Erməni stilistin bayrağımıza qarşı etdiyi məlum hərəkəti dələduzluq kimi qələmə verən rəsmi İrəvan, əslində, bu həqarətə görə Azərbaycandan, eləcə də siyasi vandalizmə şahidlik etmiş beynəlxalq ictimaiyyətdən üzr istəməlidir.
Beynəlxalq idman qurumları idman adına və missiyasına ləkə gətirən belə vandalizm aktlarına ən kəskin qiyməti verməklə yanaşı, günahkarı, indiki halda, Ermənistanı mötəbər yarışlara evsahibliyi hüququndan məhrum etməlidirlər. O ki qaldı, məsələnin siyasi tərəfinə, yəni dövlət atributunun bu formada təhqir olunmasına görə, burada söhbət təşkilatçı ölkənin – Ermənistanın milli və dövlət rəmzinə həqarət olunmuş tərəfdən –Azərbaycandan üzr diləməsindən getməlidir. Bunu beynəlxalq hüquqla yanaşı, siyasi etiket və BMT-nin müvafiq konvensiyasının şərtləri tələb edir. Amma bunun üçün günahkar tərəfdə siyasi iradə ilə bərabər, ləyaqət də olmalıdır.
Düşüncəsiz “qəhrəmanlıq”
Ağır atletika üzrə növbəti Avropa çempionatının İrəvanda keçirilən və canlı yayımlanan açılış mərasimi zamanı beynəlxalq ictimaiyyətin gözü qarşısında Azərbaycan Bayrağı turnirin təşkilatçılarından olan şəxs tərəfindən nümayişkaranə şəkildə yandırıldı. Özünü sivillərin sırasında görən ölkənin başçısının da qatıldığı tədbirdə törədilən bu siyasi təxribatın üstündən bir gün keçmiş Azərbaycan və Türkiyənin bayraqlarına qarşı növbəti vandalizm aktı təşkil olunub. Beynəlxalq idman yarışında təmsil edilən dövlətlərin bayraqları arasında yalnız Azərbaycan və Türkiyənin Dövlət Bayraqları kəsilmiş, bir neçə hissəyə parçalanmış şəkildə asılıb. Bu, bir daha Ermənistanda yüz il əvvəl olduğu kimi, daşnak-şovinist düşüncəsinin, etnik nifrət, milli ayrı-seçkilik siyasətinin davam etdiyini göstərir.
Bəli, İrəvanda Azərbaycan Bayrağının yandırılmasını radikal millətçilər, daşnaklar və mövcud iqtidara müxalifətin tərəfdarları “qəhrəmanlıq”, tək-tük haylar isə bu insidenti acizlik və Ermənistanın beynəlxalq imicinə və maraqlarına ciddi zərbə kimi dəyərləndirdilər. Belə etiraflardan biri baş nazir aparatının rəhbəri, Ağır Atletika üzrə Avropa çempionatının Təşkilat Komitəsinin sədri Araik Arutyunyana məxsusdur. O, özünün “Facebook” səhifəsində bunları yazıb: “Ermənistanda bu cür düşüncəsiz “qəhrəmanlıq” addımı xoşagəlməz nəticələrə səbəb ola bilər. Bu, tərəqqi yolunda uğursuzluğa işarədir”.
Kral və Qazi
Aşağıda bayrağa münasibətin ibrətamiz və unudulmaz nümunəsi kimi diqqətinizə təqdim etdiyimiz parça tarixin yaddaşına əbədi həkk olunmağa layiqdir.
1922-ci ilin sentyabrında Qazi Mustafa Kamal Atatürk işğalçı yunanlardan təmizlənmiş İzmirə daxil olur. Avtomobil məxsusi olaraq onun üçün ayrılmış saraya yaxınlaşanda, o, giriş pilləkənlərin üstünə sərilmiş yunan bayrağını görür. Bundan təəccüblənən Atatürkə məlumat verirlər ki, vaxtilə kral Konstantin məhz bu binaya daxil olanda onun ayaqlarının altına Türkiyənin bayrağını səriblər. İndi qisas anı yetişib...
Bunu dinləyən Mustafa Kamal pilləkənlərə yaxınlaşır və ətrafdakıların hamısında heyrət doğuran hərəkəti edir. O, aşağı əyilir, düşmən bayrağını qaldırır, onun tozunu çırpır, səliqə ilə qatlayır və üzünü toplaşanlara tutub deyir: “Kral çox alçaq hərəkət edib, mən onu təkrar etmərəm. Bayraq hər bir millətin qüruru, şərəfi və rəmzidir. Hətta vuruşduğun düşmənin belə! Bayrağı yerə atmaq və tapdamaq olmaz! Bunu edən düşmənin bayrağını deyil, öz ləyaqətini tapdamış olur”.
Qondarma dövlətə malik hayların böyük Atatürkün bu hərəkətini dərk və qəbul edəcəklərinə tam inanmasaq da, yüz il əvvəlki tarixə nəzər salmaları və onun bir sıra səhifələrindən ibrət götürmələri onlara fayda verər.
Telman NÜSRƏTOĞLU,
tarix üzrə elmlər doktoru
Bayrağımıza qarşı vandalizm hərəkəti ermənilərin əsl mahiyyətini ortaya qoymaq baxımından dünya ictimaiyyətinə çox mühüm mesaj oldu. Bu hadisə etnik təmizləmə siyasəti apararaq monoetnik ölkəyə çevrilən, digər mədəniyyətlərə, bayraqlara dözümsüz olan ermənilərin özlərindən başqa heç bir millətin varlığını qəbul etmədiklərini və sülh üçün nə qədər təhlükə mənbəyi olduqlarını da göstərdi.
Erməniləri himayə edərək onların türk-müsəlman varlığına qarşı apardıqları soyqırımı siyasətini görməzlikdən gələn UNESCO, həmçinin digər qurumlar da artıq görməlidirlər ki, ermənilər beyinləri bu qədər nifrət və düşmənçilik hissləri ilə zəhərlənmiş bir millətdir. Azərbaycan regiona sülhün gəlməsi üçün çox çalışıb. Baxmayaraq ki, bu 30 illik dövr ərzində ermənilər işğal altındakı torpaqlarımızda daşı daş üstə qoymayıblar, Azərbaycan xalqına tarixin görmədiyi dərəcədə böyük ziyan vurublar. Amma biz yenə sülhpərvər millət olduğumuzu göstərərək sülh üçün çalışdıq və bu gün də çalışırıq.
Əlbəttə, bu cür mötəbər beynəlxalq tədbirlərin Ermənistanda keçirilməməsi üçün məsələ qaldırılmalıdır. Biz beynəlxalq ictimaiyyətə çatdırmalıyıq ki, Ermənistan nifrət siyasətini artıq dövlət siyasətinə çevirmiş bir ölkədir. (AzərTac)
İ.HƏSƏNQALA,
“Xalq qəzeti”