REPORTAJ
Paytaxtın “Fantanlar bağı” Yeni il qabağı şənliklərin mərkəzidir
Paytaxt “Fantanlar bağı”nda ilayrıclarında “Soyuq əllər, isti ürək” adlı yarmarkasının keçirilməsi artıq nəcib ənənəyə çevrilib. Yeni il ovqatlı çal-çağır, əyləncə və görüş məkanına ziyarətçi axını həmişəki kimi güclüdür.
Yeni il ərəfəsində insanlar burada həm bayrama aid hədiyyələr alır, həm də əylənirlər. Yarmarkada müxtəlif əyləncəli oyunlar təşkil olunur, milli və xarici mətbəxlərin geniş çeşiddə məhsulları təqdim edilir.
Biz də bu yarmarka iştirakçılarının əhval-ruhiyyəsini öyrənmək, onların ürək sözlərini eşitmək üçün şəhərin mərkəzindəki “Soyuq əllər, isti ürək”lə təmasda olduq. Artıq 10-cu dəfədir ki, yarmarka qapılarını paytaxt sakinlərinin üzünə açır. Yeni il ovqatını, şəfqət duyğularını özündə təcəssüm edən bu layihədə həm əylənmək, həm də faydalı olmaq mümkündür.
Yarmarkanın təşkil olunduğu məkana giriş sərbəstdir. Geniş meydanda yaşanan izdiham xeyriyyə aksiyasına göstərilən böyük maraqdan xəbər verir. Bir tərəfdən isti şabalıd qoxusu, digər tərəfdən ləzzətli təamların ətri gəlir. Builki yarmarka möhtəşəm Yeni il yolkası, 64 böyük və 20 balaca ev, 3 ədəd ikimərtəbəli restoran, fotozona, 4D kinoteatrı, müxtəlif əyləncə zonaları və digər tematik guşələrdən ibarətdir. Biz də şənlənən gənclərə baxıb ürəkləndik və özümüzü “Ziq-zaq” oyununda sınadıq. Uduzsaq da, bu, əhvalımızı qətiyyən pozmadı. Ən azından əyləndik və aksiyanın iştirakçısı olduq.
İsti ürəkləri bir araya gətirən xeyriyyə yarmarkası təkcə yerli sakinlərin deyil, xarici qonaqların da marağına səbəb olur.
Bu baxımdan ilk diqqətimizi cəlb edən Azərbaycan, Türkiyə və Şimali Kiprin bayraqlarının asıldığı köşk olur. Orada çalışan Alper Sunçla söhbət edirik.
– Artıq səkkiz ildir ki, Azərbaycandayam, – deyə o, bildirir. – Burada ailə həyatı qurmuşam və Azərbaycan artıq 2-ci vətənimə çevrilib. Fırında makaron bizim milli yeməyimiz hesab olunur. Kiprdə hər evdə bişən bu yemək dadlı və doyumludur. Buyurun, siz də qonaq olun.
Alper bəyə təşəkkür edib gəzintimizə davam edirik. Ziyarətçilər burada münasib qiymətə hədiyyələr də əldə edir, xatirə şəkilləri çəkdirir, sevdikləri ilə birgə əsl bayram ab-havası yaşayırlar. Hamının çöhrəsindən sevinc, fərəh yağır. Sanki yarmarka Yeni il ərəfəsində insanları bir-birinə daha da yaxınlaşdırıb.
Paytaxtımızın gənc sakini Elsevər fikirlərini qəzetimizlə bölüşür:
– Bu yarmarkanın ilbəil təşkil olunması məni sevindirir. İnsanlar asudə vaxtlarını keçirərək müxtəlif oyunlara qatılır, eyni zamanda, bir sıra xəstəliklərdən əziyyət çəkən uşaqların müalicə və əməliyyat xərclərinin ödənilməsinə yardımçı olurlar. Mən də oyunlra qatılıb, üstəlik hədiyyələr də qazanmışam. Soyuq havada qaynar mühit adama zövq verir.
Yarmarkaya qatılan Aslan adlı sakin isə belə deyir:
– Bilirik ki, yarmarkada yığılan pullar xəstə uşaqların sağalması üçün xərclənir. Biz ailəmizlə birgə hər il həm bu işə kömək olmaq, həm də əylənmək üçün dəfələrlə yarmarkaya gəlirik. Qoy, sağlamlığında nasazlıq olan uşaqlar da tezliklə sağalıb, hamı kimi şən oyunlara qatılsınlar.
Əlbəttə, insanlarımızın bu cür düşünməsi sevindirici haldır. Elə təşkilatçıların məqsədi də insanları sadəcə əyləndirməkdən, çal-çağırdan ibarət deyil. “Soyuq Əllər, İsti Ürək” ölkənin hər yerindən bu yarmarkanın əsas təşkilatçısı olan “Nargis” Fonduna üz tutan onlarla ailə üçün bir ümid çırağıdır. “AzerCell”, “BirBank”, “Nescafe” və digər qurumlar, şirkətlər yarmarkada əsas tərəfdaşlar kimi iştirak edirlər.
Sonda qeyd edək ki, əvvəlki illərdə bu yarmarkada kitab satışı da həyata keçirilərdi. Təəssüf ki, indi bu, deyəsən, unudulub. Fikrimizcə, bu cür kampaniyalarda kitablara da yer ayrılsa, yaxşı olar. Belədə ziyarətçilərin mütaliə həvəskarı olan kəsimi də, necə deyərlər, darıxmaz.
Ümumilikdə isə, “Soyuq əllər, isti ürək” xeyriyyə yarmarkası zəngin təəssürat yaradan bir məkandır.
Ceyhun MİRZƏLİ,
Əli ƏLİYEV
XQ