Azərbaycanda Qazaxıstan Mədəniyyəti Günləri

Ölkələrimiz dövlət müstəqilliyi qazandıqdan sonra Azərbaycan və qazax xalqlarının dərin kökləri olan dostluq münasibətləri, xüsusilə də mədəni əlaqələr sahəsində əməkdaşlığı daha da genişlənib. 

Azərbaycan Prezidenti İlham Əliyev bu ilin aprel ayında Qazaxıstana rəsmi səfəri zamanı humanitar sahədə əmək­daşlığın mühüm əhəmiyyət daşıdığını bil­dirərək deyib ki, ənənənin davamı olaraq Azərbaycanda Qazaxıstan mədəniyyəti günləri, Qazaxıstanda isə Azərbaycan mədəniyyəti günlərinin təşkili xalqlarımızı daha da yaxınlaşdıracaq, qədim tariximi­zi və mədəniyyətimizi daha da zənginləş­dirəcək.

Xatırladaq ki, ötən ilin iyulunda Almatı şəhərindəki “Milli Dombra Günü”nə həsr olunmuş bayram tədbirində Azərbaycan nümayəndələri də fəal iştirak ediblər. Son tədbirlərdən biri isə bu ilin oktyabr ayın­da Azərbaycanın mədəniyyət beşiyi olan Şuşanın Türk Dünyasının Mədəniyyət Paytaxtı statusunu daşıması ilə əlaqə­dar Beynəlxalq Türk Mədəniyyəti və İrsi Fondunun “Şuşa Günləri” layihəsi üzrə təntənələrin Bursa, Daşkənd və Buda­peştdən sonra qardaş ölkənin Astana və Türkistan şəhərlərində təşkili olub. Qa­zaxıstan Prezidenti Kasım-Jomart Toka­yevin təşəbüssü ilə Füzulidə qazax xalqı­nın böyük oğlu Kurmanqazı adına Uşaq Yaradıcılıq Mərkəzinin inşa olunması da qardaşlıq münasibətlərinin parlaq təza­hürlərindəndir. 

Dekabrın 2-də Azərbaycanda Qa­zaxıstan mədəniyyəti günləri başlayıb. Beynəlxalq Muğam Mərkəzində mədə­niyyət günlərinin açılışı olub. Mərasim­də diplomatik korpusun nümayəndələri, mədəniyyət və incəsənət xadimləri, mu­siqisevərlər iştirak ediblər. Qazaxıstanın Azərbaycandakı səfiri Alim Bayel çıxışın­da bildirib ki, türksoylu Azərbaycan və qazax xalqlarını ortaq mədəniyyət birləş­dirir. Diplomat mədəniyyət günlərinin iki ölkə arasında münasibətlərin bir göstəri­cisi olduğunu deyib və tədbirin proqramı barədə məlumat verib. Mədəniyyət nazi­rinin müşaviri Oleq Əmirbəyov qeyd edib ki, iki ölkə arasında əlaqələrin inkişafı qürur doğurur. 

Sonra Qazaxıstanın “Hassak” et­no-folklor ansamblının solo-konserti təq­dim edilib. Qazax milli musiqisini Böyük Çölə aid 30 alətdə ifa edən tanınmış kollektiv yüksək performans nümayiş et­dirib. Ansambl, eyni zamanda, milli kukla teatrı ənənələrindən istifadə etməsi ilə tamaşaçıların alqışını qazanıb. 2013-cü ildə yaradılan bu ansambl ötən illər ərzin­də xalq musiqisi sahəsində bir çox nüfuz­lu beynəlxalq mükafata layiq görülüb. An­sambl “Etnik musiqi” nominasiyası üzrə “World folk vision” beynəlxalq müsabiqə­sinin Qran-pri, “Central Asia Got Talent” beynəlxalq istedad müsabiqəsinin “Qızıl düymə” mükafatlarının sahibidir.

Mədəniyyət günləri çərçivəsində Qa­bit Musrepov adına Qazaxıstan Dövlət Akademik Uşaq və Gənclər Teatrı sənət­sevərlər qarşısında "Qaragöz" tamaşası ilə çıxış edib. Teatrsevərlər bu kollektivi hələ 2014-cü ildə keçirilmiş Birinci Şəki Beynəlxalq teatr festivalındakı uğurlu çıxışı ilə xatırlayırlar. Azərbaycan Dövlət Akademik Musiqili Teatrının səhnəsində oynanılan tamaşanın quruluşçu rejissoru Fərhad Moldağali, bəstəkarı Oljas Jakyp­bek, səs tərtibatçısı isə Rahat Törejandır. Qazaxıstanlı yazıçı-dramaturq Muxtar Auezovun faciə janrında qələmə aldığı əsər köhnə adətlərin qurbanı olmuş iki sevən gəncin – Sırım və Qaragözün tale­yindən bəhs edir. Tamaşada əsas rolları Mədinə Öserbayeva, Nurjan Asılxan və Maksat Raxmet canlandırıblar.

Dünən isə Heydər Əliyev Mərkəzində Qazaxıstan təsviri sənət sərgisi nümayiş etdirilib və qardaş ölkənin incəsənət us­talarının qala-konserti keçirilib. 

Qeyd edək ki, 2024-cü ildə Qazaxıs­tanda Azərbaycan Mədəniyyəti Günləri keçiriləcək.

XQ