Heydər Əliyev Fondunun Rusiya nümayəndəliyinin əməkdaşları Moskvanın “Bizim Ev” ailə tərbiyəsinə dəstək mərkəzində olublar. Orada valideyn himayəsindən məhrum uşaqlar üçün rəsm müsabiqəsi təşkil edilib.

Moskvada yerləşən “Bizim ev” ailə tərbiyəsinə dəstək mərkəzi qapılarını valideyn himayəsindən məhrum olan sağlam uşaqlarla yanaşı, fiziki və zehni inkişafdan geri qalan körpələrin də üzünə açıb. Mərkəzin rəhbərliyi Heydər Əliyev Fondunun, Fondun vitse-prezidenti Ley­la Əliyevanın daimi qayğısından, uşaq evinə olan diqqətindən danışıb. Bildirilib ki, Heydər Əliyev Fondunun vitse-prezi­denti və Rusiya nümayəndəliyinin rəhbəri Leyla Əliyeva dəfələrlə burada uşaqlara baş çəkib, onlar üçün bayram tədbirləri təşkil edib.

“Bizim Ev” ailə tərbiyəsinə dəstək mərkəzinin direktoru Vadim Menşov Heydər Əliyev Fonduna təşəkkürünü bil­dirərək deyib: “Heydər Əliyev Fondunun nümayəndələrinin “Bizim Ev”ə hər gəlişi bayramdır. Biz Leyla xanım Əliyevanın sayəsində Heydər Əliyev Fondu ilə dost­laşmışıq. Leyla xanım hər zaman bizə dəstək olur. Onun böyük mənəvi dəstəyi bizim üçün çox dəyərlidir”.

Heydər Əliyev Fondunun Rusiya nü­mayəndəliyinin bölmə rəhbəri Tamilla Əhmədova Fondun uşaqlara daim xüsu­si qayğı göstərdiyini vurğulayaraq qeyd edib: “Hamımız yaxşı bilirik ki, uşaqlar bizim gələcəyimizdir. Məhz uşaqlar dün­yanın gələcəkdə necə olacağını, necə inkişaf edəcəyini müəyyənləşdirəcəklər. Ona görə də Heydər Əliyev Fondunun vitse-prezidenti Leyla xanım Əliyevanın rəhbərliyi ilə fondun Rusiya nümayəndə­liyinin uşaqlara göstərdiyi diqqət və qayğı işimizin çox vacib tərkib hissəsidir”.