Fefralın 7-də Azərbaycanda ilk dəfə olaraq seçkilər bütün ölkə ərazisində keçiriləcək. Bunun üçün Şərqi Zənzəzur və Qarabağda 26 seçki məntəqəsi yaradılıb. Sözügedən bölgələrdə yaradılan seçki məntəqələrinin fəaliyyəti tam təmin olunub. Həmin seçki məntəqələrində seçici siyahılarına 22 mindən yuxarı seçicilərin məlumatları daxil edilib. Onlar həmin gün seçki məntəqələrində öz konstitusion hüquqlarından istifadə edərək səsvermədə iştirak edəcəklər. Qürurverici haldır ki, həmin ərazidə olan məntəqələr Zəfər seçkilərinin ilk məntəqələridir. Doğma ata-baba yurdlarına qayıtmış soydaşlarımız onlar üçün yaradılan bu imkanlardan səmərəli istifadə edəcəklər.
İşğaldan azad edilmiş ərazilərdə yaradılan seçki məntəqələrindən biri də 84 saylı Füzulu Seçki Dairəsinin tərkibindəki 75 saylı seçki məntəqəsidir. Məntəqənin sədri Ləman Məstəliyeva dedi ki, seçki məntəqəsi yaradılan vaxtdan böyük ruh yüksəkliyi ilə işə başlamışıq. Sevincimizin hədi-hüdudu yoxdur. Uzun illərdən sonra doğma ata-baba yurdumuzda seçkiyə qatılmaq tarixi Qələbəmizin bir daha təsdiqidir. Növbədənkənar prezident seçkilərində 1371 nəfər səs verəcək. Seçkilərin yüksək səviyyədə keçirilməsi üçün bütün imkanlardan istifadə olunub. MSK tərəfindən təlimatlar, yaddaş kitabçaları, seçkiyə çağırış plakatları, gözlə görünməyən mürəkkəb balonları, ultrabənövşəyi lampalar və digər zəruri avadanlıqlar seçki məntəqəsindədir. Dəqiqləşdirilmiş seçici siyahıları məntəqədə münasib yerdən asılıb.
L.Mustafayeva dedi ki, artıq sakinlərə bildirişlərin paylanılması prosesi də başa çatıb. Namizədlərin təşviqatlarının aparılması üçün hər hansı problem və ya narazılıq yoxdur. Məntəqəmiz seçkiyə tam hazırdır. Otuz ildən sonra ilk dəfə keçiriləcək seçkilər hər bir soydaşımızın gələcəyə olan inamını daha da artırıb.
İşğaldan azad olunan ərazilərdə ilk dəfə seçkilərin keçirilməsi isti ocaqlarına yenicə qayıtmış sakinlərdə yüksək əhval-ruhiyyə yaradıb. Həmin sakinlərdən biri Səmayə Həsənovanın dediklərindən:
– Otuz ildən sonra doğma yurdumuzda seçkilərin keçirilməsi bizim üçün ən böyük hədiyyədir. Ona görə də həmin gün əsil toy-bayrama dönəcək. Hamımız bir nəfər kimi, qürur və iftixarla seçkilərdə iştirak edəcəyik. Axı, biz qalib ölkənin vətəndaşlarıyıq. Otuz ildən sonra prezident seçkilərində öz torpağımızda – Fizulidə səs verəcəyik. Şükürlər olsun Ulu Tanrıya bu xöbəxt günü görmək bizə nəsib oldu.
120 saylı Cəbrayıl – Qubadlı Seçki Dairəsinin 81 saylı seçki məntəqəsi Cəbrayıl rayonunun Soltanlı kəndində yerləşir. Seçki məntəqəsi seçki prosesinə tam hazıdır. Bütün hazırlıq işləri müvəffəqiyyətlə başa çatıb.
Məntəqə seçki komissiyasının sədri Malik Həsənov seçkiyə hazırlıqla bağlı dedi:
– Biz doğma yurdumuzdayıq. Sanki yeni həyata başlamışıq. Üstəlik, kəndimizdə ilk dəfə olaraq seçki keçirilir. Özü də böyük siyasi əhəmiyyətə malik prezident seçkiləri. Bu seçkilərdə həm xalqın , həm də dövlətimizin gələcək taleyi həll olunur. Ona görə də seçkilərin azad, demokratik, şəffaf keçirilməsi üçün bütün imkanlardan istifadə edirik. Ərazimizdə prezidentliyə namizədlərin təbliğat-təşviqatı üçün hər cür şərait yaradılıb. Bütün işimizi Seçki Məcəlləsinin və digər qanunvericilik aktlarının tələblərinə tam uyğun qurmuşuq. Artıq bildirişlər də paylanılıb. Kənddə münasib yerlərdə seçkiyə çağırış plakatları asılıb. Seçicilər sanki bayrama, el şənliyinə hazırlaşırlar. Biz dünyaya sübut edəcəyik ki, Azərbaycan demokratik seçkilər keçirməyə qadir ölkədir.
İşaldan azad olunan Zəngilanda 3 seçki məntəqəsi yaradılıb. Rayonun Ağalı kəndində 875 nəfər məskunlaşıb. Onlardan 651 nəfəri aktiv səsvermə hüququna malikdir. 33 saylı Ağalı kənd məntəqə seçki komissiyasının sədri Vüqar Kərimov növbədənkənar prezident seçkilərinə hazırlıq barədə danışarkən dedi ki, kənddə hamı fevralın 7-sini böyük səbirsizliklə gözləyir. Məntəqə sədri daha sonra dedi:
– Seçki məntəqəsi ötən ilin dekabr ayında yaradılıb. Məntəqə seçki komissiyasının tərkibi formalaşdıqdan sonra fəaliyyətə başlamışıq. Komissiya üzvləri bilik və bacarıqlarını artırmaq, seçkinin gedişi zamanı baş verə biləcək hallarla tanış olmaq, yaranmış problemlərin aradan qaldırılması məqsədilə MSK tərəfindən təşkil olunmuş maarifləndirmə proqramları ilə bağlı keçirilən treninqlərdə yaxından iştirak ediblər. Məntəqəmiz bütün ləvazimatlarla tam təchiz olunub. MSK tərəfindən hazırlanmış metodiki vəsaitlərdın istifadə edirik və təlimatlarla yaxından tanış oluruq. Çalışacağıq ki, otuz ildən sonra ilk dəfə keçirilən seçkiləri yüksək səviyyədə başa vuraq. Ağalı kəndi işğaldan sonra öz sakinlərini birici qəbul edən ərazilərimizdəndir. Kəndimizə gələn əcnəbilər burada görülən işləri heyrətlə izləyiblər. Kəndimiz inkişaf etmiş rayonlardan heç də geri qalmır. Sakinlərin sevinci yerə-göyə sığmır. Ona görə də bu seçkilərdə bir nəfər kimi hamı iştirak edəcək. Seçkilırin yüksək səviyyədə, mütəşəkkil keçirilməsi üçün hər cür şərait yaradılıb.
Kənd sakini Gülnaz Həmidova sevincini gizlədə bilmədi:
– Kəndin bütün sakinləri böyük ruh yüksəkliyi ilə seçkilərə hazırlaşırlar. Biz səsverməyə alnıaçıq, üzüağ, coşqu ilə gedəcəyik. Çünki biz döğma kəndimizdə – Ağalıda səs verəcəyik.
125 saylı Zəngilan-Qubadlı Seçki Dairəsinin 65 saylı seçki məntəqəsində də fefralın 7- də keçiriləcək növbədənkənar prezident seçkilərinə hazırlıq işləri yüksək səviyyədədir. Məntəqə seçkiyə tam hazırdır.
121 saylı Laçın Seçki Dairəsinin 106 saylı seçki məntəqəsində 1485 seçici fefralın 7-sini böyük səbirsizliklə gözləyir. Məntəqə seçki komissiyasının sədri Qardaşxan Dostiyev dedi ki, seçki məntəqəsi seçicilərin yolunu gözləyir. Bütün ünvanlara bildirişlər paylanılıb. Sakinlər deyirlər ki, bildirişlərə ehtiyacımız yoxdur. Hamı səsvermədə iştirak etmək arzusundadır. Hətta ən yaşlı seçicilərimiz də səsvermədə şəxsən iştirak edəcəklərini bildiriblər. Deyirlər ki, belə bir günü səbirsizliklə gözləyiblər. Ona görə də seçkilədə mütləq iştirak edəcəklər.
125 saylı Zəngilan–Qubadlı Seçki Dairəsi üzrə seçkilər Zəngilan və Qubadlı rayonlarının işğaldan azad edilmiş ərazilərində yaradılmış 4 seçki məntəqəsində keçiriləcək. Həmin məntəqələrdən 3-ü Zəngilan, 1-i isə Qubadlı rayonu ərazisində yerləşir.
Əliqismət BƏDƏLOV
XQ
