Azərbaycanın zəngin milli-mənəvi dəyərlərinin inkişafı və təbliği məqsədilə görülən işlər mədəni həyatımızı mənalandırır. Bu baxımdan ölkəmizdə kəlağayı sənətinin qayğı ilə qorunması da diqqətçəkəndir. UNESCO-nun Qeyri-maddi mədəni irs üzrə hökumətlərarası komitəsinin 2014-cü ildə keçirilən iclasında bu sənət “Kəlağayı simvolizmi və ənənəvi sənəti” adı ilə beynəlxalq qurumun Reprezentativ Siyahısına daxil edilib.
Hər il noyabrın 26-da Azərbaycanda Kəlağayı Günü qeyd edilir. Bu il həmin gün 10-cu yubiley ilinə təsadüf etdiyi üçün indidən bayram ruhlu layihələrin həyata keçirilməsinə başlanıb. Elm və Təhsil Nazirliyinin dəstəyi, “Mirvarid Dilbazi Poeziya Məclisi” İctimai Birliyinin təşəbbüsü və təşkilatçılığı ilə düzənlənən tədbirlər ali təhsil ocaqlarını əhatə edir. Artıq BDU-da, ADMİU-da və MDU-da “Sazlı-sözlü kəlağayı günləri” uğurla keçib. Növbəti mərasim Sumqayıt Dövlət Universitetində (SDU) təşkil edilib.
Azərbaycanda qadınların müasir kəlağayılara bənzər baş örtüyündən istifadəsi eramızdan əvvəl V-VI əsrlərə gedib çıxır. Bəzi bölgələrdə kəlağayıya çarğat da deyilir. Təbriz, Ərdəbil, Şamaxı, Gəncə, Şuşa, Şəki, Ordubad və İsmayıllı (Basqal kəndi) rayonları bu ipək baş örtüyünün istehsalı ilə tanınıb. Kəlağayı üçün çeşidli bitkilərən – sumaq, zirinc, narinc, cır alma, zəfəran, qarağatdan boyaqlar hazırlanır. “Şah buta”, “Saya buta”, “Xırda buta” çeşnilərindən istifadə olunur. Adətən yaşlı qadınlar tünd, geniş ölçülü, gənc qadınlar isə ağ və əlvan rəngli kiçik kəlağayılar örtürlər.
SDU-da keçirilən mərasimin əvvəlində iştirakçılar Kəlağayı Muzeyində qorunan qədim nümunələrdən ibarət sərgi ilə tanış oldular. Sonra universitetinin prorektoru dosent Elmar Xəlilov milli geyimlərimizin tacı olan bu baş örtüyünün ana və bacılarımıza çox yaraşdığını vurğuladı.
Sonra “Mirvarid Dilbazi Poeziya Məclisi” İctimai Birliyinin sədri, şəxsi Kəlağayı Muzeyinin direktoru və “Sazlı-sözlü kəlağayı günləri” layihəsinin rəhbəri, şair, publisist Güllü Eldar Tomarlı çıxış etdi. O bildirdi ki, layihədə məqsəd milli-mənəvi dəyərlərin gənc nəsil arasında təbliği, adət-ənənələrin yaşadılmasıdır. Kəlağayının Azərbaycanın milli-mənəvi dəyərlərində yeri, tarixi, istehsal ənənələri, naxış növləri haqqında məlumatlar maraqla dinlənildi.
Tədbir tələbələrin hazırladığı ədəbi-bədii hissə ilə davam etdi, mövzuya uyğun musiqi nömrələri və şeirlər səsləndirildi. Qeyd olundu ki, Azərbaycan kəlağayısının Birinci vitse-prezident Mehriban Əliyevanın sayəsində dünyada tanıdılmasının və UNESCO-nun Qeyri-maddi mədəni irs siyahısına daxil edilməsinin 10 illiyi ərəfəsində bu kimi yaddaqalan məclislərin keçirilməsi təqdirəlayiqdir.
Layihə üzrə növbəti məclisin Bakının Yasamal rayonundakı Heydər Əliyev Mərkəzində keçirilməsi nəzərdə tutulur.
Ə.DOSTƏLİ
XQ