Rəqəmsal İnkişaf və Nəqliyyat Nazirliyi yanında Kosmik Agentlik (“Azərkosmos”) və qlobal peyk operatoru “Intelsat” şirkəti arasında Qərbi Afrika regionunda birgə layihələrin həyata keçirilməsinə dair kommersiya müqaviləsi imzalanıb.
Rəqəmsal İnkişaf və Nəqliyyat Nazirliyindən bildiriblər ki, müqaviləyə əsasən, “Intelsat” şirkəti 17 ölkəsi və 430 milyondan çox əhalisi olan Qərbi Afrika regionunda “Azerspace-2” peykinin resurslarından istifadə etməklə müştərilərinə mobil şəbəkələrdə nəqletmə xidmətləri təqdim göstərəcək.
Bununla da, “Intelsat” şirkəti “Azerspace-2” peykinin imkanlarından istifadə edərək Afrika regionunda xidmət coğrafiyasını daha da genişləndirəcək. Nazirliyin məlumatında bildirilir ki, “Azerspace-2” peykinin əhatə dairəsi Afrikanın əlçatmaz ərazilərində belə, mobil şəbəkə və telekommunikasiya xidmətləri üçün olduqca əlverişlidir. “Azərkosmos”un sədr müavini Fuad Aslanovin sözlərinə görə, peyk xidmətləri bazarında “Intelsat” şirkəti ilə əməkdaşlıq rəhbərlik etdiyi quruma Afrikada mobil və data xidmətlər üzrə həyata keçirilən kommersiya layihələrində iştirak üçün geniş imkanlar açacaq.
“Intelsat” şirkətinin biznesin inkişafı və şəbəkə tərəfdaşlıqları üzrə vitse-prezidenti Adam Troy isə bildirib ki, təmsil etdiyi qurum “Azərkosmos” ilə “Azerspace-2” peykinin orbitə buraxıldığı 2018-ci ildən bəri əməkdaşlıq edir. “Azərkosmos”u “Intelsat” şirkətinin mühüm və üstünlük verilən tərəfdaşı kimi dəyərləndirən Adam Troy, həmçinin deyib ki, bu əməkdaşlıq Afrikadakı müştərilərinə yüksək keyfiyyətli peyk xidmətləri göstərməyə imkan yaradacaq.
“Xalq qəzeti”