Dünən Qafqaz Müsəlmanları İdarəsinin sədri şeyxülislam Allahşükür Paşazadə Səudiyyə Ərəbistanı Krallığının Həcc və Ümrə naziri Taufiq bin Fauzən Əl Rabiən ilə görüşüb.
Azərbaycanda din–dövlət münasibətlərinin yüksək səviyyədə olduğunu qeyd edən A.Paşazadə bildirib ki, ölkəmizdə məzhəblər arasında heç bir ayrı-seçkilik yoxdur. Qafqaz Müsəlmanları İdarəsi Şimali Qafqazda İslamın bütün ənənəvi məzhəblərinin vəhdətinin tərəfdarıdır. Şeyxülislam diqqətə çatdırıb ki, Azərbaycanda müxtəlif dinlərin nümayəndələri arasında münasibətlər də çox yaxşı, qardaşlıq səviyyəsindədir. O, qonaqları, eyni zamanda, COP29 konfransı çərçivəsində BMT-nin dinlərarası pavilyonunun təşkil olunacağı və dini liderlər sammitinin keçiriləcəyi barədə məlumatlandırıb.
Nazir Taufiq bin Fauzən Əl Rabiən bu gün Prezident İlham Əliyevlə görüşündən böyük məmnunluqla danışıb. Bildirib ki, bu, iki ölkə arasında olan yüksək səviyyəli əlaqələrin nəticəsidir.
Azərbaycandan zəvvarların, turistlərin Səudiyyə Ərəbistanına getmələri üçün prosesin daha da asanlaşdırıldığını deyən nazir diqqətə çatdırıb ki, artıq vizanı onlayn və ya hava limanında əldə etmək mümkündür.
***
Səudiyyə Ərəbistanı Krallığının ölkəmizdə səfərdə olan Həcc və Ümrə naziri Taufiq bin Fauzən Əl Rabiə fevralın 27-də Azərbaycan Respublikasına səfəri ilə bağlı brifinq keçirib.
Nazir Prezident İlham Əliyev ilə görüşündən məmnunluğunu ifadə edərək deyib ki, Azərbaycandan müqəddəs məkanlara ziyarətlərin prosedurlarının sadələşdirilməsi yolları və Krallıq hökumətinin bu sahədəki səyləri müzakirə olunub.
Qonaq daha sonra bildirib ki, Krallığın hökuməti və onun bütün dövlət və özəl sektorları iki Müqəddəs Məscidi ziyarət etmək üçün dünyanın hər yerindən daha çox müsəlmanın gəlməsini asanlaşdırmaq məqsədi daşıyan prosedurlar və qanunlar hazırlamağa səy göstərir, onların Ümrə ziyarəti və iman səyahətlərini təkmilləşdirməyə, mədəni təcrübələrini zənginləşdirməyə çalışır. Azərbaycan Respublikası vətəndaşlarının ziyarətini sadələşdirmək məqsədilə, VİSİTSAUDİ portalı vasitəsilə və ya ölkəyə gəldikdən sonra hava limanlarında əldə edə biləcəkləri, bir il müddətinə çoxdəfəlik E-Viza istifadəyə verilib. Onunla qalma günlərinin ümumi sayı 90 günə qədərdir. Bu da zəvvarlara Ümrə ziyarətini yerinə yetirmək və Krallığın qalan bölgələri ilə tanış olmaq imkanı verir, həmçinin Nusk tətbiqi vasitəsilə Ümrə icazəsi və ər-Raudə əş-Şərifə ziyarət icazəsini asanlıqla və rahatlıqla əldə etməyə şərait yaradır.
Nazir Taufiq bin Fauzən Əl Rabiə dövlət qurumları və özəl sektor tərəfindən həyata keçirilən birgə səylərin Azərbaycan Respublikasından olan Ümrə zəvvarlarının sayının artmasına töhfə verdiyini vurğulayıb.
Ə.ƏLİYEV
XQ
