Bu gün Laçın–Xankəndi yolunda – Rusiya sülhməramlılarının müvəqqəti yerləşdirildiyi Azərbaycan ərazilərində ekofəallarımızın faydalı qazıntı yataqlarının qanunsuz istismarı ilə bağlı başladıqları aksiyanın 4 ayı tamam oldu. Ötən aylar ərzində sırf dinc xarakter daşıyan aksiya Azərbaycanın vətəndaş cəmiyyətləri tərəfindən səbir və dözümlə, dövlət qanunvericiliyinin bütün şərtlərinə əməl etməklə keçirilir. Dünən yalnız səhər saatlarında Xankəndidən Laçın istiqamətinə hərəkət edən Beynəlxalq Qırmızı Xaç Komitəsinə məxsus 5 yük və 8 minik avtomobili ərazidən maneəsiz keçib. 

Yolun humanitar məqsəd­lər üçün tam açıq olması Er­mənistanın blokada ilə bağlı səsləndirdiyi iddiaların saxta olduğunu bir daha göstərir. Min bir dona girən riyakar düşmən isə aksiyanı dayan­dırmaq üçün hər bir vasitədən istifadə edib beynəlxalq qu­rumlardan dəstək almaq istə­yir. Vaxt daraldıqca hazırkı vəziyyətdə ərazilərimizin iş­ğalını, eləcə də torpaqlarımız­dan qeyri-qanuni istismarı da­vam etdirməyin mümkünsüz olduğunu görüb hətta “saman çöpündən yapışır”. Baxma­yaraq ki, Azərbaycanın tarixi Qələbəsi ilə nəticələnən 44 günlük müharibədən sonra Hayastanın işğalçılıq planları alt-üst olub, amma düşmən ölkə hələ də havadarlarının dəstəyinə ümid edir. 

Bu günlərdə İranın Ali Milli Təhlükəsizlik Şurasının katibi Əli Şamxaninin ermənistanlı həmkarı ilə görüşündə Tehra­nın regionda istənilən coğrafi dəyişikliyə qarşı çıxacağını yenidən bəyan etməsinin Er­mənistan mətbuatında geniş yer alması dediklərimizin sü­butudur. Haylar hələ də, xa­rici havadarlarından dəstək alacaqlarını düşünürlər. Qon­şu İranın mövcud vəziyyəti gərginləşdirmək cəhdlərinin səbəbsiz olmadığını düşmən özü də yaxşı başa düşür. Təxminən, 30 il ərzində İranın Ermənistanla birləşib Azər­baycanın keçmiş işğal altında olan ərazilərindən Avropaya narkotik vasitələrin daşınma­sı üçün istifadə etməsi hayla­ra da böyük mənfəət gətirib. Onlar “Bəlkə də qaytardılar” xülyası ilə hələ də gözləyirlər. 

Amma, bununla belə, ötən dövr ərzində Azərbaycanın yerüstü, yeraltı sərvətlərini vəhşicəsinə talan edib, eko­logiyanı dəhşətli terrora məruz qoyduqları üçün gec-tez ca­vab verəcəklərini də anlayırlar. Çünki bunu regionda yaranan hazırkı reallıq tələb edir. Başa düşürlər ki, Qarabağdakı ter­rorçu dəstələrin bölgədə qal­ması elə erməni xalqının da başına müsibətlər gətirir. Təbii ki, xarici qüvvələrin regionda sülhün, sabitliyin bərqərar ol­masına böyük maneə yarat­maları Ermənistanın gələcəyi üçün yaxşı heç nə vəd etmir. Məhz belə qüvvələrin təsirin­dən Ermənistan tərəfi sülh sa­zişi üzrə danışıqlar prosesinin razılaşdırılmış gedişatını poz­maqda davam edir. 

Azərbaycan Prezidenti İlham Əliyev bu günlərdə çıxı­şında Azərbaycanla Ermə­nistan arasında münasibət­lərin normallaşması ilə bağlı danışarkən qeyd edib ki, biz normallaşma əzmindəyik və İkinci Qarabağ müharibəsi başa çatandan sonra məhz Azərbaycan sülh müqaviləsi üzərində işə başlamağı təklif etdi. Praktiki olaraq bu iş baş­lanıb, amma bizim istədiyimiz kimi rəvan getmir. Dövlətimi­zin başçısı bunun alternativi­nin olmadığını da qeyd edib. 

Azərbaycan Prezidentinin bu fikirləri düşmən ölkəyə də, onun havadarlarına da ciddi mesajdır. Ermənilər bilməli­dirlər ki, özlərini torpaqlarımı­zın ağası kimi apara, əvvəllər olduğu kimi xarici havadarları ilə birləşib təbii sərvətlərimizin vəhşicəsinə talanını davam etdirə bilməzlər. Ekoaksiya­çılarımız hayların ümidlərini puça çıxarırlar. Ötən aylar ərzində onların bütün çətin­liklərə rəğmən, qışın ən sərt günlərində belə, haqlı tələb­ləri yerinə yetirilməyincə yük­sək ruhla etirazlarını davam etdirmələri də xalqımızın qəti iradəsinin təcəssümü, çağdaş vətənpərvərlik salnaməsidir. 

Leyla QURBANOVA, “Xalq qəzeti”