Dünən Milli Məclisin Sədri Sahi­bə Qafarova Çin Xalq Respubli­kasının ölkəmizdəki fövqəladə və səlahiyyətli səfiri Qo Min ilə görüşüb. Səfiri salamlayan S.Qafarova deyib ki, Azərbaycan Respublikası ilə Çin Xalq Res­publikası arasında münasibət­lər yüksək inkişaf dinamikasına malikdir. Bu münasibətlər stra­teji tərəfdaşlıq xarakteri daşıyır və hər iki xalqın mənafelərinə cavab verir. 

Spiker Azərbaycan və Çin döv­lət başçıları arasında qarşılıqlı eti­mada əsaslanan yüksək səviyyəli siyasi dialoqun ikitərəfli münasibət­lərin bütün sahələrdə inkişafı üçün möhkəm zəmin yaratdığını bildirib. O cümlədən, dövlət başçılarının təmasları iki ölkə arasında bütün sahələrdə əlaqələrin dərinləşmə­sində və inkişafında mühüm rol oynayır. Bu kontekstdə Azərbay­can Prezidenti İlham Əliyevin Çin Xalq Respublikasına 5 səfəri qeyd edilib.

Heydər Əliyev Fondu iki ölkə arasında mədəni və humanitar mü­badilənin genişlənməsinə böyük töhfə verir. Çinin Xarici Ölkələrlə Dostluq Xalq Cəmiyyəti ilə birgə müxtəlif layihələr uğurla həyata keçirilir. Ölkələrimiz üçün xüsusi əhəmiyyət kəsb edən məsələlər­də daim qarşılıqlı dəstək nümayiş etdirilir. Azərbaycan birmənalı ola­raq “vahid Çin” siyasətini, onun ərazi bütövlüyünü və suverenliyini dəstəkləyib. Çin də ölkəmizin ərazi bütövlüyünə və suverenliyinə hər zaman dəstək verib. O cümlədən, ölkələrimiz beynəlxalq təşkilatlar çərçivəsində də bir-birinə qarşılıqlı dəstək göstərir.

Qeyd olunub ki, Azərbaycan və Çin arasında parlamentlərarası əməkdaşlıq da yüksək səviyyə­dədir. Hər iki ölkənin parlament­lərində dostluq qrupları fəaliyyət göstərir. 

Səfir Qo Min Azərbaycanda fəaliyyət göstərməkdən məmnun­luğunu bildirərək, qeyd edib ki, iki ölkə arasında münasibətlər di­namik və sabit inkişaf edir. Diplo­mat əlaqələrin inkişafında dövlət başçıları arasında münasibətlərin vacib rolunu vurğulayıb. O deyib ki, Çin Xalq Respublikasının Sədri Si Cinpin növbədənkənar prezi­dent seçkilərində əldə etdiyi qələ­bə münasibətilə Prezident İlham Əliyevə təbrik məktubu göndərib. Diplomat, həmçinin COP29-un ölkəmizdə keçirilməsi münasibətilə də təbriklərini çatdırıb. Səfir par­lamentlərarası əlaqələrin ölkələr arasında münasibətlərin inkişafın­da mühüm rolu qeyd edərək, Çin üçün əsas məsələlərdə göstərilən dəstəyə görə Azərbaycan parla­mentinə təşəkkür edib.

Qeyd edilib ki, Qədim İpək Yolu xalqları birləşdirir. Bu gün də ölkələrimiz arasında bu istiqamət­də əməkdaşlıq əlaqələri mövcud­dur. Azərbaycan Çin Xalq Res­publikası Sədrinin irəli sürdüyü “Bir kəmər, bir yol” təşəbbüsünü dəstəkləyən ilk ölkələrdəndir. Bu is­tiqamətdə mühüm layihələr həyata keçirilmiş, Azərbaycanın nəqliyyat imkanları xeyli artmış və iri iqtisadi layihələrin həyata keçirilməsi üçün yeni imkanlar yaradılmışdır.

Görüşdə Azərbaycanın işğal­dan azad olunmuş ərazilərində həyata keçirilən nəhəng bərpa və yenidənqurma işləri, o cümlədən, “ağıllı şəhər”, “ağıllı kənd”, “yaşıl enerji” layihələri barədə də məlu­mat verilib. Səfir həmin ərazilərdə olduğunu və görülən işləri öz göz­ləri ilə gördüyünü bildirib.

Ə.BƏDƏLOV
XQ