"Şeyx Sənan"ın Xumarı, "Antoni və Kleopatra"nın Kleopatrası, "Od gəlini"nin Solmazı kimi tanınan Hökumə Qurbanova Azərbaycan teatr tarixində iz qoymuş sənətkarlardandır. O, bir-biri ilə əks qütblərdə qərar tutan komik və faciə rollarının mahir ifaçısı idi. İlk vaxtlar Milli Dram Teatrının tamaşalarında ara-sıra çıxış edib, amma 1938-ci ildən ömrünün sonunadək – 50 il əsas rolların ifaçısı olub.
Bəlkə də çoxları bilmir ki, Hökumə Qurbanovanın ilk rolu kinoda olub. O zaman konservatoriyanın fortepiano sinfində oxuyurdu. Böyük dramaturq Cəfər Cabbarlının diqqətini cəlb edib və onun təşəbbüsü ilə "Almaz" filmində Yaxşı roluna çəkilib. Həmin film ekranlara ədibin ölümündən sonra, 1936-cı ildə buraxılsa da, Hökumə xanımın kinoda daşıdığı Yaxşı adı onun bir aktrisa kimi yaradıcılıq yolunun xarakterini müəyyənləşdirib: ard-arda gələn bütün çıxışları yaxşı olub. Elə buna görədir ki, taleyini əsasən teatrla bağlasa da, kinonu da unutmayıb və sonralar "Azərbaycanfilm"in istehsal etdiyi filmlərdə öz sözünü deyə bilib. Təkcə 1958-ci ildə dörd filmdə oynayıb: “Kölgələr sürünür”, “Onun böyük ürəyi”, “Ögey ana” və “Uzaq sahillərdə”. Sənət yolundakı kölgələri yox edə bilib, böyük ürəyi ilə ögey anadan sevimli əziz anaya çevrilib və bu gün sənətsevərlərin yaddaşının uzaq deyil, ən yaxın sahillərində qərar tutur.
Haqqında verilən ensiklopedik məlumatlarda qeyd edilir ki, istedadlı aktrisa səslə daxili ehtirasını paralel işlətməkdə, onları obrazın mürəkkəb, psixoloji, ziddiyyətli mənəvi aləminin açılmasına istiqamətləndirməkdə mahir ustad idi.
Azərbaycanın teatr səhnəsində Sona, Şirin, Səhər, Maral, Gülarə, Sürəyya, Xədicə... kimi obrazlara həyat verən Hökumə Qurbanovanın parlaq ifalarını yaşlı nəslə mənsub olan teatrsevərlər yaxşı xatırlayırlar. Roldan-rola püxtələşərək, böyük yola çıxan aktrisanın sənət xidmətləri yüksək qiymətləndirilib. O, 1960-cı ildə Azərbaycanın, 1965-ci ildə SSRİ-nin Xalq artisti fəxri adlarına layiq görülüb.
Yaşının 70-ci ilindən sonra da gənclik şövqü ilə çalışan, çıxışları Akademik Milli Dram Teatrında gənclər üçün qənimət “ustad dərsləri” kimi dəyərləndirilən Hökumə xanımın sənət ardıcıllarından biri də qızı Vəfa Fətullayeva idi. Təəssüf ki, Vəfanın çox erkən vəfat etməsi onun ana qəlbini yaralayıb və övladından sonra cəmi bir il yaşayıb.
...Hökumə Qurbanovanın canlandırdığı rollardan biri “İnsan məskən salır” filmindəki Ana obrazı idi. Özü də bir ana kimi sevimli övladından sonra çox yaşaya bilməyib fani dünyanı tərk etsə də, könüllərimizdə əbədi məskən salıb.
Ə.NƏCƏFXANLI, “Xalq qəzeti”