Martın 12-də Gürcüstanın Baş naziri İrakli Kobaxidze Tbilisidə səfərdə olan Azərbaycan Respublikası Təhlükəsizlik Şurasının katibi Ramil Usubov ilə görüşüb.
Görüşdə tərəflər Gürcüstan ilə Azərbaycan arasında ikitərəfli və çoxtərəfli formatda əməkdaşlıq məsələlərini müzakirə ediblər.
Söhbət zamanı regionda sabitliyin və uzunmüddətli sülhün vacibliyi vurğulanıb.
***
Həmin gün Təhlükəsizlik Şurasının katibi Gürcüstanın daxili işlər naziri, Milli Təhlükəsizlik Şurasının katibi Vaxtanq Qomelauri ilə də görüşüb.
Görüşdə iki ölkənin müvafiq strukturları arasında təhlükəsizlik sahəsində əməkdaşlığın dərinləşdirilməsinin vacibliyi qeyd edilib.
Söhbət zamanı regionda baş verən hadisələr və təhlükəsizlik sahəsində aktual məsələlər diqqət mərkəzində olub.
Vaxtanq Qomelauri səmərəli əməkdaşlığa görə Ramil Usubova təşəkkürünü bildirib, tərəfdaşlıq əlaqələrinin gələcəkdə də müxtəlif istiqamətlərdə fəal şəkildə davam edəcəyinə və dərinləşəcəyinə ümidvar olduğunu vurğulayıb.
***
Dünən Ramil Usubov Gürcüstanın müdafiə naziri İrakli Çikovani ilə də görüşüb.
Tərəflər Gürcüstan ilə Azərbaycan arasında strateji əməkdaşlığın əhəmiyyətindən danışıblar. Diqqətə çatdırılıb ki, Azərbaycan ilə Gürcüstan arasında müdafiə sahəsində ikitərəfli əməkdaşlıq illik plana uyğun olaraq intensiv şəkildə həyata keçirilir.
Söhbət zamanı, həmçinin Azərbaycan–Türkiyə–Gürcüstan üçtərəfli əməkdaşlıq formatının əhəmiyyətinə diqqət çəkilib. İrakli Çikovani deyib ki, Gürcüstan bu il müdafiə nazirlərinin üçtərəfli görüşünə ev sahibliyi edəcək.
***
Gürcüstanda səfərdə olan Azərbaycan Respublikasının Təhlükəsizlik Şurasının katibi Ramil Usubov martın 12-də Tbilisinin mərkəzindəki Heydər Əliyev parkında Ulu öndərin abidəsini ziyarət edib.
R.Usubov, həmçinin Tbilisidəki Qəhrəmanlar meydanında Gürcüstanın ərazi bütövlüyü uğrunda həlak olmuş qəhrəmanların xatirəsini yad edib, abidənin önünə əklil qoyub.
XQ
.jpg)
