IV HİSSƏ
Tarixin bizə bəxş etdiyi ən yaxşı dəyər, onun entuziazm həyəcanı yaratmasıdır.
Fridrix Nitşe
Qədim türk dövlətçilik təfəkkürü
Sokrat öyrədirdi ki, qanunla hüquq eyni şeydir. Bu fikrin qaynağı türk dövlətçilik təfəkkürüdür. Azərbaycan dövlətçilik ənənəsində “qanun” və “hüquq” anlayışları sinonim kimi işlədilmişdir. Konkret olaraq, toplumun özünüyaratması qanunu kimi “Yosun hüququ” adlanan anlayış mövcuddur. Bu hüquq, eyni zamanda, qanundur, başqa sözlə, türk insanının və toplumunun qanunudur. Görünür, məhz bu səbəbdəndir ki, qədim türklər “dövlət” və “el” (oba, birgəyaşamın türk modeli) anlayışlarına eyni mənanı vermişlər. “Palaza bürün, elnən sürün!” deyimi bu mənada “dövlətnən ol!” anlamını verir.
Türk birgəyaşam üsulunda toplum kimi mövcud olmaq fəlsəfəsi ilə dövlət olaraq var olma arasındakı bu vəhdətin müasirliyi aydındır. Filosoflar, politoloqlar və alimlər indiki tarixi mərhələdə fərdi deyil, kollektiv (cəmiyyət, cəmiyyətlər birliyi, dövlətlər qrupu və s.) mövcud olmanı müasir beynəlxalq münasibətlərin əsas parametri adlandırırlar. Bu isə kollektiv marağın fərdi maraqdan önə keçdiyini göstərir. Türk xalqları min illərdir bu fəlsəfə ilə dövlət və cəmiyyət qururlar.
Vurğulanan kontekstdə türk siyasi təfəkkürü ilə Sokratın müqayisəsində bir ortaq cəhəti də görmək mümkündür. Bu, “ədalət” anlayışıdır. Azərbaycan dövlətçilik ənənəsində ədalət məsələsi mərkəzi yer tutur. Bununla bağlı çox sayda tarixi fakt mövcuddur. Ulu öndər Heydər Əliyev müasir mərhələdə dövlətçiliyi sıx surətdə ədalətli olmaqla bağlamışdır. Fəliyyətinin mahiyyəti və məzmununda da ədalət əsas yeri tutmuşdur. Bu, qədimdən gələn siyasi şüur ənənəsinin konkret təzahürüdür.
Sokrat üçün də ədalət anlayışı böyük əhəmiyyət kəsb etmişdir. O, müdrikliyi birbaşa ədalətlilik, xeyirxahlıq, qanunlara əməl etməklə bağlamışdır. Sokrat deyirdi ki, kişi adam qanunlara əməl edəndir. Yəni həm də hüquqa sayğı göstərən, ona uyğun davranandır.
Nəhayət, türk siyasi təfəkkürü ilə Sokratı dövlətçilik və siyasət aspektində birləşdirən başqa vacib məqam: lider və bütövlükdə dövlət verdiyi sözə və imzaladığı sənədə sadiq olmalıdır! Sokrat üçün, bu, həyati mövqe idi. O, zəhər dolu qabı başına çəkmiş, lakin inamına, ideyasına, verdiyi sözlərə xəyanət etməmişdir. Sokrat qanun və hüquqla yaşamışdır! Və o keyfiyyətdə də həyatdan getmişdir. Dövlət məsələsində bu şərtlər ayrıca əhəmiyyət və özəllik kəsb edir.
Verilən sözə əməl olunmasa, heç bir müqavilənin, razılaşmanın əhəmiyyəti olmur. Azərbaycanda buna görə el arasında “kişi sözü” deyilən bir anlam vardır. Söz verdin, mütləq əməl etməlisən. Azərbaycan hökmdarları, rəhbərləri, liderləri bu qaydaya daim əməl etmişlər. Ənənə bunu sübut edir. M.Ə.Rəsulzadə də dövlətçilik üçün mühüm olan 4 şərtdən birinin imzaya sadiqliyi göstərmişdir. Ulu öndər bütün fəaliyyətində sözünə əməl edən və imza qoyduğu sənədlərə tam uyğun addımlar atan lider olmuşdur. Bu ənənəni Prezident İlham Əliyev də davam etdirir.
Beləliklə, qısa müqayisə aydınlaşdırır ki, Sokrat türk siyasi qavramının bir aspektini lakonik ifadə etmiş və ona siyasi-nəzəri məzmun vermişdir (“qanunla hüquq eyni şeydir”). Bu fikirlərin müasir mərhələdə Cənubi Qafqazın geosiyasi mənzərəsinə hansı aidiyyatı vardır? Qanunla hüququn eyni olmasının Cənubi Qafqazın hazırkı geosiyasi mənzərəsini dərk etmək kontekstində konkret təsiri necə ola bilər?
Ədaləti və tarixi reallığı qurban vermənin bədəli
Məsələ ondan ibarətdir ki, qədimlərdə Azərbaycan türk dövlətçilik şüuru ilə Sokrat fəlsəfəsi ortaq mövqeyə gələ bilmişlər. İndi isə Sokratın xələfləri Cənubi Qafqazda bu tarixi bağlantını atdıqları düşüncəsiz addımları ilə pozurlar. Faktiki olaraq regionu münaqişələrə və qarşıdurmalara sürükləməyə çalışırlar. Onlar Sokrata dönük çıxmışlar.
Azərbaycan isə öz dövlətçilik ənənəsinə nəinki sadiq qalmış, hətta onu XXI əsrin çağırışları fonunda yaradıcı surətdə inkişaf etdirmişdir. Qərbin siyasi təfəkkürü mənfiyə doğru dəyişmişdir, Azərbaycan isə dəyişməmişdir: tarixdən gələn ədalət, hüquq və milli ləyaqətə əməl etməkdədir!
Son zamanlar regionda geosiyasi aspektdə nələri müşahidə edirik? Qərb dövlətləri bir-birinin ardınca konstruktiv olmayan və Cənubi Qafqazı qarşıdurma məkanında saxlayan addımlarını davam etdirirlər. Çox qısa bir müddətdə onlar bu tendensiyanı nəinki zəfilətdilər, hətta onu davamlı trendə çevirməyə çalışırlar. Konkret faktların fonunda bu tezis özünü təsdiq edir.
Avropa İttifaqının strukturları Azərbaycana qarşı əsassız və cəfəng ittihamlar səsləndirməkdə davam edirlər. AŞPA təntənəli surətdə bəyan etmişdir ki, Azərbaycan nümayəndə heyətinin fəaliyyəti bir il müddətinə məhdudlaşdırılır. Eyni zamanda, şərt qoyur: AŞPA-nın tələblərini yerinə yetirsə, bu qərar aradan qaldırıla bilər. Şərtlər nədən ibarətdir? Ermənilərin hüquqlarını müdafiə et (etmirik ki?), Laçın “dəhlizi”nə AŞPA nümayəndələrinin “seyrinə icazə ver” (Laçın dəhliz deyil, yoldur və Azərbaycan qanunları çərçivəsində istənilən adam orda “seyr” edə bilər) və AŞPA nümayəndələrini Prezident seçkilərinə müşahidəçi kimi dəvət et (buna layiq deyilsiniz, axı, çünki obyektiv davranmırsınız).
Bu şərtlərin qondarma və qərəzli olduğu aydın görünür. Eyni zamanda, Cənubi Qafqazın geosiyasi mənzərəsi baxımından təhlükəlidir. Çünki yanaşma konfrontasiya yaradıcı və birtərəflidir.
Birincisi, AŞPA və AŞ azərbaycanlıların hüququndan danışmaq istəmir. Ermənilərə dəyib-toxunan olmadı, ancaq milyondan çox azərbaycanlı deportasiya olunmuşdur. Keçən müddətdə AŞPA, AŞ, bütövlükdə Aİ və ümumi halda Qərb və ya başqa geosiyasi güc Ermənistanda keçirilən hansı seçkilərdə rəsmi İrəvan qarşısında öz yurdlarından qovulmuş azərbaycanlıların hüquqlarını bərpa etməsi tələbini qoymuşdur? Ermənistan hökumətindən hansı AŞPA və ya Aİ, olsun ki, ABŞ yaxud Rusiya tələb etmişdir ki, Qarabağdakı İslam mədəniyyət nümunlərinin, əsas olaraq məscidlərin və qəbiristanlıqların təhqir edilməsinin hesabatını verməsə, hansısa təşkilatda fəaliyyətini məhdudlaşdıracaq? Əksinə, rəsmi Bakının israrlı dəvətinə, çağırışına, müraciətlərinə baxmayaraq, özlərini beynəlxalq təşkilatlar adlandıran və insan haqları, mədəniyyət nümunələrinin qorunması ilə məşğul olduqlarını deyən qurumlar yerlərdə vəziyyətə baxmağa gəlmirlər! Bunlara inanmalıyıq? Onları seçkiyə müşahidəçi kimi buraxmalıyıq? Axı, onlar həqiqəti görə bilmirlər, ədalət və reallığa qarşı “korluq xəstəliyinə” tutulmuşlar!
Məgər bu, regiona geosiyasi konf-rontasiya və qərəzli yanaşma əlaməti deyildir? Ermənistanla danışıqlarda avropalılar özlərini elə aparırlar ki, guya, o qondarma dövlətdə hər şey demokratiya yolundadır, başqa hər hansı dəyərə ehtiyac yoxdur. Məhz buna görədir ki, erməni siyasiləri və politoloqları daim “Azərbaycan onu etməlidir, Bakı bunu etməlidir” deyib, başlarından böyük qələtlər edirlər. Gah sülhün şərtlərindən müsbət danışırlar, gah özlərindən qondarma şərtlər qoyurlar, gah da nədənsə imtina edirlər. Və bütün bunların kökündə Qərbin geosiyasi intriqaçı və qərəzli mövqeyi dayanır.
Əgər Fransa prezidenti “Ermənistanla bağlı tarixi seçim etdik” və “yerimizi möhkəmləndiririk” cəfəngiyatını danışmasaydı, Ermənistan yenidən şıltaqlıq etməzdi. Əgər ABŞ qeyri-müəyyən və Azərbaycanı əsassız ittiham edən mövqe nümayiş etdirməsəydi, rəsmi İrəvan regionun maraqlarına qarşı addım ata bilməzdi.
Bu faktlardan belə nəticə çıxara bilərik: Hazırda Qərb Cənubi Qafqazda geosiyasi parçalanmanı təhrik edən siyasət yeridir. Və məsələnin ən həssas məqamı da bununla bağlıdır. Bu dağıdıcı fəaliyyətdə özünü qabarıq göstərən əlamət Qərb dövlətlərinin açıq şəkildə Ermənistanın haqsız işlərini dəstəkləməsi ilə bağlıdır. Bu vəziyyətin politoloji izahı mümkündür.
Regional birliyə qarşı kölə psixologiyası
Bəli, görünür ki, Cənubi Qafqazda postmüharibə mərhələsinin başlıca geosiyasi dəyəri əsrlərdir davam edən kölə psixologiyasının “siyasi qanadı”nın sındırılması ilə bağlıdır! Azərbaycanın müstəqil davranışları, qətiyyətli sərbəst mövqeyi və regionda sülh, əməkdaşlıq və qarşılıqlı faydalı qazanc əldəetmə ənənəsini yaratmağa başlaması kənar dağıdıcı qüvvələrin regiona təsiri imkanlarını sıfıra endirir! Bu prosesi dayandırmağa çalışırlar və bunun üçün oyuncaq və siyasi ağlı çox qısa olan erməni rəhbərlikdən istifadə edirlər! Rusiya buna qarşı aktiv fəaliyyət göstərmir, çünki ona da müstəqil, sərbəst və bütöv Qafqaz lazım deyildir. İran passiv müşahidəçi təsiri bağışlayır, lakin dərin qatlarda regionun geosiyasi, siyasi, iqtisadi, energetik, mədəni və kommunikativ bütövləşməsində marağı yoxdur!
Bu, kənarda hansısa, konstruktiv güc axtarışınımı aktuallaşdırır? Qətiyyən elə deyildir! Elə bir addım olsa, bu da Cənubi Qafqazın geosiyasi parçalanmasına aparıb çıxaracaq bir qədər fərqli yol seçilməsi deməkdir. Bu regionun qalmaqalsız və qarşıdurmasız taleyi yalnız qafqazlıların özlərindən asılıdır. Azərbaycan, Gürcüstan və Ermənistan birgə fəaliyyətləri ilə regionda geosiyasi parçalanmanın qarşısını ala bilərlər! Başqa hər hansı formul stratejidə yenidən parçalanmaya gətirib çıxaracaq. Obrazlı desək, “Qafqaz evi”ni yalnız qafqazlılar yarada bilər və onu “təmiz saxlayar”!
“Qafqaz evi”nə aparan yol
Bunun üçün iki gerçəkliyi, regional geosiyasi həqiqəti Cənubi Qafqaz dövlətlərinin hər biri səmimi qəbul etməlidir.
Birincisi, region dövlətlərinin hər biri qəbul etməlidir ki, Azərbaycan Cənubi Qafqazın lideridir və bu, Bakının bütövlükdə regional gücü təmsil etdiyi anlamına gəlir.
İkincisi, Azərbaycan regional lider kimi konstruktiv geosiyasi mənzərənin yaradılmasının aparıcı təmsilçisidir. Bu faktın iki aspekti vardır: birincisi, keçmiş geosiyasi konfrontasiya mövqeyi, təfəkkürü və psixologiyasından region dövlətləri və cəmiyyətləri imtina etməli, ondan xilas olmalıdırlar; ikincisi, geosiyasi konstruktivlik, sülh, əməkdaşlıq psixologiyasına yiyələnməlidirlər.
Bu iki faktın sintezində bir mühüm tezisi İrəvan və Tbilisi özləri üçün qəbul etməlidir. Bu tezis Ermənistan və Gürcüstanın regional lider olmaq imkanlarına malik olmamaları ilə bağlıdır. Bu, sadə məsələ deyildir. Əsərlərdir, xristianlıq xətti ilə bizim qonşu xalqların şüuruna özlərinin üstün olmaları psixolgiyası yeridilmişdir. Reallıq isə göstərdi ki, Cənubi Qafqazda Azərbaycan xalqı müstəqil və güclü dövlət yaratmaq potensialına daha çox sahibdir. Söhbət tarix boyu onlarla dövlət qurmuş və regionda söz sahibi olmuş bir toplumdan gedir. Tarixi faktdır ki, Ermənistan min il, ümumiyyətlə, dövlət kimi mövcud deyildi, Gürcüstan isə türk dövlətçiliyi ilə sıx bağlı ayaqda qala bilmişdir. Əsasən qonşuluq şəraitində yaşanılmışdır, lakin aparıcı rol oynayan Azərbaycan türk dövlətləri olmuşlar.
İndiki mərhələdə isə Ulu öndərin müstəqil dövlət quruculuğu konsepsiyası ən səmərəli, müsbət nəticəverici və müasir tələblərə tam cavab verən dinamik sistem olduğunu konkret əməldə sübut etmişdir. Azərbaycan Avrasiyada yeganə dövlətdir ki, özü ərazi bütövlüyünü siyasi-hərbi yolla bərpa etmişdir. Həm də Qərb, Rusiya və İranın buna qarşı fəal mövqe tutması şəraitində bunu bacarmışdır! Lakin Ermənistan və Gürcüsatn kənardan daim güclü dəstək görmüşlər. Bununla belə Gürcüstan hələ də ərazi bütövlüyünü təmin edə, Ermənistan isə müstəqil dövlət ola bilməmişdir!
Siyasi ritorikanı və “heç kəs öz ayranına turş deməz” deyimini bir kənara qoysaq, tarixi gerçəkliyin gözünə dik baxmalıyıq. Belə bir şəraitdə Azərbaycanın aparıcı rolu qəbul edilməsə, hansı əsasla Cənubi Qafqazda qalıcı geosiyasi mənzərə yaratmaq mümkündür? Mümkün deyildir!
Onda meydana Cənubi Qafqazın geosiyasi parçalanması prosesini dayandıracaq və onun qarşısını faktiki olaraq kəsə biləcək yeni format çıxır. Bu, bizim qənaətə görə, “Azərbaycan mərkəzli geosiyasi birlik, təhlükəsizlik və əməkdaşlıq” modelidir! Onun konkret məzmunu nədən ibarət ola bilər?
F.MƏHƏMMƏDOĞLU
XQ