Azərbaycanda öz zəkasının nuru, istedadı, bilik və bacarığı ilə cəmiyyətə nümunə olan gənclərimiz bizi daim sevindirirlər.
Bu günlərdə Bakıda start götürən şahmat üzrə dünya kuboku yarışında istedadlı gəncimiz Mələk İsmayıla “FİDE online Queens Festival”da uğurla çıxış etdiyinə görə “Avropa kraliçası” kubokunun təqdim olunması bizdə qürur hissi yaratdı. Dünya şahmat aləminin sayılıb-seçilən nümayəndələri sırasında Azərbaycan gənclərinin öz dəst xətləri, öz imzaları var. 19 yaşlı Mələk İsmayıl da artıq istedadlı zəka ustaları arasında öz yerini tapmaqdadır. Avropa birinciliyində ilk dəfə qalib adını 7 yaşlılar arasında qazanıb. 2011-ci ildə Antalyada qitə birinciliyində əldə etdiyi qızıl medal onun həyatında mühüm rol oynayıb. Bu yarışdan sonra müxtəlif yaş qruplarında – 2012-ci ildə Çexiyada keçirilən Avropa birinciliyində gümüş, 2014-cü ildə Gürcüstandakı qitə birinciliyində qızıl medal qazanıb. Gürcüstanda 2015 və 2019-cu illərdə keçirilmiş Şahmat Festivallarının qalibi olub. 2021-ci ildə isə onlayn Avropa birinciliyində gümüş medala layiq görülüb.
Şahmata həvəsi onda atası yaradıb. O illəri Mələk İsmayıl belə xatırlayır: “Hələ kiçik yaşlarımdan fiqurların düzülüşü mənə sirli aləmi xatırladır, onda hikmət axtarırdım. Saatlarca şahmat taxtasının arxasında oturub bir gedişin yüzlərcə, bəlkə də minlərcə variantının olduğunu düşünürdüm. Şahmatın sirlərinə yiyələndikcə onun nə qədər dərin bilik, səbir və dözümlülük tələb etdiyinin şahidi oldum. Ani səhv böyük bir məğlubiyyətə səbəb ola bilər. Şahmat ağıl, güclü məntiq tələb edən strategiya oyunudur. Bir tanınmış şahmatçının etdiyi maraqlı gediş milyonlarla insanı heyran qoyur. Ən böyük arzum oyunlarım, gedişlərimlə insanları heyrətləndirmək, onların zövqünü oxşamaqdır”.
Beynəlxalq arenalarda bir-birindən maraqlı oyunlar nümayiş etdirməklə mükafatalayiq yer qazanan idmançı hər qələbənin arxasında böyük zəhmətin dayandığını bildirir: “Hər yarışa hazırlaşmaq üçün günlər, bəzən də aylarla vaxt sərf edirsən. Əvvəllər uduzanda çox üzülür, bəzən də ağlayırdım. Amma indi çalışıram ki, səhvlərimdən nəticə çıxarıb, növbəti oyunlarda onlara yol verməyim. Ən böyük mənəvi dəstəyi isə bu zaman atam verir. Ümumiyyətlə, diqqət etsəniz, yarışlara uşaqların ən çox valideynləri ilə gəldiklərini görərsiz. Çünki bu çətin yolda insanın ən böyük dayağı mənəvi dəstəkdir”.
Hazırda Bakı Mühəndislik Universitetinin dizayn ixtisası üzrə təhsil alan Mələk rəsm çəkməyi də çox xoşlayır: “Bir neçə saatlıq şahmat oyunundan sonra rəsmlər çəkmək mənə xüsusi zövq verirdi. Sonra isə onları otağımda asırdım. Hazırda çalışıram ki, dərslərimi də yaxşı oxuyum. Gündəlik 8-9 saatlıq şahmat məşğuliyyətindən sonra dərslərimə də vaxt ayırmağa müvəffəq oluram. Bu, çətin olsa da, öhdəsindən gəlirəm. Həm dərslərimdə, həm də şahmat karyeramda mənə dəstək olanlara sonsuz təşəkkürümü bildirirəm”.
Həyatın bütün sahələrində güclü iradəyə, yüksək ruha malik insan öz imkanlarından geniş istifadə edərək hədəfə doğru inamla addımlayır. Ona görə də, tərəqqi və yüksəlişə geniş rəvacın verildiyi cəmiyyətimizdə məhz gələcəyin qurucuları olan, yüksək potensiala malik gənclərimiz yetişir.
Leyla QURBANOVA, “Xalq qəzeti”
