Qarabağ münaqişəsini nizama salmaq üçün otuz ilə yaxın “fəaliyyət göstərmiş” və sonra isə heç nəyə nail ola bilməmiş, istismar müddəti başa çatmış alət kimi tarixin zibilliyinə atılmış ATƏT-in Minsk qrupunu diriltməyə mənasız cəhdlər edən İrəvanın özünü aldatmasına heyran qalmamaq mümkün deyil.
Ermənistan hökumətinə yaxınlığı ilə seçilən “armenpress” saytının məlumatından:
“Baş nazir Nikol Paşinyan ATƏT-in Minsk qrupunun amerikalı həmsədri (?) Luis Bononu qəbul edib. Baş nazir amerikalı həmsədrin diqqətinə martın 5-də Azərbaycan Silahlı Qüvvələrinin Dağlıq Qarabağda (?) törətdiyi diversiya basqınını çatdırıb. N.Paşinyan daha sonra bildirib ki, Azərbaycan, bir tərəfdən Dağlıq Qarabağın təmsilçiləri ilə dialoqa hazır olduğunu bəyan edir, digər tərəfdən isə terror hərəkətləri (?) həyata keçirir. Nəticədə Dağlıq Qarabağ “Daxili İşlər Nazirliyi”nin pasport-viza şöbəsinin (?) üç əməkdaşı həlak olub.
Həmsöhbətlər Laçın dəhlizinin bloklanmasından (?) sonra Dağlıq Qarabağda yaranmış humanitar böhrana (?) da toxunublar. Baş nazir Paşinyan BMT-nin Beynəlxalq Ədalət Məhkəməsinin dəhlizin açılması ilə bağlı qərarının Azərbaycan tərəfindən təcili surətdə yerinə yetirilməsinin zəruriliyini qeyd edib”.
Erməni saytının yalan, təhrif və saxtakarlığa söykənən məlumatında qarşısına sual işarəsi qoyduğumuz məqamların geniş şərhinə ehtiyac duyulmasa da, əsas nüansa toxunmaya bilmərik. Söhbət bizim üçün keçmiş zamanda qalmış ATƏT-in Minsk qrupu adlı qurumdan gedir. Bu cür periferiya zehni ilə hərəkət edən Paşinyanın ölü mövzunu siyasi şouya çevirməklə nəyə nail olmağa çalışdığı məlumdur. Amma onun bu yersiz cəhdləri qatara gecikmiş sərnişinin onun arxsasınca qaçmasına bənzəyir.
* * *
Qarabağ münaqişəsinin indiki, sonuncu həll mərhələsində tərəflərin etimad göstərdiyi hansı xarici vasitəçidən danışmaq məntidə uyğundur? Axı, həm Azərbaycanın xidmətindən imtina etdiyi Fransa, həm də sülh danışıqlarında iştirakını sadəcə sözdə nümayiş etdirən, mövcud duruma müdaxiləyə həvəs göstərməyən, ikitərəfli dialoq yolunun vacibliyini önə çəkən ABŞ real vasitəçi missiyasından xeyli uzaqlaşıblar. Artıq Minsk qrupunun həmsədri kimi deyil, bölgəyə yeridilmiş sülhyaradıcı hərbi kontingentin təşəbbüskarı kimi ortada qalan yeganə müstəqil vasitəçi Rusiyadır. Moskvanın isə Cənubi Qafqazda yaranmış indiki geosiyasi vəziyyətdə münaqişə tərəflərinin deyil, yalnız özünün daxili maraqlarına oynadığı hamıya bəllidir. Bu mənada sabiq üçüncü həmsədri də obyektiv barışdırıcı hesab etmək olmaz.
* * *
Şərq incə məsələdir, – deyirlər və bunu bölgənin timsalında götürsək, indiki mərhələdə diplomatiyanın önəminin birə-beş artdığını söyləyə bilərik. Azərbaycan şəffaf və ədalətli oyunçu olduğunu dəfələrlə sübut edib. Məhz bu səbəbdən də rəqibini yanlış və özünə ziyan gətirən gedişlərə məcbur etməyi bacarıb. Nəyi və nə vaxt edəcəyini müəyyənləşdirə bilməyən siyasi liderin səhvlərinin fəsadlarını isə onun xalqı yaşamalı olur.
İrəvanın sülhə köklənməyən həmsədr, vasitəçi, barışdırıcı axtarışlarının heç bir fayda verməyəcəyi özünə də gün kimi aydındır. Əslində, düşdüyü indiki çıxılmaz durumunda Ermənistan rəhbərliyinə ən doğru sözü Azərbaycan Prezidenti İlham Əliyev X Qlobal Bakı Forumunda çıxışında söylədi:
“Vasitəçi rolunu oynamağa çalışan beynəlxalq iştirakçılar Ermənistanı öz şansını itirməmək üçün yola gətirməlidirlər. Çünki onlar müstəqil dövlət olmaq fürsətini əldən verib, başqa ölkələrin müstəmləkəsinə çevrilib və müstəqil olmaq, gələcəyini qurmaq şansını əldən buraxıblar”.
İmran BƏDİRXANLI, “Xalq qəzeti”
