UNESCO və İSESCO-nun himayəsi ilə Özbəkistanın Cizzax vilayətinin Zamin şəhərində öz işinə başlayan II Beynəlxalq Muğam Forumu çərçivəsində “Muğam sənətinin inkişaf perspektivləri: nəzəri və praktiki əsaslar” mövzusunda beynəlxalq elmi-praktik konfrans keçirilir.
Özbəkistanla yanaşı, Amerika Birləşmiş Ştatları, Azərbaycan, Türkiyə, İngiltərə, Fransa, Rusiya, Kanada, Misir və Tacikistan alimlərinin iştirak etdikləri konfransa Azərbaycan Milli Konservatoriyasının (AMK) prorektoru, professor Lalə Hüseynova, professor Abbasqulu Nəcəfzadə, sənətşünaslıq üzrə fəlsəfə doktoru Sənubər Bağırova, AMK-nin müəllim və doktorantı Fərdin Məmmədzadə, AMEA Memarlıq və İncəsənət İnstitutunun aparıcı elmi işçisi, fəlsəfə doktoru Sehranə Qasimi də qatılıblar.
Özbəkistanın mədəniyyət naziri Azadbek Nazarbekov məclisi açaraq ölkədə makom – muğam sənətinin inkişafı istiqamətində görülən işlərdən danışıb, həyata keçiriləcək layihələr haqqında məlumat verib, tədbir iştirakçılarına uğurlar arzulayıb. TÜRKPA-nın Baş katibi Mehmet Surayya Er muğam sənətinin əsasən Türk dünyasında və müsəlman Şərqində yayıldığını vurğulayıb, son illərdə muğamın populyarlaşması yönümündə görülən işlərdən danışıb.
Sonra “Özbək muğamının tarixi və nəzəriyyəsi”, “Şaşmakom tacik və özbək xalqlarının mənəvi birliyinin bədii simvolu kimi”, “Buxara muğam ifaçılığı ənənələri”,”Muğamlar haqqında nadir mənbələr”,”Xarəzm muğamının ifaçılıq ənənələri”,”Fərqanə–Daşkənd muğamı: növləri və ənənələr” və digər mövzularda məruzələr dinlənilib.
Konfransda Lalə Hüseynova, Sənubər Bağırova və Abbasqulu Nəcəfzadənin Azərbaycanda muğam sənətinin tarixi, etimologiyası, vokal ifaçılığı ənənələri, muğam sənətkarlığı, bu sahənin klassik və müasir ifaçıları, sazəndə və tarzən sənətkarlığı və digər mövzularda məruzələri maraqla qarşılanıb.
Konfrans öz işini bu gün də davam etdirir.
Qulu KƏNGƏRLİ,
XQ-nin xüsusi müxbiri
Cizzax vilayəti, Zamin şəhəri
