Məşhur “Sarı gəlin” mahnısının Ağqoyunlu hökmdarı Uzun Həsənin xanımı, Azərbaycanın əfsanəvi gözəli, Ağqoyunluların məhdi-ülyası, tariximizin ikinci diplomatik müdrik qadını Dəspinə Xatuna həsr olunduğunu bilirdinizmi?
Deyilənə görə, toy mərasimində bu mahnını bir aşıq onun üçün oxuyur. Mahnıdakı “Sarı gəlin” sözü də məhz “Saranın gəlini” mənasını ifadə edir.
Gözəlliyi ilə aləmə nur saçan, adına dastanlar yazılan bu xanım 1438-ci ildə Türkiyənin Trabzon vilayətində dünyaya göz açıb. Əsl adı Teodora olan Dəspinə xatun sonuncu Bizans kralı IV İohanın qızı olub. Sultan II Mehmet Fateh Konstantinopolu fəth edərkən o, İstanbul sarayına gətirilir. 1458-ci ildə Trabzon imperatorluğunun süqutundan öncə Ağqoyunlu hökmdarı Uzun Həsən ilə diplomatik evlilik adı altında ailə quraraq Diyarbəkir sarayına aparılır.
Bu izdivacdan Ağqoyunluların gələcək şəhzadəsi Sultan Yaqub və Aləmşahbəyim dünyaya gəlir. Lakin bu xoşbəxtlik uzun sürmür. 1461-ci ildə osmanlı tayfaları Ağqoyunluların Qara dənizə olan çıxışını həmişəlik bağlamaq üçün Trabzon vilayətinə yürüş edir. Dəspinə xatun Uzun Həsəndən xahiş edir ki, heç olmasa ailəsini düşmənlərdən xilas edə bilsin. Lakin o, bununla razılaşmır. Anası Sara xatunu elçi kimi osmanlıların düşərgəsinə göndərir. Uğursuz diplomatik danışıqlar nəticəsində Dəspinə xatun doğulduğu torpağı, vilayət varisliyini və ailəsini itirir. Bundan sonra, onun Sara xatunla və saraydakılarla münasibətləri korlanır. Çox keçmir ki, Uzun Həsənin anası vəfat edir. Həyat yoldaşı ondan itirdiyi torpaqları geri almağı tələb edir. Onun bu təklifi Uzun Həsənə baha başa gəlir. Belə ki, 1472-ci ildə Malatya döyüşündə II Fateh Mehmetə qalib gəlsə də, 1473-cü ildə Otluqbeli döyüşündə məğlub olur. Bundan sonra, onların arası soyuyur və heç vaxt görüşmürlər. Uzun Həsənin ölümündən sonra 1478-ci ildə 40 yaşında dünyasını dəyişən Dəspinə xatun Diyarbəkirdəki Müqəddəs Georgi kilsəsində dəfn olunur.
Mahnının etimologiyası haqqında müxtəlif versiyalar səsləndirilir. Bir versiyaya görə, "Sarı gəlin" mahnısının tarixi İslamdan əvvələ gedib çıxır. Amma bəzi musiqiçilər elə hesab edirlər ki, bu əsərin 150-200 illik tarixi var. İntonasiyasına görə, mahnı çox arxaikdir - 3-4 notun üzərində qurulub. VII əsrin əvvəllərində "sarı" sözü rəmzi mənada "böyük", "dağ" anlamında qəbul edilib. Qədim türk anlayışında isə "sarı" "kübar", "incə" deməkdir. Bizdə bu ifadə iki anlayışda - "rəng" və "ürəyimin sarı siminə toxunma" kimi istifadə edilir.
Fidan HÜQUQQIZI,
“Xalq qəzeti”