Masallıda Elgün Aqil oğlu Mikayıllının adı çəkiləndə bütün camaatın qəlbi qürurla döyünür. 19 yaşında şəhid olmuş Elgünü həm Tanrı dərgahında, həm də insanlar arasında belə mötəbər edən onun mənəvi saflığı, bir də iç dünyasından qaynaqlanan halal Vətən, torpaq sevgisidir. O, Azərbaycanın 2020-ci il sentyabrın 27-də başlanan haqq savaşında bahar qoxulu ömrünü qurban verdi ki, qarı düşmən Vətənin şərəfinə toxunmasın, 30 il əsarətdə qalan doğma torpaqlar azad olunsun...

Yaradanın bu dünyaya igidlik rəmzi, qeyrət mücəssəməsi kimi əta elədiyi El­gün Masallı rayonunun Xıl kəndində bo­ya-başa çatmışdı. İnsanlara gərək olmaq, el-obaya fayda vermək onun əsas amalı idi. Müstəqil həyata qədəm qoyduğu gün­dən ülvi məqsədlərə can atması, nəcib, xeyirxah işləri əhatəsində olduğu cəmiy­yətdə Elgünə hörmət gətirmişdi. 2019-ci ildə Milli Ordu sıralarına yola düşəndə ürəyindən keçirdiyi ilk istək əlinə silah alıb döyüş meydanında erməni işğalçıla­rını əzmək olmuşdu. Məqsədinə çatmaq üçün xidmət etdiyi Azərbaycan Silahlı Qü­vvələrinin Beyləqan rayonunda yerləşən “N” saylı hərbi hissəsində bütün təlimlər­də fəallıq göstərir, bacarıqlı və səriştəli bir hərbçi kimi əsgərlərin, zabitlərin arasında tanınırdı.

...Nəhayət, Elgünün arzuladığı gün gəlir. Qarabağın azadlığı naminə Vətən müharibəsi başlanır. Elgün xüsusi tapşı­rıq gözləmədən, qəlbində dığalara nifrət Füzuli uğrunda gedən ölüm-dirim savaşı­na atılır. Saysız-hesabsız qeyrətli oğullar sırasında düşmənə istədiyi sarsıdıcı zər­bələri vurur. 17 gün müharibə meydanın­da torpaq iddiasında olan haylara qan uddurur. Aşiqi olduğu, canından artıq sevdiyi Vətən, torpaq uğrunda mərdliklə döyüşür, göstərdiyi şücaət əsgər yoldaş­larını da qələbəyə ruhlandırır. Onun şə­hidliyi isə tarixi zəfərimizə gedən yolu bir qədər də açmış olur. 

Bəli, onun özü gənc yaşında bu fani dünyanı tərk etsə də, canından artıq sev­diyi Vətən torpaqları azadlığa qovuşdu. Elə Elgün də həyatının mənasını bunda görürdü. Qısa ömür yaşadı, amma şərəf­li ölümü ilə qərinələr boyu unudulmaz, neçə-neçə nəsillərə örnək olan bir zir­vəyə ucaldı. 

Onu da qeyd edək ki, Prezident İlham Əliyevin sərəncamlarına əsasən “Vətən uğrunda” və “Füzulinin azad olunmasına görə” medalları ilə təltif olunanlar arasın­da şəhid Elgün Mikayıllı da var.

Zəfər ORUCOĞLU,
Azərbaycan Jurnalistlər Birliyinin üzvü