Hay xisləti: əvvəl yalan, sonda dalan sevdası
Qəzetimizin dünənki sayında dərc olunmuş “Biz bu torpaqlarda əbədi yaşayacağıq” sərlövhəli yazıda qeyd etmişdim ki, Azərbaycanın uğurla icra etdiyi xarici siyasət kursu Ermənistan dövlətini dörd tərəfdən dalana dirəyib. Həmin dalanların konkret adını, ünvanını və işğalçı dövlətə vurduğu zərbəni də qeyd etmişdim. Hidayət Əliyev adlı oxucu zəng edərək soruşdu ki, həmin dalanlar arasında Qarabağa “humanitar yük gətirən” erməni “tır”larının dirəndiyi dalanın adını niyə çəkmirsiniz? Cavab verdim ki, mən Azərbaycanın siyasəti nəticəsində ərsəyə gələn dalanları sadalamışam. “Tır” məsələsi isə məhz Ermənistanın bilərəkdən yaratdığı “dalan”dır.
Bəlkə də, kimsə bu arqumentlə razılaşmayacaq. Ancaq faktı danmaq mümkün deyil. İşğalçı ölkənin terrorçu rəhbərləri məlum ərazinin relyefini də yaxşı bilirlər, iri qabaritli “Volvo” yük maşınlarının manevr imkanlarını da. Yəni dəqiq hesablayıblar ki, “tır”lar həmin ərazidə geri dönə bilməyəcəklər və mütləq irəli getməlidirlər. Bu isə öz ərazi bütövlüyünü hansısa sarsaq “dövlət”in maraqlarına qurban vermək istəməyən Bakının ciddi etirazı ilə nəticələnəcək, qarşıdurma yaranacaq, bütün dünya münaqişənin səbəbkarı kimi Azərbaycanı qınayacaq.
Hər şeyi hesablamışdılar. Ancaq Azərbaycan Prezidentinin müdriklik miqyasını hesablaya bilməmişdilər. Onlar elə bilirdilər ki, “tır”lar sərhədə yaxınlaşan kimi, Prezident İlham Əliyev “Vur!” əmrini verəcək. Bununla da Azərbaycanın sülhsevərlik imici ləkələnəcək. Bu yerdə xatırladım ki, Qəbələ camaatı arasında məşhur bir deyim var. Biri o birini aldatmaq istəyəndə ikinci şəxs aldanmayacağını göstərmək üçün “Ay, sən öləsən, Vardapet!”– deyir. Yəni, ay sən öləsən, İrəvan, Bakını aldada bilməyəcəksən. Bəli, bu faktdır ki, Azərbaycan Ermənistanı növbəti dəfə ağır məğlubiyyətə uğratdı.
O ki qald Moskvadan Qarabağa göndərilmiş fırıldaqçı Ruben Vardanyanın vəsaiti hesabına işləyən “Spayka” şirkətinə, xatırladaq ki, 2018-ci ildə hakimiyyətə gələn Nikol Paşinyan 2019-cu ilin yazında repressiya üsulları ilə Ermənistanın ən böyük şirkətlərindən biri olan “Spayka”ya qarşı proseslərə başlamış, şirkətin sahibkarı və direktoru həbs edilmişdi. MDB ərazisində yük daşımaq üçün yaradılmış (maraqlıdır, onların nizamnaməsində göstərilən yüklər sırasında “xüsusilə təhlükəli yüklər” də var) bu şirkət elə səviyyəyə salınmışdı ki, bahalı “Volvo” yük maşınlarından ancaq tabut, meyit daşınmasında istifadə edilirdi.
Bəzi ekspertlərin fikrincə, 2020-ci ilin payızındakı İkinci Qarabağ müharibəsindən sonra “Spayka”nın yüksək səviyyədə təchiz edilmiş maşınlarına (onların hamısında yaxşı soyuducu mexanizmlər quraşdırılmışdır) yeni funksiya “etibar edilmişdi”. Belə ki, cəbhədə ölən erməni əsgərlərinin hamısının meyiti evə göndərilmir, yüzlərlə cəsəd bu maşınlarda saxlanılırdı. Yəni illərlə meyit saxlaya bilən maşınlarda indi “humanitar yüklər xarab olur” deyən ermənilər, sadəcə olaraq, ağ yalan danışırlar.
Qərəz, Ermənistanın Qarabağa göndərdiyi “humanitar yük”lər maşınlarda qalıb, maşınlar sərhəddə, Paşinyanın əli çənəsində, Qarabağdakı ermənilərin isə gözləri yolda. İndi nə etmək olar?
Əlbəttə, çox iş görmək olar. Ermənistan rəhbərliyi ilk növbədə daşı ətəyindən tökərək, adam balası kimi danışıqlar stoluna gəlməli, qonşularına ərazi iddialarından əl çəkməli, Azərbaycan ərazilərindəki bütün quldur və terrorçu birləşmələrini geri çağırmalı, mina xəritələrini təhvil verməli, Birinci Qarabağ müharibəsi dövründə itkin düşmüş dörd minə yaxın azərbaycanlının taleyinə aydınlıq gətirməli və ən nəhayət, sülh sazişinə imza atmalıdır. Çox təəssüf ki, Ermənistanın heç bir siyasətçisi bu addımları atmağa hazır deyil. Hamısı qorxur. Çünki bu millət bünövrədən elə bir sağalmaz xəstəliyə mübtəla olub ki, onların qısa müddətdə müalicəsi mümkün deyil. Bu yükü hansı siyasətçi öz üzərinə götürərsə, onun nə vəziyyətə qoyulacağı ağlasığmazdır.
Ancaq zaman dayanıb gözləmir. Zaman erməni xalqının məhrumiyyətlərdən xilas olunmasını təmin edəcək addımlar tələb edir. Həmin addımları kim atacaq? Hələ məlum deyil. Elə addımlar atılmayacaqsa, xalqın ümidi “Spayka”dakı yüklər kimi yarı yolda qalacaq və... ünvana , məqsədə çatmadığına görə zay olub gedəcək.
İttifaq MİRZƏBƏYLİ, “Xalq qəzeti”