Avropa İttifaqının (Aİ) Azərbaycandakı nümayəndəliyinin rəhbəri Peter Mixalko və Avropa İttifaqına daxil olan dövlətlərin (Almaniya, Belçika, İsveç, Niderland, Bolqarıstan, Çexiya, Estoniya, Latviya, Litva, Polşa, Rumıniya, Xorvatiya) ölkəmizdəki səfirlərindən və diplomatlarından ibarət nümayəndə heyəti “Avropa şəhərciyi” adlı tədbirdə iştirak etmək üçün Lənkərana səfər ediblər.
Qonaqlar maraqlı tədbirlərdə iştirak ediblər. İcra hakimiyyətinin başçısı Taleh Qaraşov görüş zamanı deyib ki, belə tədbirlər Aİ-ni və üzv ölkələrin mədəniyyətlərini, dəyərlərini tanımağa, öyrənməyə imkan verir. Sonra o, rayon haqqında, onun turizm potensialı barədə diplomatlara məlumat verib.
Aİ səfiri Peter Mixalko qeyd edib ki, təşkilat regionun inkişafı üçün müxtəlif layihələr həyata keçirir. Aİ və Azərbaycan arasında təhsil sahəsində uğurlu əməkdaşlıq da bu sıradandır.
LDU-da, muzeylərdə keçirilən görüşlər də maraqlı olub.
Hazırladı:
Ə.DOSTƏLİ, “Xalq qəzeti”