Şəkildə gördüyünüz adamlar Samuxun Nəbiağalı şəhərinin sakinləri, Namazovlar nəslinin az bir qismidir. Seçki məntəqəsinə gəlib öz adlarını seçici siyahısında axtarırlar. Eləsi var artıq bir neçə dəfə müxtəlif seçkilərdə öz səsvermə hüququndan istifadə edib. Eləsi də var ömründə ilk dəfə səsvermə qutusuna yaxınlaşacaq...
Rayon mərkəzi olan Nəbiağalıda onları “Namazlılar” deyə çağırırlar. Əslində, bu, onların yaşadıqları məhəllənin adıdır. Namazovlar Samuxda tanınmış nəsildir. Onların arasında müxtəlif peşə sahibləri var: müəllim, həkim, fermer, fəhlə, sürücü... Hamısı mehriban, dövlətə və dövlətçiliyə sadiq, zəhmətkeş insanlardır.
101 saylı Samux–Şəmkir seçki dairəsinin sədri Bayram Qasımov deyir ki, Namazovlar seçkilərdə həmişə yüksək fəallıq göstəriblər. Onlara bildiriş kağızları göndərmək də lazım gəlmir. Həmin gün hamısı bir nəfər kimi, özü də səhər tezdən seçici məntəqəsinə axışır. Bu dəfə, fevralın 7-si günü daha mütəşəkkil olacaqları, səs verəcəkləri 2 saylı məntəqədə bir daha nümunə göstərəcəkləri indidən görünür.
Əminə Cəfərova, 2 saylı məntəqənin sədri:
– İnanırsınız, bəlkə də, hər gün gəlirlər, siyahıda dönə-dönə öz adlarına baxırlar, burada keçirilən tədbirlərdə iştirak edirlər.
Məntəqəmizdə səs verəcək seçicilərin, təxminən, 10 faizi Namazovlardır, bir nəslin nümayəndələridir. Hamısı yaxın qohumlardır. Ən böyüyü 90 yaşlı seçici Namazova Validə Nəcəf qızıdır. Ən gənci isə 18 yaşı yenicə tamam olan Namazov Ayaz Cahangir oğludur.
...Qeyd edək ki, prezident seçkiləri günü Namazovların 95 nümayəndəsi məntəqədə olacaq və öz layiqli namizədinə səs verəcək. Onların bir neçə nəfəri ilə görüşüb söhbət etdik.
Kəramət Namazov, musiqi müəllimi:
– Mən fəxr edirəm ki, Samuxda belə bir böyük nəslin nümayəndəsiyəm. Söhbət bizim başqaları ilə müqayisədə daha şaxəli nəsil olmağımızdan getmir. Namazovlar nəsli milli adət və ənənələri özündə qoruyub saxlayan, uşağından tutmuş ağsaqqalına kimi mentalitetə bir qanun kimi bağlı olan adamlardır. Səsvermə günü isə bu nizam-intizam həmişə özünü göstərib, bu dəfə də özünü göstərəcək, buna şübhəm yoxdur.
Nəcəf Namazov, sahibkar:
– Bu seçki əvvəlkilərdən seçilir. Ölkəmizin müstəqillik dövründə ilk dəfədir ki, torpaqlarımız, doğma Qarabağımız müzəffər Ali Baş Komandanın rəhbərliyi ilə yağı düşməndən alınıb özümüzə qaytarılıb. “Namazlılar məhəlləsi”ndə Şuşa da, Xankəndi də alınanda tonqallar qalandı, səhərədək onun ətrafından çəkilmədik. Əminəm ki, fevralın 7-də də məhəlləmizdə bu cür tonqallar şölələnəcək...
Bir vacib məqama da toxunaq ki, Namazovlar nəsli tez-tez bir yerə yığışır, tarixi bayramları, ad günlərini, digər əlamətdar hadisələri təntənə ilə qeyd edirlər. Rayon mərkəzində bu nəslin hansı nümayəndəsi ilə rastlaşdıqsa, fevralın 7-ni səbirsizlikə gözlədiklərinin şahidi olduq.
Hamlet QASIMOV,
XQ-nin bölgə müxbiri
Samux rayonu