ABŞ-ın “Oracle Advisory Group” təşkilatı və “Vətəndaşların Əmək Hüquqlarını Müdafiə Liqası” Azərbaycanda seçki mühitinin ölçülməsi məqsədilə sosioloji sorğu keçirib. Sosioloji sorğunun keçirilməsində əsas məqsəd prezident seçkiləri ərəfəsində əhalinin səsverməyə hazırlığı və onların ölkənin siyasi həyatında iştirak səviyyəsinin, seçkilərlə bağlı ictimai rəyin öyrənilməsidir.

“Oracle Advisory Group” təşkila­tı sorğunun nəticələri ilə bağlı fevralın 2-də Şuşa şəhərində mətbuat konfransı keçirib. 

Təşkilatın nümayəndəsi Vlada Ga­lan bildirib ki, sorğuya, ümumilikdə, Azərbaycanın müxtəlif rayonlarından 3 min respondent cəlb edilib. Bunlardan 24,1 faizi Bakıdan, 8,3 faizi digər böyük şəhərlərdən, 21,3 faizi kiçik şəhər və qəsəbələrdən, qalanları isə (46,3 faiz) kəndlərdən olub. Sorğuda iştirak edən­lərin 49,3 faizi (1479 nəfər) qadın, 50,7 faizi (1521 nəfər) kişidir. Sorğu ölkə əhalisinin yaş statistikası nəzərə alı­naraq aparılıb və respondentlərin 36,2 faizi 18-34 yaş arası, 39 faizi 30-54 yaş arası, 24,8 faizi 55 və daha çox yaşda insanlar olub. Respondentlərin 24,1 faizi Bakı, 4,8 faizi Naxçıvan, 6,1 faizi Abşeron-Xızı, 3,4 faizi Dağlıq Şirvan, 6,4 faizi Gəncə-Daşkəsən, 6,8 faizi Qa­rabağ, 7,2 faizi Qazax-Tovuz, 5,9 faizi Quba-Xaçmaz, 10 faizi Lənkəran-As­tara, 7,8 faizi Mərkəzi Aran, 6,6 faizi Şəki-Zaqatala, 5,3 faizi Şirvan-Salyan bölgələrindəndir. Qərb təşkilatı olaraq ilk dəfə Qarabağda seçkilərlə bağlı so­sioloji sorğu keçirmişik.

“Oracle Advisory Group” təşkilatının nümayəndəsi George Birnbaum sosi­oloji sorğunun nəticələrini açıqlayaraq bildirib ki, sorğu vərəqindəki suallar “Əhalinin prezident seçkiləri ilə bağlı məlumatlılıq səviyyəsi”, “Ölkənin ha­zırkı vəziyyətinə münasibət”, “Əhalinin siyasi fəallıq səviyyəsi”, “Ermənistan–Azərbaycan münaqişəsi”, “Vətən mü­haribəsinə dəstək” kimi qruplaşdırılıb.

George Birnbaum qeyd edib ki, “Əvvəl­lər Azərbaycanda keçirilən prezident seç­kilərində iştirak etmisiniz?” sualına 34,9 faiz “demək olar ki, hər zaman” variantını seçib. Daha 28,4 faizi “hər zaman”, 11,1 faizi isə “çox vaxt” cavabı verib. Bu isə əhalinin seçkilərdə fəallığının göstəricisidir.

Əhalinin prezident seçkiləri ilə bağ­lı məlumatlılıq səviyyəsinin öyrənilməsi məqsədilə ünvanlanmış “Hazırda ölkəmi­zin üzləşdiyi ən vacib problem hansıdır?” sualına 2,3 faiz iqtisadi vəziyyəti, 34,9 faiz məşğulluğu, 27,1 faiz əmək haqqını, 0,4 faiz Azərbaycanın beynəlxalq arenada rolunu, 0,1 faiz cinayətkarlığı, 14,1 faiz korrupsiyanı, 6,7 faiz təhsili, 0,2 faiz eko­logiyanı, 13,1 faiz səhiyyəni, 1,1 faiz isə məişət zorakılığını qeyd edib.

Seçicilər arasında ölkənin “düzgün istiqamətdə” inkişaf etdiyi və Prezidentin uğurlu fəaliyyəti barədə əminlik hissi var.

“Azərbaycanın getdiyi yolun ümumi istiqamətini necə qiymətləndirirsiniz?” sualına seçicilərin 81,2 faizi “düzgün is­tiqamət”, 12,3 faizi isə “yanlış istiqamət” cavabını veriblər.

“Hazırkı Prezident İlham Əliyevin gör­düyü işləri necə qiymətləndirərdiniz?” su­alına 96 faiz “əla”, 2,5 faiz “yaxşı”, 0,8 faiz “qənaətbəxş” cavabını veriblər.

Bundan əlavə, seçicilər Azərbaycanı yaşamaq üçün təhlükəsiz ölkə olduğunu hesab edirlər. Belə ki, “Azərbaycanın di­gər qeyri-sabit ölkələrdən fərqli olaraq, regionda ən sabit ölkə olması ilə razısı­nızmı” sualına, sorğuda iştirak edənlərin 85,4 faiz “bəli” cavabını veriblər.

“Prezident seçkiləri bu günə təyin edil­səydi və namizədlər aşağıdakı şəxslər olsaydı, kimə səs verərdiniz?” sualına ve­rilən cavablar göstərir ki, respondentlərin böyük əksəriyyəti hazırkı ölkə rəhbərinin fəaliyyətindən razıdır. Belə ki, respon­dentlərin 97 faizi İlham Əliyevin, 1,2 faiz Zahid Orucun, 0,7 faizi Fazil Mustafanın, 0,5 faiz Razi Nurullayevin, 0,3 faizi Qüdrət Həsənquliyevin, 0,2 faiz Fuad Əliyevin, 0,1 faiz isə Elşad Musayevin adını çəkib.

Qarabağdakı qələbə ictimaiyyət tərə­findən Azərbaycanın böyük uğuru kimi qiymətləndirilir. Respondentlərin 98,50 faizi “Siz Azərbaycanın ərazi bütövlüyünü bərpa etmək üçün həyata keçirilən geniş­miqyaslı hərbi əməliyyatları dəstəklədiniz­mi?” sualına müsbət cavab veriblər. Bu rəqəm yüksək milli ruhu nümayiş etdirir.

“Sizcə, Azərbaycanın ərazi bütövlü­yünün bərpası ölkənin beynəlxalq aləm­də nüfuzuna necə təsir edib?” sualına respondentlərin əksəriyyəti - 72,5 faizi “müsbət”, 2,6 faizi “mənfi”, 24,9 faizi “neyt­ral” variantını seçib.

George Birnbaum bildirib ki, bütün cavablar əhalinin mövcud hökumətin fəa­liyyətinə münasibətinin açıq ifadəsidir. Belə ki, verilən cavablar əhalinin hazırkı hakimiyyətə olan inamını və dəstəyini əks etdirir. 

Bu bloka daxil olan və Prezident İlham Əliyevə münasibətlə bağlı suala verilən cavablar seçicilərin siyasi meyli və səsvermənin nəticələri haqqında ye­kun fikir formalaşdırmağa imkan yaradır.

“Beləliklə, bilavasitə Prezident İlhamƏliyevin fəaliyyətinə münasibətlə bağ­lı ictimai rəyin öyrənilməsinə yönəlmiş seçki öncəsi sorğunun nəticələrinə əsasən deyə bilərik ki, əhali İlham Əliye­vin hakimiyyətinə inanır və onun siyasi xəttini dəstəkləyir”, - deyə o əlavə edib.

ABŞ-ın “Oracle Advısory Group” təş­kilatı və “Vətəndaşların Əmək Hüquqla­rını Müdafiə Liqası” bu qənaətə gəlib ki, əhali fevralın 7-nə təyin edilmiş prezi­dent seçkiləri ilə bağlı məlumatlıdır. Bu, dövlətin həyata keçirdiyi maarifləndirmə və məlumatlandırma işinin yüksək səviy­yəsində aparılmasından xəbər verir.

George Birnbaum, həmçinin qeyd edib ki, seçki günündə exit-poll keçirilə­cək, seçki məntəqələrində səs vermiş 10 minlərlə insandan sorğu götürüləcək.