Avtomobil istehsalçısı Bugatti cəmi bir nüsxədə hazırlanan və əfsanəvi Bugatti Veyron modelinə ehtiram olaraq yaradılmış unikal FKP Hommage avtomobilini təqdim edib. Autocar nəşrinin məlumatına görə, bu model iyirmi il əvvəl yol üçün nəzərdə tutulmuş hiperkar anlayışını kökündən dəyişən Veyrona ithaf olunub. Yenilik 22 yanvar 2026-cı ildə Bugatti-nin eksklüziv Programme Solitaire proqramı çərçivəsində rəsmi şəkildə nümayiş etdirilib.
FKP Hommage adı Volkswagen Group-un keçmiş idarə heyətinin sədri Ferdinand Karl Piexə istinaddır. Məhz o, orijinal Veyron layihəsinin arxasında dayanmış və bu avtomobilin reallaşmasını mümkün etmişdi. Avtomobil texniki baxımdan müasir Bugatti Chiron platforması üzərində qurulsa da, dizayn və konseptual yanaşma etibarilə sələfini xatırladır və 2026-cı ildə, iki onillik mühəndislik tərəqqisi nəzərə alınmaqla, Veyron-un necə görünə biləcəyini nümayiş etdirir.
FKP Hommage modelinin ürəyi dörd turbinlə təchiz olunmuş əfsanəvi 8,0 litrlik W16 mühərrikdir. Təxminən 1578 at gücü hasil edən bu güc aqreqatı daha əvvəl Chiron Super Sport versiyasında istifadə olunub və artan güc şəraitində etibarlılığı təmin etmək üçün təkmilləşdirilib.
Avtomobilin dizaynı Veyron-un klassik cizgilərini - ikirəngli kuzov boyasını, iri “nal” formalı radiator barmaqlığını və xarakterik siluetini - müasir elementlərlə birləşdirir. Daha böyük hava girişləri, LED faralar və karbon lifindən geniş istifadə buna nümunədir. Təkərlərin ölçüsü öndə 20 düym, arxada isə 21 düymdür ki, bu da orijinal proporsiyalara istinad edir, lakin müasir şinlər və texnologiyalar nəzərə alınmaqla hazırlanıb.
İnteryer Bugatti üslubuna sadiq qalsa da, xüsusi detallarla zəngindir: mərkəzi konsol bütöv alüminium blokdan yonulub, oturacaqlar və panellər layihə üçün xüsusi hazırlanmış materiallarla üzlənib. Alətlər panelində isə Audemars Piguet Royal Oak Tourbillon mexaniki saat mexanizmi yerləşdirilib ki, bu da eksklüziv bir detal hesab olunur.
FKP Hommage seriya istehsalı üçün nəzərdə tutulmayıb - bu, son dərəcə məhdud proqram çərçivəsində hazırlanmış fərdi sifariş avtomobilidir. Bugatti ildə iki ədədə qədər bu cür unikal layihə istehsal etməyi planlaşdırır. Dəqiq qiymət açıqlanmasa da, mövcud məlumatlara görə avtomobilin dəyəri 10 milyon avrodan artıqdır və bu göstərici onu La Voiture Noire kimi brendin digər ultra-eksklüziv modelləri ilə eyni qiymət kateqoriyasına daxil edir.
S.ELAY
XQ
