2023 xalqımızın və dövlətimizin həyatında xüsusi əlamətdarlıq daşıyan ildir. Bu ilin 10 mayında ümummilli lider Heydər Əliyevin anadan olmasının 100-cü ildönümü tamamlanır. Bu tarix Heydər Əliyev irsinin öyrənilməsi və həmin zəngin irsdən faydalanmaq baxımından çox önəmlidir.
Şəxsiyyətin ucalığı
Ulu öndərin 100 illik ömür tarixinə müxtəlif səmtlərdən nəzər salmaq olar. Heydər Əliyev, ilk növbədə ömrünü xalqının şərəf tarixinə çevirmiş uca şəxsiyyətdir. Əsl şəxsiyyətlər bütün dövrlərdə ali ideyaları reallaşdırmaq qüdrəti, toplumun mənəvi enerjisini bir araya gətirmək qabiliyyəti ilə xalqların, dövlətlərin inkişafı tarixində çox mühüm rol oynayırlar. Zəmanəsinin və əslində, bütün zamanların ən parlaq liderlərindən biri olan Heydər Əliyev də Azərbaycanın böyük bir inkişaf tarixinin müəllifidir.
Çox mürəkkəb tarixi şəraitlərdə, çətin şərtlər altında Heydər Əliyev xalqımızı milli dövlətçilik ideyaları ətrafında birləşdirərək addım-addım Azərbaycan kimi müstəqil dövləti qurub yaratmışdır. Bu baxımdan bir çox böyük şəxsiyyətlərimizin əsrlər boyu xidmət etdikləri missiya, arzusunda olduqları ideya Heydər Əliyev şəxsiyyətində yeni bir dəyər qazanır. Bu ideya müstəqil Azərbaycan dövlətinə və dövlətimizin gələcək uğur yoluna çevrilir.
Ötən əsrin 90-cı illərinin əvvəllərində, müstəqilliyimizin ilk illərindəki xaos, anarxiya, sosial-iqtisadi böhran mühitində parçalanaraq dünya xəritəsindən silinmək təhlükəsi ilə üzləşən, kövrək əsaslara malik zəif bir ölkəni qısa zaman ərzində Cənubi Qafqaz regionunun ən qüdrətli ölkəsinə çevirmək o qədər də asan başa gəlməmişdir. Ümummilli lider buna illərin gərgin zəhməti, bütün çətinliklər, dörd bir yandan üzərinə yönələn təzyiq və təhdidlər qarşısında yenə də sarsılmayan qətiyyəti sayəsində nail olmuşdur.
Heydər Əliyev təkcə müstəqil dövlətini qurub-yaratmamışdır, eyni zamanda, Azərbaycan insanında milli dövlətçilik təfəkkürü, vətəndaşlıq məsuliyyəti formalaşdırmışdır. Bununla Azərbaycanın gələcəyini də yaratmış, müəyyənləşdirdiyi strateji inkişaf kursu ilə ölkəmizin aydın, rəvan gələcəyinə yol açmışdır.
İntibah dövrü
Tale elə gətirib ki, ümummilli lider Heydər Əliyev mahiyyətcə bir-birinə az bənzəyən iki tarixi dövrdə Azərbaycana rəhbərlik edib. Azərbaycan Kommunist Partiyası Mərkəzi Komitəsinin 1969-cu il 14 iyul tarixli plenumunun qərarı ilə 46 yaşlı Heydər Əliyevin Azərbaycan KP MK-nın birinci katibi seçildiyi dövr tamam başqa dövr idi. Bütün keçmiş İttifaq respublikaları üçün vahid mərkəzdən idarə olunan ümumi qaydalar vardı və respublikanın inkişafı ilə bağlı istənilən addımı mərkəzlə razılaşdırmaq, saysız-hesabsız bürokratik maneələrdən keçmək lazım gəlirdi. Bununla belə, Heydər Əliyev özünəməxsus səbir və təmkinlə bu maneələri adlayırdı. Azərbaycanın inkişafı üçün addımları ardıcıl şəkildə davam etdirir, niyyətlərindən vaz keçmirdi. Milli ideyalarla birgə bu səbri, təmkini, ardıcıllığı, dayanıqlılığı, məqsədyönlülüyü Heydər Əliyev hələ yaşının erkən çağlarından mənimsəmiş, sonralar isə xüsusi xidmət orqanlarından gələn peşə vərdişləri ilə bu məziyyətləri daha da mükəmməlləşdirmişdi.
Əslində, Heydər Əliyevi bu vəzifəyə də elə zəkasının gücünü, peşəkarlığını, enerjisini, prinsipiallığını və insan kimi yüksək mənəvi-əxlaqi keyfiyyətlərini nəzərə alaraq təyin etmişdilər. O dövrdə Azərbaycanda vəziyyət o qədər də ürəkaçan deyildi. Ölkə sosial-iqtisadi inkişaf göstəricilərinə görə digər müttəfiq respublikalardan xeyli geridə qalırdı. Bütün sahələrdə tənəzzül meyilləri özünü hiss etdirirdi. Bu baxımdan, ulu öndərin Azərbaycan rəhbərliyinə gəldiyi dövr ölkə həyatının yetərincə çətin və mürəkkəb dövrü sayıla bilərdi. Ölkəni bu vəziyyətdən çıxarmaq, inkişaf proseslərinin önünə doğru yönəltmək üçün zamanın sürətinə uyğun məqsədyönlü tədbirlər həyata keçirilməli idi.
Sovet rejiminin bütün xüsusiyyətlərinə, iş prinsiplərinə dərindən bələd olan, zəngin idarəçilik təcrübəsinə malik Heydər Əliyev mövcud vəziyyəti dəyişmək üçün elə ilk günlərdən qəti addımlara başladı. Özünəməxsus dahiyanə uzaqgörənliklə Azərbaycanın uzunmüddətli, dinamik və hərtərəfli tərəqqisini təmin edəcək kompleks inkişaf proqramlarının hazırlanmasına, bu proqramların qəbul edilməsinə və icrasına nail oldu. Görülən işlərin müsbət nəticəsi kimi bütün önəmli sahələrdə vəziyyət yaxşılığa doğru dəyişdi. Respublika iqtisadiyyatında mühüm struktur dəyişiklikləri baş verdi. İstehsalla bilavasitə bağlı olan elmi-tədqiqat sahələrinin inkişafına diqqət artırıldı. Elmi-texniki tərəqqinin nailiyyətlərinin, mütərəqqi texnologiyaların istehsalata tətbiqi Azərbaycanın bütün SSRİ-də qabaqcıl mövqelərə çıxmasına, respublikanın sosial-iqtisadi həyatında yüksəlişə rəvac verdi.
Ədaləti qoruyan şəxsiyyət
1980-ci illərin əvvəllərində ali məktəbə, uşaqlıqdan arzusunda olduğum hüquqşünas ixtisasına qəbul oluna bildiyimə görə məni böyüdüb boya-başa çatdırmış valideynlərimə, əziz müəllimlərimə, qarşıma çıxmış bütün xeyirxah insanlara və ulu öndər Heydər Əliyevə borcluyam. Heydər Əliyev o illərdə bilikdən başqa güvənc yeri olmayan sadə, imkansız ailələrin övladlarına dəstək verdi. Ali məktəblərin ən nüfuzlu ixtisaslarının qapılarını onların üzünə açdı. Biliyi, istedadı inkişaf üçün əsas meyara çevirdi. O dövrə qədər ali məktəblərdə konkret ixtisaslar vardı ki, onların ancaq imkanlı adamların, məqam sahiblərinin övladları üçün olduğu, cəmiyyətdə sanki norma kimi qəbul edilirdi. Hər kəs bu vəziyyətlə barışmışdı. Konstitusiyada, qanunlarda, guya, hamı bərabər hüquqlara malik idi.
Sovet ideologiyası bərabərlikdən gecə-gündüz dəm vursa da, reallığa gələndə bir çox imkanlar məhdud qruplar üçün əlçatan idi. Heydər Əliyev bu reallığı kökündən dəyişdi. Bu millətin bütün istedadlı övladlarına sahib çıxdı. Yaşının erkən çağlarından valideynləri ilə birgə tarlada çalışıb alın təri tökən, bununla yanaşı, dərs kitablarını da əlindən yerə qoymayan kolxozçu, fəhlə balaları da yüksək bilik hesabına öz ideallarına qovuşmaq üçün imkan qazandılar. Savadsız varlıların övladlarının tələbə adı qazanmaq imkanları məhdudlaşdı. Cəmiyyətdə haqq-ədalət öz yerini tutmağa başladı. Prinsiplərindən uzaq düşmüş sovet sisteminin ədalətsizliklərinə adət etmiş Azərbaycan insanı üçün sanki nağıllar gerçəyə çevrilirdi.
Xatirimdədir ki, ümummilli liderin ötən əsrin 70-ci illərində “Literaturnaya qazeta”ya verdiyi məşhur "Qoy ədalət zəfər çalsın!” sərlövhəli müsahibəsi, əsl partlayış effekti yaratmışdı. Heydər Əliyevin cəmiyyətdəki ədalətsizliklərə, hüquq-mühafizə orqanlarındakı nöqsanlara, ən başlıcası, vətəndaşların hüquq və azadlıqlarının təminatı sahəsində mövcud olan problemlərə diqqət yönəldən, onların həll yollarını göstərən bu müsahibəsi geniş müzakirə edilirdi. İnsanlar onları çoxdan narahat edən problemlərin bu qədər yüksək səviyyədə cəsarətlə, qətiyyətlə, çəkinmədən dilə gətirilməsindən məmnunluq duyurdular. Ümid edirdilər ki, qaldırılan məsələlər tezliklə həllini tapacaq. Bu problemlərin yaranmasında iştirak payı olanların, ulu öndərin qaldırdığı nöqsanlara görə məsuliyyət daşıyanların isə təşviş dolu günləri başlamışdı. Müsahibədə qaldırılan məsələlər o qədər geniş miqyaslı idi ki, hətta xarici mətbuat da bu məzmuna böyük yer ayırmışdı.
İllər sonra Heydər Əliyev "Literaturnaya qazeta”ya məşhur müsahibəsinə reaksiyaları belə xatırlayırdı: "Azərbaycan Kommunist Partiyası Mərkəzi Komitəsinin birinci katibi olmağıma baxmayaraq, mən həmin müsahibədə sovet hakimiyyətinin, cəmiyyətinin işində olan mənfi halların hamısını açıq göstərmişdim. Xatirimdədir, o vaxt Andropov SSRİ Dövlət Təhlükəsizliyi Komitəsinin sədri, həm də Siyasi Büronun üzvü idi. O, bir neçə gündən sonra mənə telefon etdi. Dedi ki, sənin bu müsahibən böyük bir sensasiya yaradıbdır. Soruşdum ki, nə mənada? Cavab verdi ki, müsbət də var, mənfi də var. Soruşuram ki, nəyi müsbətdir, nəyi mənfi? Deyir, müsbət odur ki, insanlar bizim cəmiyyətdəki bu yaraları görürlər və sevinirlər ki, kimsə cəsarət edib bunları açıq deyir. Özü də bunu aşağıda yox, ən yüksək vəzifədə çalışan bir adam deyir. Amma bunun əleyhinə olanlar da var. Soruşuram ki, niyə? Bildirir ki, çünki onlar bunun açılmağını istəmirlər. O vaxt bir çox belə yazılar olub”.
İnsan kapitalı
Heydər Əliyev yüksək iradəsi, qətiyyəti, hamıya örnək olan yorulmaz fəaliyyəti, ən mühümü isə Vətənə sevgisi ilə Azərbaycanı keçmiş İttifaqın geridə qalmış aqrar respublikasından qabaqcıl sənaye ölkəsinə çevirdi. O dövrdə bütün dünyada sənayeləşmə prosesləri geniş vüsət almışdı. Elmi-texniki inqilab, demək olar ki, möcüzələr yaradırdı. Ölkələr, cəmiyyətlər bunun nailiyyətlərindən barınaraq irəli getmək üçün ardıcıl addımlar atırdılar. Bu addımların ən mühümü isə təbii ki, yenilikləri ölkəyə gətirib, həyatın müxtəlif sahələrində tətbiq etməyə qabil kadrların yetişdirilməsi idi. Azərbaycanda o dövr üçün nadir sayılan ixtisaslar üzrə kadrların azlığını nəzərə alaraq, Heydər Əliyev özünün aktiv təhsil və kadr konsepsiyasını irəli sürdü.
Həmin dövrdə minlərlə gənc respublika üçün xüsusilə gərəkli, nadir ixtisaslar üzrə təhsil almaqdan ötrü keçmiş SSRİ-nin ən nüfuzlu ali məktəblərinə – Moskvaya, Leninqrada, Kiyevə, Xarkova, Minskə, Voronejə göndərildi. Bu, xalqın uzaq gələcəyini nəzərdə tutan güclü kadr potensialının, o cümlədən vacib ixtisaslar üzrə mütəxəssislər ordusunun yaradılması, iqtisadiyyatın sürətli və çoxşaxəli inkişafına uyğun olaraq respublikanın ali və orta ixtisas təhsili şəbəkəsinin genişləndirilməsi, hərbi təhsilin inkişafına diqqət bunun təzahürü idi. Azərbaycana birinci rəhbərliyi dövründə ulu öndərin şəxsi təşəbbüskarlığı, qətiyyəti və iradəsi sayəsində ölkə üzrə 700-dən artıq məktəb binası tikilərək istifadəyə verildi. Bu illərdə respublikada ali təhsil müəssisələrinin sayı 12-dən 17-yə, bu təhsil ocaqlarında oxuyan tələbələrin sayı isə 70 mindən 100 minə çatdı.
O dövrdə SSRİ-nin kosmik uçuşlara hazırlıq mərkəzində azərbaycanlı gənclərin olmamasından ciddi narahatlıq keçirən Azərbaycan rəhbəri gənclərin ali təyyarəçilik məktəblərinə göndərilməsini şəxsi nəzarətinə götürmüş, Bakıda milli hərbi kadrlar hazırlayan Cəmşid Naxçıvanski adına məktəb fəaliyyətə başlamışdı. Bütün bunlar Heydər Əliyevin müstəqil Azərbaycan dövləti üçün möhkəm təməllər formalaşdıran müdrik addımları idi.
Məhz o illərdə Azərbaycanı başdan-başa əhatə edən zəngin sosial infrastruktur formalaşdırıldı. Böyük sənaye müəssisələri tikilərək istifadəyə verildi, əhalinin mənzillərlə təmin olunduğu üçün böyük yaşayış massivləri inşa olundu. Sənayedə, kənd təsərrüfatında mütərəqqi texnologiyaların tətbiqi sayəsində Azərbaycan böyük sosial-iqtisadi nailiyyətlər qazandı və bu nailiyyətlər əhalinin güzəranında da hiss olunmağa başladı.
Vətənə dönüş
Ümummilli lider Azərbaycana rəhbərlik etdiyi illərdə elmimiz, mədəniyyətimiz də böyük bir intibah mərhələsindən keçdi, ana dilimizin qorunması və inkişafı yönündə tarixi addımlar atıldı. O, doğma xalqına, millətinə yüksək diqqət və qayğısını keçmiş SSRİ-nin ali rəhbərlərindən biri kimi Moskvada çalışdığı illərdə də davam etdirirdi. Həmin illərdə Mərkəzdən Azərbaycana ayrılan və saitlərin həcmi dəfələrlə artırılmış, respublikada aparılan quruculuq işlərinə daha münbit zəmin yaradılmışdı. O, bu vəzifədə təkcə Azərbaycan xalqının himayədarı deyildi. Heydər Əliyev keçmiş SSRİ məkanında bu pilləyə yüksəlmiş yeganə türk-müsəlman lideri idi. Onun varlığı Azərbaycan və ümumən türk-müsəlman xalqlarının mövqelərini yüksəldirdi. Bu xalqlara qarşı yönələn təhdidlərin qarşısını alır, onların inkişafına yol açırdı.
Təsadüfi deyil ki, ötən əsrin sonlarına doğru Azərbaycan xalqının ən böyük bəlaları da Heydər Əliyev şəxsiyyətinin üstünlüyünü, zəkasının gücünü, insanların lider kimi ona sevgi və rəğbətini sinirə biməyən M.S.Qorbaçov və ətrafının məkrli münasibəti nəticəsində ümummilli lider istefaya göndərildikdən sonra başlandı. 1987-ci ildə Heydər Əliyev SSRİ Nazirlər Soveti Sədrinin birinci müavini və Sov.İKP MK Siyasi Bürosunun üzvü vəzifəsindən istefaya göndərildi. Bundan cəmi 15 gün sonra ermənilər Azərbaycana qarşı ərazi iddiaları ilə bağlı açıq hərəkətə keçdilər. Azərbaycanın ovaxtkı rəhbərliyinin isə Mərkəzə yarınmaq üçün yürütdüyü antimilli siyasət, göstərdiyi qətiyyətsizlik respublikadaxili ictimai-siyasi sabitliyi son dərəcə kəskinləşdirirdi.
Bu siyasətin məntiqi nəticəsi olan 1990-cı ilin 20 Yanvar hadisəsi bütün dünyaya sübut etdi ki, sovet rəhbərliyi və onun yerlərdəki əlaltıları Azərbaycan xalqına, dövlətinə qarşı ən ağır cinayətlər törətməkdən belə çəkinmirlər. Bu faciənin ertəsi günü Heydər Əliyev bütün təhdidlərə, hətta həyatına qarşı sui-qəsd təhlükəsinə baxmayaraq ailə üzvləri ilə Azərbaycanın Moskvadakı Daimi Nümayəndəliyinə gəlib burada təşkil olunmuş mitinqə qatıldı. Faciənin miqyasından nə edəcəyini bilməyən toplumun önünə düşdü. Keçirdiyi mətbuat konfransı ilə bu qanlı hadisənin əsl səbəbkarlarını bütün dünyanın gözləri önündə ifşa etdi.
Xalqın o ağır günlərində Heydər Əliyev Vətənə qayıtdı və onun Azərbaycana dönüşü hadisələrin gözlənilməzliyindən çarəsiz durumda qalmış insanlara xilas kimi göründü. Ulu öndər blokada şəraitində qalan, respublikanın ovaxtkı rəhbərliyinin də soyuq münasibəti üzündən çox çətin vəziyyətlə üzləşmiş Naxçıvanda məskunlaşaraq orada yaşamağa başladı. Qısa müddətdən sonra insanların istəyi və yekdil qərarı ilə Naxçıvan Ali Məclisinin Sədri seçilən Heydər Əliyevin bu məkanda apardığı islahatlar böyük nəticələr verdi. Azərbaycanın gerçək müstəqilliyinə doğru ilk real addımlar da elə Naxçıvan Muxtar Respublikasında atıldı.
Xilaskar
Onda müstəqilliyini yenicə qazanmış Azərbaycan tarixinin, demək olar ki, ən ağır günlərini yaşayırdı. Tez-tez dəyişən səriştəsiz hakimiyyət respublika həyatının bütün sahələrində dözülməz şərait yaratmışdı. Quduzlaşan ermənilər Azərbaycana qarşı ərazi iddialarını artıq bir neçə il idi ki, silah gücünə həyata keçirirdilər. Rayon və kəndlərimiz bir-birinin ardınca işğal olunurdu. Ölkə ağır sosial-iqtisadi böhranla üzləşmiş, cəmiyyət, demək olar ki, başını itirmişdi. İnsanlar bir parça çörəyin dərdində idilər.
Azərbaycanın müxtəlif bölgələrində xarici qüvvələrin təhriki ilə separatizm meyilləri baş qaldırırdı. Vəziyyət bu şəkildə davam edəcəyi təqdirdə respublikanın parçalanması labüd görünürdü. İnsanlar müstəqilliyə, ölkənin suveren dövlət kimi gələcəyinə ümidlərini itirmişdilər. Kiçicik bir təsadüf kifayət edərdi ki, Azərbaycan dünyanın siyasi xəritəsindən tamamilə silinsin. Belə bir vaxtda Heydər Əliyevin xalqın təkidli tələbi ilə ölkə rəhbərliyinə qayıdışı, təcrübəli strateq kimi, dövlətçilik sükanı arxasına keçməsi Azərbaycanı bu bəlalardan hifz etdi.
Heydər Əliyev ölkədə vətəndaş qarşıdurmasına son qoydu, xaosun, anarxiyanın qarşısını aldı. Cəmiyyətdə milli birliyi təmin etdi. Azərbaycanın müstəqilliyini gözü götürməyən xarici qüvvələrin əli ilə ölkənin müxtəlif bölgələrində alovlandırılan separatizm ocaqlarını söndürdü. Azərbaycan insanının istiqlal, milli dövlətçilik ümidlərini özünə qaytardı və həmin insanlarla birgə arzulardakı o dövləti qurub yaratmağa başladı. 1994-cü ildə dünyanın əsas transmilli neft şirkətləri ilə imzalanan “Əsrin müqaviləsi” ilə ölkənin iqtisadi inkişafı üçün mühüm təməl formalaşdırdı. Bununla ümumən regionun mənzərəsini dəyişdi, Azərbaycana qlobal proseslərin əsas iştirakçılarından biri statusunu qazandırdı.
Heydər Əliyev 1995-ci ildə özünün rəhbərliyi ilə layihəsi hazırlanaraq qəbul olunan müstəqil Azərbaycan Respublikasının Konstitusiyası ilə demokratik, hüquqi dövlət quruculuğu proseslərinin, ölkəmizin gələcək inkişafının əsas istiqamətlərini müəyyənləşdirdi. Liberal iqtisadiyyat və sivil cəmiyyət quruculuğu yolunda ardıcıl addımlar atdı.
Ölkədə azad bazar iqtisadiyyatı prinsipləri öz yerini tutdu, vətəndaş cəmiyyəti formalaşdı, ifadə azadlığı təmin edildi. Azərbaycan dünyanın aparıcı təşkilatlarına üzv qəbul olundu. İllər keçdikcə ölkəmizin beynəlxalq nüfuzu yüksəlməyə başladı. Ulu öndər Azərbaycanda elə bir siyasi kursun əsasını qoydu ki, bu kurs Azərbaycan durduqca ölkəmizin dövlətçilik konsepsiyası kimi daim yaşayacaq. Heydər Əliyev ideyalarının davamçısı, Azərbaycan Respublikasının Prezidenti İlham Əliyevin uğurla davam etdirərək müstəqil dövlətimizi tarixinin ən qüdrətli mərhələsinə gətirib çıxardığı inkişaf kursunun uğurları bunun təsdiqidir.
Regionun inkişaf nəbzi Azərbaycanda döyünür
Vətən müharibəsindəki qələbəmizdən sonra bu gün regionda yeni reallıqlar yaradan Azərbaycanın qlobal miqyasdakı yeri və rolu, ölkəmizin beynəlxalq proseslərə təsir imkanları, sosial-iqtisadi nailiyyətlərimiz, şəhər və kəndlərimizin yenilənən siması, insanlarımızın getdikcə daha da yaxşılaşan güzəranı, cəmiyyətdə baş verən müsbət dəyişikliklər ulu öndər Heydər Əliyevin gerçəkləşən arzularıdır. Bu gün Azərbaycan Qoşulmama Hərəkatının sədri, Türk Dövlətləri Təşkilatının ən fəal təmsilçilərindən, bir sıra beynəlxalq təşkilatların nüfuzlu üzvlərindən biri kimi qlobal təşəbbüsləri ilə beynəlxalq proseslərə əhəmiyyətli şəkildə təsir göstərir.
Azərbaycan bu gün Avropanın enerji təhlükəsizliyinin əsas təminatçılarındandır. Azərbaycan Prezidenti cənab İlham Əliyevin gələcəyə strateji baxışı, məqsədyönlü qərarları, qətiyyətli addımları sayəsində bu gün ölkəmiz qlobal enerji-kommunikasiya mərkəzinə çevrilib. Böyük bir regionun inkişaf nəbzi Azərbaycanda döyünür. Etibarlı tərəfdaş kimi Azərbaycan beynəlxalq nüfuzu getdikcə daha da güclənir. Prezident İlham Əliyev Şərqlə Qərb arasındakı münasibətlər sistemində ölkəmizin özünəməxsus yerini daha da möhkəmləndirir. Dövlət rəhbərimizin yürütdüyü siyasət və bu siyasətə dəstək olaraq Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın təşəbbüsü ilə həyata keçirilən humanitar layihələr Azərbaycanı bütün dünyada mədəniyyətlərarası dialoq, tolerantlıq, multikulturalizm məkanı kimi tanıdır.
Bütün bunlar Heydər Əliyev ideyalarının tarixdəki qalibiyyətidir və nə qədər ki, Azərbaycan var, bu ideyalar da yaşayacaqdır.
Alış QASIMOV,
Bakı Dövlət Universitetinin hüquq fakültəsinin əmək və ekologiya hüququ kafedrasının müdiri, hüquq elmləri doktoru, professor