qürurverici görüntü tankların üstündə Azərbaycan Bayrağının dalğalanmasını, irəliləməsini görmək idi.
Vətən müharibəsi iştirakçısı, Talehin cəbhə yoldaşı Ramin Şirinov bildirir:
– Qarabağda hər hansı əraziyə daxil olmaq bizim üçün şərəf idi. Talehin vurduğu – düşmənə gözdağı olan tank indi Hərbi Qənimətlər Parkındadır. Gələn nəsillər, ziyarətçilər biləcək ki, bu tankı Taleh Camalov vurub. Onunla fəxr edirəm. Qürurla deyirəm ki, Qarabağın işğaldan azad olunmasında az da olsa payımız var. Çünki biz yaddaşlarda qalan şərəfli addım atmışıq. Sevinirik ki, bu gün Taleh sağdır, əzalarının bir hissəsini itirsə də aramızdadır.
Taleh deyir ki, bütün döyüşlərdə iştirak edib, 3 dəfə yaralanıb, sağalıb döyüşə qatılıb. 4-cü dəfə, oktyabrın 27-də Xocavənddə çox ağır vəziyyətə düşüb:
– İlk dəfə Füzulidə yaralanmışam. Əks- hücum olmuşdu. Mən rəqib tankı vuranda (həmin tank indi Hərbi Qənimətlər Parkında düşmənə göz dağıdır) məni də vurdular. Mən o tankı vurmasaydım, onların hücumu baş tutacaqdı. Komandir çağırdı, vəziyyətimi bilib dedi ki, yaralısan, tankdan düşməlisən. Dedim ki, mümkün deyil, qollarımda can verənləri necə qoyum gedim. Şəhid analarının üzünə necə baxacam ki, kantuziya almışam, qulağımdan qan gəlib, ona görə yarımçıq qayıtmışam. Mən davam edəcəyəm...
Talehin atası Musa Camalov aramla danışır:
– Valideynin övladı qan-qada içində olanda, necə rahat ola bilər? Gecə-gündüz Allaha dua edirdim ki, ya Rəbbim, mənim oğlumu tankda yanmaqdan qoru. Şəhid də olsa, qazi də olsa, dözərəm. Amma yanmasın. Olur ki, 10 oğuldan heç biri səni yarıtmır. Amma mənim bir oğlum var, özümü də, Vətəni də, dövləti də başı uca edib.
Taleh sonda bildirdi ki, Xocavənddə oktyabrın 27-də tankımız vurulanda gözünü açıb hər yeri toz-duman içində görüb:
– Tank komandirim ölümündən sonra “Qarabağ” ordeninə, Vətən Müharibəsi Qəhrəmanı adına layiq görülən Azad Hümbətov yanımda şəhid oldu. Yaralıları aparmağa iki tibb işçisi gəlmişdi. Birini ermənilərin atəşi şəhid etdi. Bizi Hadruta gətirdilər. Vəziyyətim çox ağır olduğuna görə məni Füzuli Diaqnostika Mərkəzinə göndərdilər. Gözümü açanda yenə qan içində idim. Mərkəzdə axşam saat 6-da 1-ci əməliyyata girmişəm, dan üzü saat 4-də çıxmışam. Bir də gözümü yumub açmışam ki, Bakıda Mərkəzi Hərbi Hospitaldayam. Səhər 7-də əməliyyat başlayıb, axşam saat 12-də bitib. Sonra ağrılara dözə bilməyib komaya düşmüşəm. Ayılandan sonra palataya köçürsələr də, həkimlər sağ qalacağıma ümid etməyiblər. Eşidəndə ki, ordumuz Qələbə əldə edib, ağrılarımı unutdum. Sağaldım,– bir ayağım yox, digəri İllizarov aparatında idi.
Talehin atası söyləyir, fəxr edirəm ki, oğlum sağdır, Vətən yolunda canını, sağlamlığını, cavanlığını qoydu. Nə qədər sağam, onun qulluğundayam, yükünü daşıyacağam...
Ramin Şirinov isə deyir ki, qoy gələcək nəsillər bilsin ki, bizim torpaqları yüzillər boyu işğal ediblər. Ali Baş Komandanın “dəmir yumruğu” altında ordu-xalq birliyi qələbə əldə etdi. Bütün dünyaya göstərdik ki, biz yatmamışdıq, bizim səbrimiz vardı.
Vətən müharibəsi qazisi Taleh Camalov tez-tez “Teknofest”də dövlət başçımız və birinci xanımla görüşünü xatırlayır: “Necə doğma hiss ilə öpdü, qucaqladı. Mehriban xanım dedi ki, mən sizin bacınızam. Allah Vətənimizi qorusun”.
Zərifə BƏŞİRQIZI, “Xalq qəzeti”