Azərbaycan Dövlət Mədəniyyət və İncəsənət Universitetinin (ADMİU) və “Arts Council Azerbaijan” QHT-nin təşkilati dəstəyi ilə “Q Gallery” qalereyasında rəssam Röya Həsənin “İz” adlı fərdi sərgisi açılıb. 27 əsərdən ibarət sərgi Azərbaycanın mədəni irsində və tarixində dərin iz qoymuş görkəmli şəxsiyyətlərə həsr olunub.
Açılışda çıxış edənlər rəssamın yaradıcılıq xüsusiyyətlərindən danışıb, portret janrına üstünlük verdiyini vurğulayıb, ona yeni uğurlar arzulayıblar.
Qeyd edək ki, Röya Həsən ADMİU-nun təsviri sənət kafedrasının müəllimi, Azərbaycan Rəssamlar İttifaqının, “Arts Council Azerbaijan” təşkilatının üzvüdür. O, Türkiyə, ABŞ, Fransa, İtaliya, İspaniya, Almaniya, Lüksemburq, Rusiya, Çexiya, Gürcüstanda təşkil olunan sərgi və simpoziumlarda Azərbaycanı təmsil edib.
Hazırladı:
Ə.DOSTƏLİ, “Xalq qəzeti”