Türkiyədə seçkilərin ikinci turu üzrə səsvermə günü yaxınlaşdıqca, ölkədə “ictimai-siyasi hərarət” anbaan yüksəlir. Yenidən hər yerdə qızğın debatlar, ciddi müzakirələr gedir. Hər bir seçici öz seçiminin daha doğru olduğuna əmin olduğu üçün, bəzən dogma və yaxınlarını da buna inandırmağa çalışır.
Lakin Türkiyə sivil, demokratik dövlətdir. Hər bir vətəndaşın azad və sərbəst seçim etməyə hüquqi və mənəvi haqqı var. Bu Vətən, bu məmləkət, bu dövlət 85 milyonluq türk xalqınındır və heç bir daxili və xarici bir təsir və təzyiq olmadan bütün seçicilərin azad, sərbəst seçim etmək hüququ var. Bu tarixi seçim isə türk xalqının müstəsna haqqıdır!
Türkiyədə 14 may seçkilərini izləyən beynəlxalq müşahidəçilərin bir qismi belə bir məqamı xüsusi olaraq qeyd edirlər ki, əhalinin böyük əksəriyyəti ölkənin siyasi həyatında cərəyan edən proseslərə biganə qalmır. Seçici Vətənini qarşıdakı illər ərzində daha yüksək inkişaf və tərəqqi edən bir məmləkət kimi görmək istəyir. Vətəndaş onun səsinin mənsub olduğu xalqın və dövlətin gələcəyi üçün böyük önəm daşıdığının fərqindədir.
Bu günlərdə prezidentliyə namizədlər ictimai televiziya – TRT-də xalq qarşısında çıxış edir, öz seçkiqabağı proqramlarını bir daha izah və şərh edirlər. Bu çıxışlar ölkədə böyük maraqla izlənilir. Təbii ki, hər iki namizəd dövlətin ali postuna seçilməyə daha layiq və şanslı olduğunu göstərməyə çalışır.
AKP-nin qurucusu və lideri Rəcəb Tayyib Ərdoğan bazar ertəsi “TRT Haber” telekanalında çıxış edərək Qərb mediasını Türkiyədə ictimai fikrə təsir etməkdə günahlandırıb. Prezident deyib: “Biz Türkiyə mətbuatının ictimai fikri manipulyasiya etmə cəhdlərinin qarşısını almaq üçün lazımı hüquqi addımlar atmışıq. Amma Qərbdə mətbuat və söz azadlığı ilə bağlı ənənə və qanunlara əməl etmək istəmirlər”.
R.T.Ərdoğan qeyd edib ki, Qərb Türkiyəni sevmir, ona görə ki, bu ölkənin iqtidarı terrorizmin kökünü kəsməyə nail olub: “Biz terrorizmlə mübarizədə tək qalmışıq. Biz vətəndaşlarımızı terror dəhşətlərindən öz gücümüzlə xilas etmişik”.
Dövlət başçısı, həmçinin vurğulayıb ki, Qərb Türkiyənin müdafiə sənayesi sahəsindəki uğurlarından da narahatdır: “Onlar istəmirlər ki, Türkiyə müdafiə sənayesi sahəsində güclü olsun. Bz onlardan artıq çoxdan silah və sursat almıırıq. Buna görə də bizə böhtanlar yağdırmağa çalışırlar. Bizim millət Qərbin ədalətsiz siyasətinə qarşı bu il mayın 14-də öz layiqli cavabını verib. Mən ümid edirəm ki, mayın 28-də də məhz belə olacaq!”
R.T.Ərdoğan “TRT Haber”in canlı yayımında auditoriyadan soruşub: “Siz Azərbaycan, Qətər, yaxud Liviyada bizimlə bağlı hər hansı bir narahatlıq eşidibsinizmi? Xeyr! Siz bizim uğurlarımıza kimlərin narahat olduqlarına fikir versəniz, o zaman Türkiyənin həqiqi dostlarının və düşmənlərinin kimlər olduğunu görəcəksiniz”.
Xatırladaq ki, bu il mayın 14-də keçirilən ümumi seçkilərdə on milyonlarla türk vətəndaşı iştirak edib. Seçki fəallığı olduqca yüksək olub. R.T.Ərdoğanın lideri olduğu “Cümhur İttifaqı” parlamentdə növbəti dəfə səs çoxluğunu qazanıb, hazırkı dövlət başçısı prezident seçkilərinin nəticələrinə görə də əsas rəqibi CHP lideri, “Millət İttifaqı”nın vahid namizədi Kamal Kılıçdaroğlunu xeyli geridə qoyub. Lakin prezident seçilmək üçün “50 faiz plyuz bir səs” tələb olunduğuna görə, mayın 28-də seçkilərin ikinci turunun keçirilməsi qərara alınıb.
Beləliklə, dörd gündən sonra qardaş ölkənin vətəndaşları yenidən “sandıq başına” gələrək, dövlət başçısını seçməli olacaqlar. Qeyd etmək lazımdır ki, bu seçkilər çağdaş Türkiyənin, eləcə də bütün türk dünyasının taleyi üçün son dərəcə mühüm əhəmiyyət kəsb edən olduqca vacib siyasi kampaniyadır.
Mayın 22-də ATA İttifaqından prezidentliyə namizəd Sinan Oğan dövlət başçısı R.T.Ərdoğanla görüşərək onunla müzakirələr aparıb və bu müzakirələrlə bağlı mətbuata açıqlamasında AKP liderini dəstəkləyəcəyini bildirib. S.Oğan deyib ki, “biz inanırıq ki, bizim bu qərarımız ölkəmiz və millətimiz üçün ən düzgün qərardır”.
R.T.Ərdoğan, öz növbəsində, S.Oğana təşəkkür edərək demişdir: “Sayın Sinan Oğan bizim terrorizmə qarşı qətiyyətli mövqeyimizi, bütün türk dünyası ilə sıx əlaqələrimizi, eləcə də son iyirmi ildə məmləkətin terrordan xilası naminə gördüyümüz işləri yaxşı bilir.”
Bu gün Türkiyə vətəndaşlarını ən çox narahat edən məsələlərdən biri qaçqın problemidir. Yeri gəlmişkən, R.T.Ərdoğan “TRT Haber”də çıxışı zamanı suriyalı qaçqınların dogma yurdlarına nə vaxt qayıdacaqları ilə bağlı problemə də aydınlıq gətirib. Deyib ki, Türkiyə hökuməti artıq 560 min qaçqının könüllü şəkildə və təhlükəsizlikləri təmin olunmaqla, geri qayıtmalarını təmin edib.
Türkiyə mətbuatı yazır ki, qaçqın ailələri terrorçulardan tamamilə azad edilən ərazilərdə yerləşdiriliblər. Reallıq budur ki, Suriyada terror təşkilatlarının kökü kəsildikcə, dogma yurdlarına qayıdan qaçqınların sayı da davamlı olaraq artır.
Türkiyə sərhədlərini göz bəbəyi kimi qorumağı bacaran dövlətlərdəndir. Prezident bununla bağlı bildirib ki, son illər Türkiyənin sərhədləri ən yüksək təhlükəsizlik texnologiyaları ilə təchiz edilib: “Sərhədlərimiz heç vaxt indiki qədər güvənli olmayıb”.
Xatırladaq ki, hazırda Türkiyədə 3,7 milyon suriyalı qaçqının olduğu bildirilir. Qardaş ölkə öz ərazisində sığınacaq verdiyi qaçqınların sayına görə dünyada birinci yerdədir. 2011-ci ildə Suriyada “Ərəb baharı” kampaniyası çərçivəsində rejim əleyhinə başlanan kütləvi etiraz aksiyaları az sonra ağır zorakılıqlarla müşayiət olunan vətəndaş müharibəsinə çevrilib və bu başıbəlalı ölkədə 23 milyonluq əhalinin az qala yarısı qaçqın və məcburi köçkünə çevrilib.
Türk xalqı geniş qəlbli, səxavətli və comərd xalqdır. Xalqından mandat alan R.T,Ərdoğan iqtidarı ölkədəki qaçqın ailələrinin təhlükəsiz şəraitdə, könüllü və ləyaqətlə geri dönmələri üçün əlindən gələni edir. Xalq populist millətçi siyasətçilərdən fərqli olaraq, hazırkı hakimiyyətin bu istiqamətdəki ədalətli siyasətini dəstəkləyir.
Minaxanım ƏSƏDLİ,
Azərbaycan Turizm və Menecment Universitetinin professoru, politoloq
Türkiyədə 14 mayda keçirilən seçkilər, ilk növbədə, qardaş ölkədə seçki mədəniyyətinin olduqca yüksək səviyyədə olduğunu bütün dünyaya nümayiş etdirdi. Planetimizin ən demokratik hesab olunan dövlətlərində belə son onillər ərzində Türkiyədə olduğu kimi yüksək seçki fəallığı müşayiət olunmayıb. Bu mənada Türkiyə hamıya nümunə göstərdi. Düşünürəm ki, bu seçkilər təkcə Türkiyənin deyil, dünyanın demokratiya tarixinə qızıl hərflərlə yazılacaq.
Azərbaycan xalqı Türkiyədəki seçkiləri diqqətlə izləyir. Biz bu məsələdə çox həssasıq. Bu, təbiidir. Böyük Atatürk deyib ki, Azərbaycanın sevinci bizim sevincimiz, kədəri bizim kədərimizdir. Bizim üçün də Türkiyə çox əzizdir. Türkiyənin güclü və qüdrətli olması bizim üçün son dərəcə önəmlidir. Biz 2020-ci ilin payızında 44 günlük şanlı savaş zamanı bunun şahidi olduq. Bunu heç vaxt unutmayacağıq.
Fikrimcə, 14 may seçkiləri həm də onu göstərdi ki, Qərbdə bəzilərinin yanlış iddialarının əksinə olaraq Türkiyə demokratiya sahəsində böyük inkişaf yolu keçib. Dünya bir daha gördü ki, fədakar və qəhrəman türk xalqı sivil, demokratik dəyərlərə münasibətdə də heç bir dövlətdən və xalqdan geri qalmır.
Mən əminəm ki, türk vətəndaşları mayın 28-də, yəni seçkilərin ikinci turunda da yüksək seçici fəallığı nümayiş etdirərək ən layiqli namizədə səs verəcəklər. Müdrik türk xalqı bu dəfə də ən doğru seçimini edəcək. Bu, çox vacibdir.
Bu gün dünyada gərgin siyasi proseslər, münaqişə və kataklizmlər baş verir. Türkiyə dövlətinin sükanının başında hansı siyasətçinin dayanmasından çox şey asılıdır. Türk xalqı üçün xeyirlisi olsun.Amin!
Məsaim ABDULLAYEV, “Xalq qəzeti”