Azərbaycan Respublikasının Ali Məhkəməsində Əmək və Əhalinin Sosial Müdafiəsi Nazirliyi ilə əməkdaşlıq çərçivəsində “Konstitusiya və Suverenlik İli” münasibətilə həssas qruplardan olan şəxslərin əl işlərindən ibarət sərgi təşkil olunub.

Sərgidə Nazirliyin tabeliyindəki DOST İnklüziv İnkişaf və Yaradıcılıq Mərkəzinin təlimçi və benefisiarlarının 80-dək əl işi nümayiş etdirilib. Müxtəlif janrlarda milli dövlətçilik ruhunda tərtib edilmiş əsərlərin mövzusu qanunçuluq, suverenlik, vətənpərvərlik və insan hüquqları kimi dəyərləri əhatə edib.

Tədbirdə çıxış edən Azərbaycan Respublikasının Ali Məhkəməsinin Aparat rəhbəri Cavid Hüseynov diqqətə çatdırıb ki, Prezident cənab İlham Əliyev tərəfindən 2025-ci ilin “Konstitusiya və Suverenlik İli” elan olunması ilə bağlı Ali Məhkəmə bir sıra tədbirlər həyata keçirib və bu istiqamətdə işlər hazırda da davam etdirilir. Həmin tədbirlər çərçivəsində keçirilən bu sərgi də hüquqi dövlətin əsas dəyərlərindən biri olan insan amilinə verilən önəmin təzahürüdür.

Qeyd edilib ki, məhkəmə hakimiyyəti tərəfindən belə təşəbbüslər daim dəstəklənir.

Əmək və Əhalinin Sosial Müdafiəsi Nazirliyinin Aparat rəhbəri Fuad Musayev çıxışında Birinci vitse-prezident Mehriban Əliyevanın təşəbbüsü ilə yaradılan DOST İnklüziv İnkişaf və Yaradıcılıq Mərkəzinin fəaliyyətindən bəhs edib. Mərkəzin inklüziv cəmiyyətin inkişafında rolunu vurğulayan Fuad Musayev bu sərginin də “Konstitusiya və Suverenlik İli”nə töhfə olduğunu qeyd edib.

Burada təqdim edilən əsərlər təkcə yaradıcılıq nümunəsi deyil, həm də əzmin və peşəkarlığın göstəricisi kimi səciyyələndirilib.

Daha sonra Ali Məhkəmənin əməkdaşları, könüllülər, tələbələr və digər şəxslər sərgi ilə tanış olublar.

Tədbir çərçivəsində “Könüllü DOST” proqramının “İnklüziv DOST” altproqramı üzrə Mərkəzdə fəaliyyətə cəlb edilmiş gənclər üçün Ali Məhkəmə tərəfindən “Əlilliyi olan şəxslərin hüquqları” mövzusunda seminar da təşkil edilib.

M.Kamal
XQ