Londonda keçirilən Beynəlxalq Kitab Sərgisində iştirak edən Azərbaycan nümayəndə heyətinin üzvləri Britaniya Milli Kitabxanasında bu bilik məbədinin rəhbərliyi ilə görüşüb.
Kitabxananın baş direktoru Roly Keating 2013-cü ildə Bakıda Azərbaycan Milli Kitabxanasının 90 illik yubileyində iştirakından söhbət açıb və iki kitabxana arasında əməkdaşlığa dair memorandumun imzalanması məqsədilə təkliflərini təqdim edib.
Britaniya Milli Kitabxanasında görkəmli Azərbaycan şairləri Nizami Gəncəvinin, Məhəmməd Füzulinin, Xaqani Şirvaninin, Şah İsmayıl Xətainin, Məhəmməd Hadinin və digər klassiklərimizin qiymətli əlyazmalarının saxlandığına diqqət çəkilib, onların tədqiqi və elektron nüsxələrinin Azərbaycan Milli Kitabxanasına verilməsinə dəstək göstərilməsi xahiş olunub.
Mədəniyyət Nazirliyinin müşaviri Elçin Mustafayev bu il may ayının əvvəllərində Bakıda Beynəlxalq Mədəniyyət Tədbirinin – “VI Bakı Beynəlxalq Mədəniyyətlərarası Dialoq Forumunun” keçiriləcəyini bildirib və Mədəniyyət Nazirliyinin rəhbərliyi adından kitabxana heyətini həmin tədbirə dəvət edib.
Görüşün sonunda nümayəndə heyəti Britaniya Milli Kitabxanası ilə tanış olub.
Ə.ƏLİYEV
XQ
