“Uzaq sahillərdə” filmində deyildiyi kimi: eyni dalğa, eyni koordinat. Bu ifadəni Qarabağdakı separatçıların Ağdam-Əsgəran yolunu bağlamaları müstəvisində işlətmək tam yerinə düşür. İzah edək nə üçün?
Yadınızdadırsa, ötən ilin dekabrında azərbaycanlı ekofəalların və qeyri-hökumət təşkilatları təmsilçilərinin Laçın-Xankəndi yolunda aksiyaları başlamışdı. Təxminən altı aya qədər davam etmiş aksiyanın başlıca səbəbi bu idi ki, Qarabağdakı separatçıların təşkil etdikləri etiraz nəticəsində ölkəmizin rəsmilərinin və mütəxəssislərinin “Qızılbulaq” qızıl və “Dəmirli” mis yataqlarına girişinə maneçilik törədilmişdi. Nəzərə alaq ki, onların qarşısının kəsilməsi, böyük anlamda Azərbaycanın özünə məxsus olana sahiblənmək kimi haqlı məqsədinə qarşı atılmış addım idi.
İndi də oxşar durum var. Azərbaycan öz ərazisinə və əhalisinə sahiblənmək istəyir. Ağdam-Əsgəran yolu ilə Qarabağ ermənilərinə humanitar yardım daşıyır. Bunu edir ki, separatçıların “humanitar böhran” şousu əhəmiyyətini itirsin. Ölkəmiz bunu həm də ona görə edir ki, Laçındakı sərhəd-nəzarət buraxılış məntəqəsinin fəaliyyətinin tam məhdudlaşdığı bir dövrdə Qarabağın erməni əhalisi korluq çəkməsin. Məntəqənin fəaliyyəti nə üçün məhdudlaşıb, onu da hər birimiz yaxşı bilirik. Əvvəla, orada Azərbaycan hərbçilərinə atəş açılmışdı və buna görə məsuliyyət müəyyənləşməmişdi, ikincisi isə Qarabağa qaçaqmalçılığın həyata keçirilməsinə cəhd göstərilmişdi ki, bu işdə isə Beynəlxalq Qırmızı Xaç Komitəsi alətə çevrilmişdi...
Bəli, mövcud durumda Azərbaycan üzərinə düşəni etməlidir. Yəni, bildirdiyimiz kimi, Qarabağ ermənilərinə, yəni, öz vətəndaşlarına yaşamaları üçün yardım göstərməlidir. Elə məhz bu məqamda növbə gəlir “Uzaq sahillərdə” filmindəki məşhur ifadəyə. Daha doğrusu, həmin ifadəni nə üçün işlətməyimizin izahına.
Separatçılar Azərbaycanın humanitar yardımlarının daşındığı Ağdam-Əsgəran yolunu məhz qondarma qurumda keçmiş “dövlət naziri” postunu tutmuş, hazırda isə ictimai hərəkat yaradaraq, oyunbazlıq edən Ruben Vardanyanın başçılığı ilə bağlayıblar. Onlar yola beton plitələr düzərək, gediş-gəlişin qarşısını almağa çalışıblar. Yayılmış videogörüntülərdə bu məqsədlə uşaqlardan istifadə edildiyi də diqqət çəkməkdədir...
Aksiyaçılar açıq şəkildə bildiriblər ki, yolu kəsməkdə məqsəd humanitar daşımaların qarşısını almaqdır. Yada salaq ki, ötən ilin dekabrında da Azərbaycanın dövlət rəsmilərinin və mütəxəssislərinin “Qızılbulaq” və “Dəmirli” yataqlarına getmələrinə, ekoloji durumu müəyyənləşdirmək üçün tədbir görmələrinə əngəli məhz həmin Vardanyanın dəstəsi törətmişdi. Bəli, eyni dalğa, eyni koordinat.
***
Bu yerdə diqqəti Azərbaycan Prezidenti İlham Əliyevin və Ermənistan baş naziri Nikol Paşinyanın iyulun 15-də Brüsseldə Avropa İttifaqı Şurasının prezidenti Şarl Mişelin vasitəçiliyi ilə keçirilmiş görüşünə yönəldək. Ş.Mişelin həmin görüşlə bağlı açıqlamasında bir şərti hissə var - “Humanitar yardımlar”.
Mişel bildirmişdi ki, 15 iyul görüşündə Qarabağın erməni əhalisinin durumunu, Laçın dəhlizi ətrafındakı situasiyanı müzakirə ediblər. “Aydındır ki, mövcud vəziyyət dayanıqlı deyil və heç kimin marağına uyğun gəlmir. Vəziyyətin normallaşmasına kömək üçün mümkün konkret addımları da müzakirə etdik”, - deyən vasitəçi əlavə etmişdi ki, Laçın yolunun açılmasını vacib sayır. Diqqət çəkən məqam isə onun “Azərbaycanın Ağdamdan humanitar yardımları təmin etmək istəyini də qeyd etdim” deməsidir.
Əlbəttə, Aİ Şurasının prezidenti diplomatikliyini qorumuş və istəmişdi ki, haqqında söz açdığı mətləb böyüməsin. Yəni, o, birbaşa “ərazi Azərbaycanındırsa, öz əhalisini təmin etməli olan tərəf də Azərbaycandır” deyə bilərdi. Ancaq deməmiş və hər iki variantı – həm Laçın, həm də Ağdam yolu ilə daşımaları vacib saymış və əhalinin ehtiyaclarının təmin olunması üçün müştərək humanitar yardımların çatdırılmasını dəstəklədiyini vurğulamışdı. Ancaq cənab Mişelin təqdir etdiyi məqamı, yəni Azərbaycanın Ağdamdan humanitar yardımları məsələsini dilə gətirməsi yenilik idi. Deməli, Ş.Mişel faktiki olaraq, bölgənin hüquqi sahibinin – Azərbaycan dövlətinin yerli əhalinin – Qarabağ ermənilərinin qayğısına qalmalı olduğu düşüncəsini beynəlxalq ictimai rəyə çatdırdı.
Deməli, Ağdam-Əsgəran yolunda separatçıların təşkil etdikləri aksiyanın 15 iyul görüşündən sonra reallaşması təsadüfi deyil. Rusiyanın maşası olan Vardanyanın meydana çıxması da, həmçinin. Daha bir diqqətçəkən məqam Rusiyanın Xarici İşlər Nazirliyinin iyulun 15-də – Azərbaycan və Ermənistan liderlərinin Brüsseldə danışıqlarının getdiyi bir vaxtda bəyanat səsləndirməsidir. Kreml tərəfindən 10 noyabr 2020-ci il tarixli üçtərəfli Bəyanatın eykamlaşdırıldığı bu sənəd, faktiki olaraq iki Cənubi Qafqaz ölkəsi arasındakı razılığın inkarı ruhunda idi. Təxminən belə: sizin Brüsseldə hansı qərara gəlməyinizdən asılı olmayaraq, mənim şəxsi mənafe güdən oyunlarım var. Oyun isə özünü çox gözlətmədi.
***
Rusiyanın adamı olan R.Vardanyan dövriyyəyə girdi və Azərbaycanın Qarabağa humanitar yardım daşımasının qarşısını almağa girişdi. Bununla Mişelin beynəlxalq ictimai rəyə Azərbaycanın özünə məxsus əraziyə və əhaliyə yardım göstərməsi məntiqinə qarşı çıxıldı. Qarşı çıxanları müşayiət edənlər isə Rusiya sülhməramlılarıdır. Belə nəticəyə gəlirik ki, Moskva Qarabağda separatçılığın saxlanılmasında maraqlı olduğunu bir daha ortaya qoydu. Özü də bu niyyətin gerçəkləşdirilməsi son dərəcə yaramaz üsullardan istifadə ilə özünü göstərdi. Hər halda, Ağdam-Əsgəran yolunun kəsilməsinə uşaqların cəlb olunmasından böyük rəzalət yoxdur...
Bu mənzərə dəryada boğulanın saman çöpündən yapışması effekti verməkdədir. Rusiya hələ də Vardanyan kimi cılız bir kartdan yararlanırsa, deməli, onun təsir qüvvəsi tükənib. Belə davranışlar yalnız müəyyən vaxtın udulmasına səbəb ola bilər. Bəs sonra? Nəzərə alaq ki, bu sayaq yaramaz metodların tətbiqi davamlı xarakter daşıya bilməz. Üstəlik, Azərbaycanın əks addımlarını hesablamaq zərurəti də yaranır. Hər halda Bakı borclu qalmır. Necə ki, borclu qalmadığını Laçın-Xankəndi yolunda altı aya qədər davam etmiş aksiya ilə göstərdi, yenə də oxşar addımlar ata və regiondakı reallığı dəyişdirmək meyillərinə cəbhə aça bilər.
***
Rusiyanın Qarabağ dirənişi fonunda R.Vardanyanın dəstəsinin aktivləşməsi və Ağdam-Əsgəran yolunda aksiyanın təşkili ilə Qarabağın erməni əhalisinə humanitar yardımların daşınmasının qarşısının alınması Ermənistana sərf edir. Ümumən, Moskvanın mövcud müstəvidəki bütün qeyri-ordinar hərəkətləri İrəvana sərfəlidir.
Diqqət yetirək, Ermənistan Rusiya XİN-in 15 iyul bəyanatına reaksiya verib bildirmədi ki, Kreml iki Cənubi Qafqaz ölkəsi arasında sülhün əldə edilməsinə qarşı çıxır. Bildirməz də. Çünki sülh istəmir. Buna görə Vardanyanın aksiyasına da səssiz yanaşır. Hətta hansısa formada dəstək də verə və bildirə bilər ki, Qarabağ erməniləri guya Azərbaycandan gələn xeyiri də istəmirlər. Axı Bakı-Xankəndi dialoqu kimi sərsəm məsələni gündəmə gətirib siyasi spekulyasiya yolu tutan, separatçı rejimi tərəf qismində görmək istəyən rəsmi İrəvandır.
Yeri gəlmişkən, Ş.Mişel liderlərin Brüssel görüşündən sonrakı açıqlamasında vurğuladığımız məsələyə də toxunmuşdu. “Yerli əhalinin ilk növbədə hüquqlarının və təhlükəsizliyinin təmin olunmasına ehtiyacı var”, – deyən vasitəçi bu kontekstdə Avropa İttifaqının Bakı ilə Qarabağda yaşayan ermənilərin nümayəndələri arasında birbaşa dialoqu dəstəklədiyini diqqətə çatdırmışdı. Bu dialoqun çox vacib əhəmiyyət daşıyan etimadı təmin etməli olduğuna diqqət çəkmişdi.
Göründüyü kimi, cənab Mişel “erməni nümayəndələr” ifadəsini işlədir. Deməli, kollektiv Qərb Ermənistan hakimiyyəti tərəfindən irəli sürülən “Bakı-Xankəndi” dialoqu kimi siyasi avantüranın yalnız “dialoq” məntiqinin üzərində dayanır. Qarabağdakı separatçı rejimi nəzərə almır. Deyə bilərik ki, bu, nə rəsmi İrəvana, nə də Rusiyaya sərfəlidir. Ölkənin Xarici İşlər Nazirliyinin 15 iyul bəyanatı da, əslində, Kremlin Qərb tənzimləməsinin gətirəcəyi və özünə xoş olmayan duruma preventiv münasibəti idi. Ermənistanın oxşar spekulyativ bəyanatları həddən artıq çox olduğundan, ölkənin mövqeyini yenidən qabartmağa ehtiyac duymuruq. Onsuz da hər şey məlumdur.
***
Sonda bir məqamı da vurğulayaq: Separatçıların R.Vardanyanın başçılığı və Rusiya sülhməramlılarının müşayiəti ilə keçirdikləri aksiya onu göstərir ki, Qarabağın yerli əhalisinin durumunu düşünən yoxdur. Aksiya insan amilinin deyil, yalnız siyasi məqsədlərin öndə olduğunu yenidən göstərdi. Bir daha aydın oldu ki, bölgədəki mövcud reallığı dəyişmək üçün dəridən-qabıqdan çıxan qüvvələr yerli ermənilərin yaşam hüquqlarına təcavüz yolu tutmaqdan belə çəkinmirlər, ölkəmizin qarşısında dirəniş cəhdi göstərirlər.
Bəli, onu da bildirdik ki, bu sayaq gedişlər olduqca cılız mahiyyət daşımaqdadır. Heç şübhəsiz, belə hallara qarşı Azərbaycanın əks addımları olacaqdır. Bu addımlar zaman-zaman da atılıb və onların nəticəsində hazırda Qarabağda separatçılıq çənbəri xeyli daralıb və daralacaq da.
Ə.CAHANGİROĞLU, “Xalq qəzeti”